26
Än eman aramas mi pwüng iotek
26.1-12
Echö än Tafit köl.
Ai Samol mi Lapalap, kopwe aletätä ai pwüng,
pun üa föri mine a pwüng,
üa apilükülükuk, nge üsap mwökütüküt.
Kopwe atitinaei, ai Samol mi Lapalap, o sotuniei,
kopwe sotuni mochenin lelukei me ai ekiek.
Pun om tong ellet a nom mwei,
om allükülük a emweniei.
 
Üsap nom ren aramas mi chofana,
üsap pwal chiechi ngeni chon likatuputup.
Üa oput ewe mwichen chon föföringau,
nge üsap nom ren ekewe aramasangau.
 
Ai Samol mi Lapalap, üa talü pei pwe asisilen ai limelimöch
o pwelifeili om rongen asor,
Üa eäni echö kölün kilisou fän leüömong
o apworausa om kewe föför meinisin mi amwarar.
 
Ai Samol mi Lapalap, üa echeni imwom ewe ia ka nonom ie,
ewe leni ia lingom a nonom ie.
Kosap nieila fitifengen me ekewe chon tipis,
kosap angei manauei fitifengen me chon nimanauei aramas,
10 ätekewe mi föri föför mi ngau fansoun meinisin,
ra pwal pwapwa le angei lifangen amichimich.
 
11 Nge ngang won inisi üa föri mine a pwüng,
kopwe ümöümöch ngeniei o amanauaei.
12 Üa nom won sonomaw.
Üpwe mwareiti ewe Samol mi Lapalap
lon ewe mwich mi lap.