39
Manauen aramas a mochomoch
39.1-13
Ngeni ewe mi emweni chon köl: ngeni Jetutun. Echö än Tafit köl.
Üa apasa, “Üpwe püsin tümwünüei ren mine üa föri,
üsap pwal mwüt ngeni chönawei pwe epwe apasa och mine üa tipis ren.
Üpwe pinei awei
lon ükükün fansoun än ekewe aramasangau nom rei.”
Üa mosonoson o fanafanala,
üsap mwo nge apasa och mi mürina.
Nge ai riaföü a chök wattela.
Üa fokun lolilen.
Iwe, lupwen üa ekinlon,
ai riaföü a chök lapala.
Mürin, üa kapas.
 
“Ai Samol mi Lapalap, kopwe asile ngeniei sopolan manauei,
pwal ükükün langatamen ränin manauei.
Kopwe asile ngeniei müttirin än manauei sü seniei.
Nengeni, ka föri pwe tamen ränin manauei ra chök usun tamen
ekoch chöchön lon pau.
Fansoun manauei a usun chök nge esor me fän mesom.
Ellet, iteiten aramas mi nom won ei fanüfan ra usun chök eu enienin asepwäl.
Ellet, aramas ra usun chök ngünüen mettoch.
Meinisin mine ra anganga esap wor lomotan.
Aramas ra achukuchukätä wöür, nge resap silei iö epwe angei me mürin.
 
Ai Samol, met üpwe tongeni ösüküsükü iei?
Ai apilükülük a nom womw.
Kopwe amanauaei seni ai tipis meinisin.
Kosap mwüt ngeni ekewe chon umwes pwe repwe turunufaseei.
Üa fanafanala, üsap tongeni kapas,
pun en ewe mi atolongaei lon ei riaföü.
10 Kose mochen kosap chüen ninniei.
Üa arap ngeni mäla ren om wichiei.
11 Lupwen ka apwüngü eman aramas ren om fönöü pokiten an tipis,
ka ataela mettochun meinisin mi aüchea ngeni, usun pwötür ra enala mettoch.
Ellet, iteiten aramas ra usun chök eu enienin asepwäl.
 
12 Ai Samol mi Lapalap, kopwe aüselinga ai iotek,
kopwe aü selingom ngeni ai siö.
Kosap fanafanala, lupwen üa kechü.
Pun ngang üa chök eman wasöla reöm,
üa eman chon siamü usun ai kewe lewo meinisin.
13 Kopwe nenne seniei pwe üpwe tongeni pwapwa
me mwen ai üpwe mäla, nge üsap chüen nom.”