20
Eman mi ünümong wain a eäni kapas turunufas, nge eman mi ün sakau mi pwichikar a arükak. Chokewe meinisin mi pulas ra tiparoch. Än eman king lingeringer a usun chök wörüwörün eman laion, nge eman mi asonga a püsin afeiengaua manauan. Eman aramas a iteüöch ren an esap atolonga lon fitikoko, nge ekewe chon tiparoch ra müttir anini. Eman chon chipwang esap tuw pwül lon fansoun fich, epwe kütta anan mongö lon fansoun räs, nge esap künakün. Ekiekin letipen eman aramas a usun chök koluk mi alolol, nge eman aramas mi weweöch a tongeni üfiretä. Chomong aramas ra apasa usun püsin ir pwe ra eäni kirikiröch. Nge iö a tongeni küna eman mi wesewesen allükülük? Eman mi wenechar o föri mine a pwüng, nöün kana ra feiöch. Eman king mi mot won an lenien mot o eäni kapwüng a tongeni asila mine a ngau, lupwen a küna. Iö a tongeni apasa, “Üa limeti lelukei, üa limöch seni ai tipis kana?” 10 Ewe Samol mi Lapalap a oput aramas mi eäni ruu sokun föün kilo me ruu sokun aükük. 11 Pwal lapalapen manauen eman semirit a pwä ren an föför, ika a limöch o pwüng lon mine a föri. 12 Ewe Samol mi Lapalap a föri selingach pwe sipwe tongeni rongorong, me mesach pwe sipwe tongeni künakün. 13 Kosap sani mömöür pwe kosap wöüngauala, kopwe nennela o angang pwe epwe wor anom mongö mi somwola. 14 Ewe chon kamö a lalapat fansoun meinisin pwe liwinin ewe mettoch a kon watte, nge lupwen a feila ekis, a sikesik won mine a möni pwe a kisikis liwinin. 15 Mi wor kolt me chomong fau aüchea, nge kapasen silelap eföü fau mi wesewesen aüchea. 16 Kopwe angei üfen ätewe mi pwon pwe epwe mönätiu än eman wasöla liwinimang, kopwe amwöchü pwe asisilen an pwon ngeni eman chon ekis. 17 Eman aramas a angei anan mongö fän atuputup a annö ngeni, nge mürin, ewe möngö epwe usun chök chari me lon awan. 18 Kopwe föri om akot wesin om angei öüröürom. Are kopwe feila maun, kopwe akomwen angei om öüröür. 19 Eman aramas mi luapas a pwärätä mine a monomon, iei mine kosap chiechi ngeni eman mi kapas chomong. 20 Eman aramas mi otteki saman ika inan epwe mäla usun eu lamp a kunula lupwen fansoun rochokich. 21 Eman aramas mi angakaii wöün me won saman esap feiöch sopolan. 22 Kosap apasa pwe kopwe liwini ngeni eman chappen an föför mi ngau. Kopwe witiwit ngeni ewe Samol mi Lapalap, i epwe alisuk. 23 Ewe Samol mi Lapalap a oput aramas mi eäni ruu sokun föün kilo, nge eu kilo mi mwäl a ngau me ren. 24 Ewe Samol mi Lapalap a akota än eman aramas fetal. Ifa usun än eman aramas epwe tongeni weweiti ewe al a fetal won? 25 Kopwe ekiekifichi me mwen om kopwe pwon ngeni Kot och asor. A tongeni fis pwe kopwe liamam me mürin. 26 Eman king mi tipachem a tongeni asila iö a föri mine a ngau. Epwe apwüngü ekewe aramasangau, nge esap eäni tong. 27 Ngünün eman aramas a usun chök eu lamp seni ewe Samol mi Lapalap, a atittina minen leutuch meinisin. 28 Eman king epwe nonom lon wisan lon ükükün fansoun a nemenem fän wenechar, pwüng me kirikiröch. 29 Aramas ra ingeiti pöchökülen alüal o meniniti ekewe mi pwechepwech mökürer. 30 Wichiwich me kinas ra limetawu mine a ngau, nge kawet a limeti minen leutuch.