147
Kölün mwareiti Kot fän iten an aücheani Jerusalem
147.1-20
Ousipwe mwareiti ewe Samol mi Lapalap.
A fokun mürina ach sipwe kölün mwareiti ach we Kot.
A fich ngeni ach sipwe kölün mwareiti i.
Ewe Samol mi Lapalap a aüsefälietä Jerusalem,
a aliwinisefäli ekewe chon Israel mi oola.
A apöchöküla ir mi tatakis leluker
o filiti kinaser.
 
A apwüngala iteiten ekewe fü
o aita eföü me eföü ngeni itan.
Ach Samol a tekia o fokun manaman,
an mirit esap wor aükükün.
Ewe Samol mi Lapalap a atekiatä chokewe mi tekison,
nge a aturätiu ekewe aramasangau lepwül.
 
Oupwe köl ngeni ewe Samol mi Lapalap fän kilisou.
Oupwe köl ngeni ach we Kot fiti ükülele.
I a pwölüela ekewe läng ren kuchu
o apüngätiu üt won fanüfan,
a ämärätä fetil won ekewe chukuchukutä.
A ngeni ekewe man ener mongö
o amongöü ekewe apansüsün ängä mi tik.
10 Ewe Samol mi Lapalap esap sani pöchökülen oris,
esap pwal pwapwa ren pöchökülen aramas,
11 nge a pwapwa ren chokewe mi niuokusiti i,
ren chokewe mi eäni apilükülük an tong ellet.
 
12 Ämi chon Jerusalem, oupwe mwareiti ewe Samol mi Lapalap,
en Sion, kopwe mwareiti om Kot.
13 Pun i a apöchöküla lokkun asamalapom kewe
o afeiöchü noum kewe aramas mi nom reöm.
14 A awora kinamwe lon fanüom
o amongöü ngeni noum aramas chomong wiich mi mürina.
 
15 A tinato an allük won fanüfan,
an kapas a müttir säfetal.
16 A tinato sno mi pwech usun chök ülen sip
o amorafeili sno usun falang.
17 A amorätiu föün ais usun chari.
Iö a tongeni pwäk ngeni patapatan?
18 Kot a kapas, ewe ais a telila.
A föri pwe an asepwäl a enien, iwe, ekewe koluk ra pupula.
 
19 A aronga ngeni nöün aramas an kapas,
a ngeni chon Israel an kewe allük me pwüüng.
20 Ei sokun lapalap esap föri ngeni pwal eu mwü.
Ir resap silei an kewe allük.
Ousipwe mwareiti ewe Samol mi Lapalap.