84
Positi imwen Kot
84.1-12
Ngeni ewe mi emweni chon köl: Won pisekin ettik itan Kitit. Echö köl än nöün Kora kewe mwän.
Ai Samol mi Unusen Manaman, üa fokun efich imwom.
Üa fokun positi ai üpwe nom lon imwen ewe Samol mi Lapalap,
ewer, üa aiengau ren.
Lelukei me inisi ra kölün pwapwa
ngeni ewe Kot mi manau.
 
Iwe, ewe nichok a küna lenian,
nge ewe ekiek a wor fasan
ia a tongeni anomu ie apanan,
ina usun üa küna leniei ünükün om kewe rongen asor,
ai Samol mi Unusen Manaman, ai king me ai Kot.
Ra feiöch ir mi nonom lon imwom,
ir mi kölün mwareituk fansoun meinisin.
 
Ra feiöch ekewe aramas mi angei ar pöchökül senuk.
Ra chök ekieki lon leluker ar repwe fetal won ekewe al ngeni Sion.
Lupwen ra pwerela lon ewe lemolun kechü mi pwasapwas,
ra awili ngeni eu lenien puächen koluk.
Pwal ewe ütten leefen a pwölüela ewe lemol ren feiöch.
Ra fetal o pöpöchökülela
tori repwe küna ewe Kot mi lap seni ekewe kot meinisin me lon Sion.
 
Ai Samol mi Lapalap, en ewe Kot mi Unusen Manaman,
kopwe aüselinga ai iotek, kopwe aü selingom, Maing än Jakop we Kot.
Ai Kot, kopwe afeiöchü äm king,
kopwe netiu won noum we mi kepit.
 
10 Pun ai nonom lon imwom lon ükükün eu chök rän
a mürina seni ai nonom ekis lon ükükün engeröü rän.
Üa efich ai üpwe nom lon asamalapen imwen ai Kot,
lap seni ai üpwe nonom lon imwen ekewe aramasangau.
11 Pun Kot ewe Samol mi Lapalap i ai saram, a apetiei seni ei feiengau.
A fangela ngenikich ümöümöch me iteüöch.
Ewe Samol mi Lapalap esap amwöchü och mi mürina
seni chokewe mi föri mine a pwüng.
12 Ai Samol mi Unusen Manaman, a feiöch ewe aramas mi lükü en.