56
Eu iotek fän apilükülük
56.1-13
(1.Sam 21.13-15)
Ngeni ewe mi emweni chon köl: Ei köl usun ngingin ewe köl itan “Ewe lisom won ekewe irä terepin mi toau”. Echö än Tafit köl, lupwen ekewe chon Filistia ra turufi me lon Kat.
1 Ai Kot, kopwe ümöümöch ngeniei,
pun aramas ra chök tatapweriei.
Ekewe chon oputaei ra ariaföüüei fansoun meinisin.
2 Chon ü ngeniei ra tapweriei iteiten rän.
Chomong ra fiu ngeniei fän ar lamalamtekia.
3 Lupwen üa niuokus,
üa chök isetä ai apilükülük womw.
4 Üa mwareiti än Kot kapas,
üa apilükülükü Kot, nge üsap niuokus.
Met aramas repwe tongeni föri ngeniei?
5 Chon oputaei ra sorei mine üa apasa fansoun meinisin,
ra chök ekiekietä met repwe afeiengauaei ren.
6 Ra amwichafengeniir,
ra operiei
o mamasafetaleei
pwe repwe nieila.
7 Iei mine kopwe liwini ngeniir ar föföringau.
Ai Kot, kopwe akufu ekei aramas fän om lingeringer.
8 En ka küna ai süsüfeil.
Kopwe osupwalong chönün mesei lon om rume.
Ifa usun, kosap aleaniir?
9 Lon ewe rän, lupwen üpwe köruk pwe kopwe alisiei,
ekewe chon oputaei repwe kul seniei.
Ren ei üa silei pwe Kot a peniei.
10 Üa mwareiti än Kot kapas,
üa mwareiti än ewe Samol mi Lapalap kapas.
11 Üa apilükülükü Kot, nge üsap niuokus.
Met aramas repwe tongeni föri ngeniei?
12 Ai Kot, üpwe apwönüetä ai kewe pwon ngonuk.
Üpwe eäni asoren kilisou ngonuk,
13 pun ka angasa manauei seni mäla.
Ewer, ka amwöchü pechei pwe üsap mit,
pwe üpwe fetal fän mesen Kot lon ewe saram mi atoto manau.