10
1 Ämi pwii kana, üa fokun mochen seni lon unusen letipei pwe püsin aramasei kewe repwe küna manau. Üa pwal iotek ngeni Kot fänäsengesiir. 2 Üa tongeni pwärätä usur, pwe ra fokun tiliken le angang ngeni Kot, nge ar tiliken le angang esap longolong won ar silei usun mine a let. 3 Resap silei usun mine Kot a föri, pwe aramas repwe küna pwüng me ren, nge ra fen sotuni usun ar repwe küna püsin ar pwüng. Iei usun resap atolongeer fän mine Kot a föri pwe aramas repwe küna pwüng me ren. 4 Pun Kraist a fen aükätiu manamanen ekewe Allük, pwe iteiten aramas mi lükü repwe küna pwüng me ren Kot.
Aramas meinisin ra tongeni küna manau
10.5-21
5 Iei usun mine Moses a makkei usun än aramas repwe küna pwüng me ren Kot ren ar aleasochisi ekewe Allük, “Iö epwe aleasochisi ekewe Allük epwe manau.” ✡ Lif 18.5 6 Nge iei usun mine a mak lon ekewe Toropwe mi Pin usun än aramas repwe küna pwüng me ren Kot ren ar lükülük, “Kosap püsin ais ngonuk: Iö epwe feitä läng?” (wewen, iö epwe uwätiu Kraist). 7 “Kosap pwal ais: Iö epwe feitiu lon lenien mäla?” (wewen, iö epwe uweatä Kraist seni mäla). 8 Iei usun mine a mak lon ekewe Toropwe mi Pin, “Än Kot kapas a fokun kan ngonuk, a nom lon awom pwal lon lelukom”, iei ewe kapas usun ach lükülük sia afalafala. ✡ Tut 30.12-14 9 Are kopwe pwärätä ren awom pwe Jesus i ewe Samol o lükü lon lelukom pwe Kot a amanauasefäli seni mäla, kopwe küna manau. 10 Pun sia lükü Jesus lon lelukach o küna pwüng me ren Kot, sia pwal pwärätä Jesus ren awach o küna manau ren. 11 A mak lon ekewe Toropwe mi Pin, “Iö a lükü i esap lichipüng.” ✡ Ais 28.16 12 Pun esap wor sokofesenin chon Juta me chon lükün Israel. Kot ewe eman chök Samolun aramas meinisin, a fokun afeiöchü chokewe meinisin mi köri i. 13 Usun a mak lon ekewe Toropwe mi Pin, “Iteiten aramas mi köri iten ewe Samol epwe küna manau.” ✡ Sow 2.32 14 Nge ifa usun ar repwe tongeni köri i, are resap lükü? Ifa usun ar repwe tongeni lükü, are resap rongorong an kapas? Nge ifa usun ar repwe tongeni rongorong ewe kapas, are esap wor eman a asile ngeniir? 15 Ifa usun an we kapas epwe asilesil, are Kot esap tinala chon künö? Usun a mak lon ekewe Toropwe mi Pin, “A mürina wareton ekewe chon künö mi uwato ewe Pworausen Manau!” ✡ Ais 52.7 16 Nge sap aramas meinisin ra etiwa ewe Pworausen Manau. Aisea a püsin apasa, “Ai Samol, iö a lükü ewe kapas sia aronga?” ✡ Ais 53.1 17 Iei mine än eman lükülük a pop seni an rongorong ewe kapas, nge ewe kapas a pop seni än eman afalafala Kraist. 18 Nge üa ais: Mi enlet pwe resap rongorong ewe kapas? Ewer, ra rongorong! Pun iei usun mine a mak lon ekewe Toropwe mi Pin,
“Mwelier a chöfetal won unusen fanüfan,
ar kapas a tori lesopun fanüfan.” ✡ Kölf 18.4 19 Üa aissefäl: Ifa usun, ekewe aramasen Israel resap weweiti? Moses ewe aemanün a pölüeni,
“Üpwe föri pwe ämi nei aramas oupwe lolowo
ngeni eu mwichen aramas sap ir wesewesen eu mwü,
üpwe föri pwe ämi oupwe song
ngeni chon eu mwü mi umwes.” ✡ Tut 32.21 20 Aisea a fokun pwora lupwen a apasa,
“Chokewe resap küttaei ra künaei.
Üa pwäriei ngeni chokewe resap ais usi.” ✡ Ais 65.1 21 Nge fänäsengesin Israel a apasa, “Iteiten rän üa aitiela pei, pwe üpwe etiwa eu mwichen aramas mi lükümach o ü ngeniei.” ✡ Ais 65.2