89
Än Kot pwon ngeni Tafit
89.1-52
Echö kölün kait än Etan eman mwirimwirin Esra.
Ai Samol mi Lapalap, üpwe kölü om tong ellet tori feilfeilachök.
Üpwe arongafeili om allükülük ngeni ekewe täppin aramas meinisin.
Üpwe pwärätä pwe om tong ellet a nomopos tori feilfeilachök,
pwe om allükülük a nüküchar usun ekewe läng.
En ka apasa, “Üa eäni eu pwon ngeni ätewe üa filätä,
üa pwon fän akapel ngeni Tafit nei we chon angang:
Üpwe föri pwe mwirimwirum kana repwe king tori feilfeilachök
o anüküchara mwum tori ekewe täppin aramas meinisin.” 2.Sam 7.12-16; 1.Kron 17.11-14; Kölf 132.11; Föf 2.30
Ai Samol mi Lapalap, ekewe läng repwe mwareiti om kewe manaman,
nge ewe mwichen chon pin kana repwe ingeiti om allükülük.
Pun esap wor eman lon läng mi wewe ngonuk en Samol mi Lapalap.
Esap wor eman me lein ekewe chon läng a usun chök en.
En ewe Kot ewe mwichen chon pin a niwelapeituk.
Ka kon eniwokus lap seni meinisin mi nom ünükumw.
 
Ai Samol mi Lapalap, en ewe Kot mi Unusen Manaman, iö a manaman usun en?
Ai Samol mi Lapalap, ka allükülük lon mettoch meinisin.
En ka nemeni ewe matau mi nono.
Lupwen ekewe no ra pwotä, en ka alüaar.
10 Ka atatakisi Rahap * Rahap a aliosunätä Isip pwe a usun chök eman mi ninnila,
ka atoropasa ekewe chon oputom ren poum mi manaman.
11 Ekewe läng om, ewe fanüfan pwal om.
En ka föri fanüfan me masouan meinisin.
12 En ka förätä efeng me ör.
Ekewe chuk Tapor me Hermon ra mwareituk fän pwapwa.
13 En ka fokun manaman.
Poum a pöchökül, pöüifichum a ititä.
14 Pwüng me apwüng longolongun mumw,
tong ellet me allükülük a pwä lon meinisin mine ka föri.
 
15 Ra feiöch ekewe aramas mi silei ewe kölün mwareituk,
ir mi fetal lon saramen won mesom, ai Samol mi Lapalap.
16 Repwe mwareituk iteiten rän
o ingeiti om pwüng.
17 En ar ling me ar pöchökül.
Ren om kirikiröch mökürem a chimwetä.
18 Pun ewe mi tümwünükich nöün ewe Samol mi Lapalap,
ach king nöün Ewe mi Pin lon Israel.
 
19 Me lom en ka kapas ngeni noum we chon angang mi allükülük lon künan o apasa,
“Üa alisi eman sounfiu mi pwora.
Üa seikätä eman alüal seni lein ekewe aramas.
20 Üa awisa nei we chon angang Tafit pwe epwe king.
Üa epiti ren ai lö mi pin. 1.Sam 13.14; Föf 13.22; 1.Sam 16.12
21 Üpwe alisi i fansoun meinisin,
ai manaman epwe apöchöküla.
22 Ekewe chon oputan resap tongeni pwora ngeni,
nge ekewe aramasangau resap tongeni akufu.
23 Üpwe atatakisi chokewe mi ü ngeni,
üpwe pwal niela chokewe mi oputa.
24 Ai allükülük me tong ellet epwe nom ren,
nge i epwe chimwätä möküran pokiten itei.
25 Ngang üpwe awisa pwe epwe nemeni ewe matau watte,
epwe pwal fokun nemeni ekewe chanpupu.
26 Iwe, epwe apasa ngeniei, ‘En semei me ai Kot,
en ewe chon tümwünüei me ai Chon Amanau.’
27 Üpwe filätä i pwe epwe nei mwänichi,
epwe tekia me lein ekewe kingen fanüfan. Pwär 1.5
28 Üpwe chök eäni ai tong ellet ngeni tori feilfeilachök,
nge ai pwon ngeni epwe nükünük.
29 Üpwe föri pwe mwirimwirin kana repwe king tori feilfeilachök,
nge mwün epwe nonom ükükün fansoun än ekewe läng nonom.
 
