8
Ewe afisuen pwau
8.1-5
Iwe, lupwen ewe Lam a ülei ewe afisuen pwau a wor eu lüa lon läng lon ükükün esop awa. Mürin üa küna ekewe füman chon läng mi ütä mwen mesen Kot, pwe ra angei füfoch rappwa.
Iwe, pwal eman chon läng mi amwöchü eu sepi seni kolt fän iten apach mi pwokus a feito o a ütä ren ewe rongen asor. A angei chomong apach mi pwokus, pwe epwe achu ngeni än ekewe chon pin iotek pwe epwe eäni asor won ewe rongen asor seni kolt mi nom mwen ewe lenien motun king. Am 9.1; Eks 30.1,3 Iwe, ötüötün ewe apach mi pwokus a feitä fiti än ekewe chon pin iotek seni lepöün ewe chon läng mi ütä mwen mesen Kot. Mürin ewe chon läng a angei ewe sepi fän iten apach mi pwokus, a amasoua ren ekewe molien ekkei mi nom won ewe rongen asor o a monetiu won fanüfan. Iwe, a fis ngüngü, chopun chopulap, fifi me chechechin fanü. Lif 16.12; Is 10.2; Eks 19.16; Pwär 11.19; 16.18
Ekewe rappwa
8.6-9.21
Mürin ekewe füman chon läng mi amwöchü ekewe füfoch rappwa ra amolätä ar repwe le ettikiir.
Iwe, lupwen ewe aemanün a ettiki nöün rappwa, üten fau me ekkei mi nofitfengen me cha ra turutiu won fanüfan. Eu leülüngatin fanüfan a karala, pwal eu leülüngatin irä me ekewe fetil meinisin. Eks 9.23-25; Is 38.22
Mürin ewe aruomanün chon läng a ettiki nöün rappwa. Iwe, och mi wewe ngeni eu chuk mi watte mi ngetenget ren ekkei a turutiu le matau. Iwe, eu leülüngatin ewe matau a wiliti cha, o eu leülüngatin mönümanau mi nom leset ra mäla, pwal eu leülüngatin ekewe sip ra karala.
10 Mürin ewe aülümanün chon läng a ettiki nöün rappwa. Iwe, eföü fü mi watte a ngetenget usun efoch töl a turutiu seni läng o turutiu won eu leülüngatin ekewe chanpupu me ekewe puächen koluk. Ais 14.12 11 Iten ewe fü “Maras”. Iwe, eu leülüngatin ekewe koluk ra maras, nge chomong aramas ra mäla ren ar ün ewe koluk, pun a maras. Jer 9.15
12 Mürin ewe afömanün chon läng a ettiki nöün rappwa. Iwe, eu leülüngatin ewe akkar a rochola, pwal eu leülüngatin ewe maram me eu leülüngatin ekewe fü, pwe eu leülüngatir resap chüen saram. Lerän esap wor saram lon ükükün rüanü awa, lepwin esap pwal wor saram lon ükükün rüanü awa. Ais 13.10; Is 37.7; Sow 2.10,31; 3.15
13 Mürin üa nenengeni o rongorong möngüngün eman ikel mi äkkäs tekiatä fän läng o a kökkö fän leüömong, “Feiengau, feiengau, feiengau ngeni chokewe meinisin mi nom won fanüfan lupwen ekewe ülüman chon läng repwe pwal ettiki en me nöün rappwa.”

8:3: Am 9.1; Eks 30.1,3

8:5: Lif 16.12; Is 10.2; Eks 19.16; Pwär 11.19; 16.18

8:7: Eks 9.23-25; Is 38.22

8:10: Ais 14.12

8:11: Jer 9.15

8:12: Ais 13.10; Is 37.7; Sow 2.10,31; 3.15