118
Kilisou ren än Kot amanauakich
118.1-29
Oupwe kilisou ngeni ewe Samol mi Lapalap,
pun i a kirikiröch,
an tong ellet a nonom tori feilfeilachök. 1.Kron 16.34; 2.Kron 5.13; 7.3; Esr 3.11; Kölf 100.5; 106.1; 107.1; 136.1; Jer 33.11
Chon Israel repwe apasa,
“An tong ellet a nonom tori feilfeilachök.”
Ekewe mwirimwirin Aaron repwe apasa,
“An tong ellet a nonom tori feilfeilachök.”
Chokewe mi niuokusiti ewe Samol mi Lapalap repwe apasa,
“An tong ellet a nonom tori feilfeilachök.”
 
Üa kökköri ewe Samol mi Lapalap seni lon ai riaföü,
nge i a pälüeniei o angasaeila.
Üsap niuokus, pun ewe Samol mi Lapalap a nom rei.
Met aramas repwe tongeni föri ngeniei? Ipr 13.6
Ewe Samol mi Lapalap peniei me chon alisiei.
Üpwe küna pwe ekewe chon oputaei ra kuf.
A mürina ach sipwe anomu ach apilükülük won ewe Samol mi Lapalap,
lap seni ach sipwe anomu ach apilükülük won aramas.
A mürina ach sipwe anomu ach apilükülük won ewe Samol mi Lapalap,
lap seni ach sipwe anomu ach apilükülük won ekewe samol.
 
10 Chon ekewe mwü meinisin ra pwelieila,
nge ngang üa ärirela fän iten ewe Samol mi Lapalap.
11 Ra pweliela lepeki meinisin,
nge ngang üa ärirela fän iten ewe Samol mi Lapalap.
12 Ra rangeitiei usun achi,
nge ra karakai usun ekkei a kenala iräfölüföl.
Ngang üa ärirela fän iten ewe Samol mi Lapalap.
13 Ra tiiniei fän pöchökül pwe üpwe turula,
nge ewe Samol mi Lapalap a alisiei.
14 Ewe Samol mi Lapalap ai pöchökül me ai köl.
I ai Chon Amanau. Eks 15.2; Ais 12.2
15 Oupwe aüseling ngeni ekewe kölün pwapwan win lon imwen ekewe chon pwüng,
“Pöüifichin ewe Samol mi Lapalap a föri föförün pwora me win.
16 Pöüifichin ewe Samol mi Lapalap a aköüpöü,
pöüifichin ewe Samol mi Lapalap a föri föförün pwora me win.”
17 Üsap mäla, nge üpwe manau
o asilefeili än ewe Samol mi Lapalap kewe föför.
18 Ewe Samol mi Lapalap a fokun apwüngüei,
nge esap atolongaei lon mäla.
 
19 Oupwe suki ngeniei ekewe asamen imwenfel
pwe üpwe tolong lon o kilisou ngeni ewe Samol mi Lapalap.
20 Iei asamen ewe Samol mi Lapalap,
ekewe chon pwüng echök repwe tolong lon.
 
21 Üa kilisou ngonuk, pun ka pälüeni ai iotek,
ka pwal amanauaei.
 
22 Ewe fau ekewe chon kaü imw ra pöütala
a wiliti ewe föün lepwokuku mi fokun aüchea. Luk 20.17; Föf 4.11; 1.Pet 2.7
23 Iei än ewe Samol mi Lapalap we föför,
a fokun amwarar me fän mesach. Mat 21.42; Mark 12.10-11
24 Iei ewe rän ewe Samol mi Lapalap a föri,
ousipwe meseik o pwapwa lon.
25 Ai Samol mi Lapalap, äm aia tüngor ngonuk pwe kopwe amanauakem.
Ai Samol mi Lapalap, äm aia tüngor ngonuk pwe kopwe atufichikem. Mat 21.9; Mark 11.9; Joh 12.13
26 A feiöch ätewe mi feito fän iten ewe Samol mi Lapalap.
Äm aia afeiöchükemi seni lon imwen ewe Samol mi Lapalap. Mat 21.9; 23.39; Mark 11.9; Luk 13.35; 19.38; Joh 12.13
27 Ewe Samol mi Lapalap i Kot, a ngenikich saram.
Oupwe fötätä ewe mönün asoren chulap ren säl
ngeni ewe rongen asor tori mächän kewe.
 
28 En ai Kot, üpwe kilisou ngonuk.
En ai Kot, üpwe ingemwareituk.
29 Oupwe kilisou ngeni ewe Samol mi Lapalap, pun i a kirikiröch,
an tong ellet a nonom tori feilfeilachök.

118:1: 1.Kron 16.34; 2.Kron 5.13; 7.3; Esr 3.11; Kölf 100.5; 106.1; 107.1; 136.1; Jer 33.11

118:6: Ipr 13.6

118:14: Eks 15.2; Ais 12.2

118:22: Luk 20.17; Föf 4.11; 1.Pet 2.7

118:23: Mat 21.42; Mark 12.10-11

118:25: Mat 21.9; Mark 11.9; Joh 12.13

118:26: Mat 21.9; 23.39; Mark 11.9; Luk 13.35; 19.38; Joh 12.13