10
Eu iotek pwe aramasangau repwe kuf
10.1-18
Ai Samol mi Lapalap, pwota ka chök ütä me toau?
Pwota ka okopola lupwen äm nom lon riaföü?
Ekewe aramasangau ra ariaföüü ekewe chon wöüngau fän lamalamtekia.
Kopwe föri pwe repwe oo lon ekewe ekiekingau ra püsin ekiekitä.
 
Ewe aramasangau a sikäsini mochenin lelukan,
nge ewe aramas mi mochenian win a otteki o pöütala ewe Samol mi Lapalap.
Ewe aramasangau esap kütta Kot.
Lon an lamalamtekia a chök ekieki pwe esap wor Kot.
 
Än ewe aramasangau kewe föför meinisin ra chök fisiöch fansoun meinisin.
Esap weweiti om kewe allük,
nge a chök esita chon oputan.
Iwe, a ekieki lon lelukan, “Üsap tongeni mwökütütküt.
Üpwe pwapwa fansoun meinisin, nge üsap tolong lon osupwang.”
 
An kapas a uren ottek, atuputup me eniweniw,
a müttir le apasawu kapasen oput me kapas mi ngau. Rom 3.14
A op lon ekewe sop
o awiti ekewe aramas esap wor ar tipis pwe epwe nirela.
Iwe, a aköürü ekewe chon mwelele,
a witiwit lon an lenien op usun eman laion.
A öüröürela pwe epwe turufi ekewe chon wöüngau.
A liapeniir me lon an we sär o etekinirela.
 
10 Iwe, ewe chon mwelele a kawet,
a mwörürütiu o turula ren pöchökülen ewe aramasangau.
11 Nge ewe aramasangau a ekieki lon lelukan,
“Kot esap ekieki usun, a aopala mesan pwe esap fokun künaei.”
 
12 Ai Samol mi Lapalap, kopwe apwüngü ekei aramasangau.
Kosap manlükala chokewe mi nom lon riaföü.
13 Pwota ewe aramasangau a turunufasei Kot o ekieki lon lelukan,
“Kot esap apwüngüei.”
 
14 Nge en ka küna, ewer, ka silei ewe osupwang me riaföü,
ka pwal amolätä om kopwe alilis.
Ewe chon mwelele a atolonga püsin i lepoum,
en ewe ka alisi ekewe mi mäsen fansoun meinisin.
 
15 Kopwe kupi pöchökülen ewe aramasangau me ewe chon föföringau.
Kopwe aunusa ngeniir liwinin ar föföringau
tori resap chüen försefäli.
 
16 Ewe Samol mi Lapalap i king tori feilfeilachök.
Chon ekewe mwü repwe rosola seni fanüan.
 
17 Ai Samol mi Lapalap, kopwe rong än ekewe mi riaföü tüngor,
kopwe apöchöküla leluker
o aü selingom ngeni ar siö.
18 Kopwe peni ekewe mi mäsen me ekewe mi riaföü,
pwe aramas mi pop seni fanüfan resap chüen eniwokusu eman.

10:7: Rom 3.14