115
Kot me ekewe uluulun anümwäl
115.1-18
Ai Samol mi Lapalap, kopwe alingala itom,
nge sap item,
pokiten om tong ellet me om allükülük.
 
Pwota chon ekewe mwü repwe aisinikem,
“Ifa i ämi Kot?”
Ach Kot a nom lon läng,
i a chök föri mine a mochen.
Nge ar kewe uluulun anümwäl seni silifer me kolt
aramas chök ra föri.
A wor awer, nge resap tongeni kapas,
a wor meser, nge resap tongeni küneer.
A wor selinger, nge resap tongeni rongorong,
a wor pwötür,
nge resap tongeni titin.
A wor pöür, nge resap tongeni attap,
a wor pecher, nge resap tongeni fetal,
resap pwal tongeni möngüngü me lon chiorer.
Chokewe mi föri ekewe uluulun anümwäl o lüküür
repwe pwal wewe ngeni ekewe uluulun anümwäl. Kölf 135.15-18; Pwär 9.20
Ämi chon Israel, oupwe apilükülükü ewe Samol mi Lapalap.
I epwe alisikemi o epeti senikemi feiengau.
10 Ämi mwirimwirin Aaron, oupwe apilükülükü ewe Samol mi Lapalap.
I epwe alisikemi o epeti senikemi feiengau.
11 Ämi mi niuokusiti ewe Samol mi Lapalap, oupwe apilükülükü i.
I epwe alisikemi o epeti senikemi feiengau.
 
12 Ewe Samol mi Lapalap a chechemenikich,
i epwe afeiöchükich.
I epwe afeiöchü ekewe chon Israel me ekewe mwirimwirin Aaron.
13 Ewe Samol mi Lapalap epwe afeiöchü chokewe mi niuokusiti i,
ekewe aramas kis me ekewe aramas tekia. Pwär 11.18; 19.5
14 Amwo ewe Samol mi Lapalap epwe achomongakemiila
me mwirimwirimi kana.
15 Amwo oupwe feiöch me ren ewe Samol mi Lapalap,
ewe mi föri läng me fanüfan.
 
16 Ekewe läng än ewe Samol mi Lapalap echök,
nge fanüfan a ngeni aramas.
17 Ekewe somä resap mwareiti ewe Samol mi Lapalap,
usun chök chokewe mi feitiu lon lenien sotup.
18 Nge kich mi manau sipwe mwareiti ewe Samol mi Lapalap
seni ei fansoun tori feilfeilachök.
Ousipwe mwareiti ewe Samol mi Lapalap.

115:8: Kölf 135.15-18; Pwär 9.20

115:13: Pwär 11.18; 19.5