59
Eu iotekin tüngor ngasala seni chon oput
59.1-17
(1.Sam 19.11)
Ngeni ewe mi emweni chon köl: Ei köl usun ngingin ewe köl itan “Kosap ataela”. Echö än Tafit köl, lupwen Saul a tinala ekoch mwän pwe repwe operi imwan, pwe repwe niela.
Ai Kot, kopwe angasaeila seni ekewe chon oputaei,
kopwe tümwünüei seni chokewe mi ü ngeniei,
kopwe angasaeila seni ekewe chon föföringau
o amanauaei seni ekewe aramas mi chök mochen nimanauei aramas.
 
Nengeni, ra operiei pwe repwe nieila,
aramas mi fokun ngau ra mwichfengen o ü ngeniei.
Ei a fis ngeniei sap pokiten ai pupungau ika tipis, ai Samol mi Lapalap.
Üsap föri och mi mwäl,
nge ra chök amoleretä pwe repwe fiu ngeniei.
Kopwe ütä o alisiei, kopwe nenengeni ai osukosuk.
En Samol mi Unusen Manaman, en Koten Israel,
kopwe pwätä pwe kopwe apwüngü chon ekewe mwü meinisin.
Kosap eäni ümöümöch ngeni chokewe mi rawangauei aramas.
 
Iteiten lekuniol ra liwinito,
ra wörüwör usun ekewe kolak, lupwen ra aniffetal lon ewe telinimw.
Kapasen turunufas me kapasen eniweniw ra towu seni awer,
chönawer ra usun chök ketilas,
nge ra ekieki pwe esap wor eman a rongorong ar kapas.
 
Nge en, ai Samol mi Lapalap, ka takiriir,
ka ämängaua chon ekewe mwü meinisin.
En ai pöchökül, üa osukusukuk,
pun en ai Kot imwei imwen maun.
10 Ai Kot epwe feito rei fän an tong ellet,
ai Kot epwe föri pwe üpwe nenengeni än chon oputaei kuf.
 
11 Kosap nirela, pwe nei aramas resap manlükala mine ka föri ngeniir.
Kopwe atoropaseer ren om manaman o akufuur.
Ai Samol, en ka epeti senikem feiengau.
12 Pokiten kapasen awer ra chök tipis, repwe tup lon ar lamalamtekia.
Pokiten ar ottek me chofana,
13 kopwe aroserela lon om lingeringer,
kopwe aroserela tori resap chüen nom.
Mürin, aramas meinisin repwe silei pwe Kot a nemenem lon Israel,
pwal tori unusen fanüfan.
 
14 Iteiten lekuniol chon oputaei ra liwinto,
ra wörüwör usun ekewe kolak, lupwen ra aniffetal lon ewe telinimw.
15 Ra küttafetal ener mongö
o ngüngü, lupwen resap möt.
 
16 Nge ngang üpwe köl usun om manaman.
Iteiten lesosor üpwe köl fän leüömong usun om tong ellet.
Pun en ka wewe ngeni eu imwen maun me rei,
pwal eu lenien op lon ränin ai riaföü.
17 En ai pöchökül, üpwe kölün mwareituk,
pun en ai Kot imwei imwen maun.
En ewe Kot mi tongeei.