74
Eu tüngor ngeni Kot pwe epwe ü ngeni chon oput nöün kana
74.1-23
Echö än Asaf kölün kait.
Ai Samol mi Lapalap, pwota ka pöütikeemila tori feilfeilachök?
Pwota ka chök sosong ngeni noum kewe aramas?
Kopwe chechemeni noum we mwichen aramas, ka filiir me lomlom,
chokewe ka angaseer pwe repwe chon om ainang.
Kopwe pwal chechemeni ewe chuk Sion, ia ka nonom ie me lom.
Kopwe fetal ngeni ekewe lemol imw mi tala seni me lomlom.
Ekewe chon oputom ra ataela meinisin mine a nom lon ewe imwenfel.
 
Chon palüenuk ra akürang lon leniom mi pin.
Ra aürätä ar filäik pwe asisilen ar win.
Ra wewe ngeni chon pöküpök irä
mi pökü irä lein wöllap ren ar kouk.
Ra äsätätiu ellingen won ekewe ettip mi rup meinisin
ren kouk mi watte me kükün.
Ra ataela imwom imwenfel o kenala,
ra apiningaua ewe leni ia aramas ra fel ngonuk ie.
Ra kapasfengen lefiler, “Sipwe aroserela meinisin.”
Iwe, ra kenala ekewe leni meinisin ia aramas ra fel ngeni Kot ie
me lon ewe fanü.
 
Ach kewe asisil mi pin meinisin rese chüen nom,
ese chüen wor eman soufos,
nge esap wor eman me leich a silei inet epwe ükütiu ei lapalap.
10 Ai Kot, ifa ükükün fansoun än ekewe chon oputakem repwe esitok?
Ifa usun, repwe turunufasei itom tori feilfeilachök?
11 Pwota kosap mochen alisikem?
Pwota ka uwala poum lükisökürum?
 
12 Nge ai Kot, en ai king seni me lomlom,
ka amanaua aramas won unusen fanüfan.
13 En ka kinifeseni ewe matau ren om manaman,
ka amökkü möküren ekewe trakon mi nom lematau. Eks 14.21
14 Ka atatakisi ekewe möküren ewe man itan Lefiatan * Lefiatan eman man mi fokun mwacho, a aliosunätä mine a ngau,
ka pwal aochocha fitukan ngeni ekewe mönün lon fanüapö. Hiop 41.1; Kölf 104.26; Ais 27.1
15 Ka amichätä puächen koluk me öüwö.
Nge ka apwasatä ekewe chanpupu mi pufochofoch.
16 En ka föri rän me pwin.
Ka anomu lon lenier maram me akkar.
17 Ka föri kiännin fanüfan,
ka pwal föri fansoun pwichikar me fansoun patapat.
 
18 Ai Samol mi Lapalap, kopwe chechemeni usun ekewe chon oputom ra esitok,
usun ekewe aramas mi umwes ra turunufasei itom.
19 Kosap likitala noum kewe aramas mi apwangapwang ngeni ekewe chon oputer mi fokun ingau,
kosap pwal manlükala noum aramas mi nom lon riaföü tori feilfeilachök.
 
20 Kopwe chechemeni om we pwon ka eäni ngenikem.
Pun föförün mwäneson a chök fifis lon ekewe leni mi kiroch me lon ewe fanü.
21 Kosap mwütätä pwe ekewe mi riaföü repwe säw.
Nge ekewe mi wöüngau me osupwang repwe mwareituk.
 
22 Ai Kot, kopwe ütä, kopwe püsin kapas fän itom,
kopwe chechemeni än ekewe aramas mi umwes esitok iteiten rän.
23 Kosap manlükala pupuchörün ekewe chon oputom
me akürangen ekewe chon ü ngonuk mi chök fifis ngonuk.

74:13: Eks 14.21

*74:14: Lefiatan eman man mi fokun mwacho, a aliosunätä mine a ngau

74:14: Hiop 41.1; Kölf 104.26; Ais 27.1