30 Nge are nöün kana resap aleasochis ngeni ai kewe allük,
resap pwal apwönüetä ai kewe pwüüng,
31 are repwe puri ai kewe allük
pwe resap tümwünüür,
32 mürin üpwe apwüngüür pokiten ar pupungau,
üpwe pwal ariaföüür pokiten ar tipis.
33 Nge üsap ükütiu le tongei Tafit,
üsap pwal föri pwe ai allükülük ngeni epwe mwäl.
34 Üsap atai ai pwon ngeni
ika siwili eu ai kewe kapas üa apasa ngeni.
 
35 Fän eu chök üa pwon fän akapel ren ai pin, nge üsap pwal apinisefäli.
Üsap chofana ngeni Tafit.
36 Epwe wor mwirimwirin Tafit tori feilfeilachök,
nge mwün epwe nonom mwei usun chök akkar a nom mwei.
37 Epwe chök nonom tori feilfeilachök usun ewe maram a nonom,
iei ewe pisekin pwärätä mi allükülük fän läng.”
 
38 Nge iei ka fokun song ngeni noum we mi kepit,
ka likitala o pöütala.
39 Ka atai om we pwon ngeni noum we chon angang,
ka asapwilätiu seni wisan wisen king.
40 Ka ataetiu tittin an telinimw meinisin
o atatakisi an kewe leni mi pöchökül.
41 Meinisin mi pwerela lükün ra soläni pisekin.
A küna turunufas me ren chon arun.
42 Ka fokun awinna chon ü ngeni,
ka föri pwe ekewe chon oputan meinisin ra pwapwa ren ar akufu.
43 Ewer, ka föri pwe nöün ketilas esap wor nian, kosap pwal alisi lon maun.
44 Ka angei seni lepöün wokun wokun king,
ka pwal aturätiu lepwül an lenien motun king.
45 Ka föri pwe a chinlapala, lupwen a chüen alüal,
o pwölüla ren säw.
 
46 Ai Samol mi Lapalap, ifa usun, kopwe aopok tori feilfeilachök?
Ifa ükükün fansoun om lingeringer epwe kü usun ekkei?
47 Ai Samol mi Lapalap, kopwe chechemeni pwe ränin manauei a mochomoch,
pun ka föri aramas meinisin pwe repwe chök mäla.
48 Ifa usun, meni aramas a tongeni manau, nge esap fokun mäla?
Iö a tongeni angasa manauan seni manamanen ewe lenien sotup?
 
49 Ai Samol, ia a nom ie om tong ellet ka eäni me lom,
ewe tong ka pwon fän akapel ngeni Tafit ren om allükülük?
50 Ai Samol, kopwe chechemeni usun ngang noum ei chon angang üa küna turunufas,
usun üa weires lon lelukei ren än chon ekewe mwü kapasen esit.
51 Ai Samol mi Lapalap, ekewe chon oputok ra turunufasei noum we king mi kepit,
ra turunufasei i ekis meinisin ia a fetal ie.
 
52 Ousipwe mwareiti ewe Samol mi Lapalap tori feilfeilachök!
Amen, Amen.

89:4: 2.Sam 7.12-16; 1.Kron 17.11-14; Kölf 132.11; Föf 2.30

*89:10: Rahap a aliosunätä Isip

89:20: 1.Sam 13.14; Föf 13.22; 1.Sam 16.12

89:27: Pwär 1.5