5
Kapasen fön ngeni chon mocheisou
5.1-23
Nei, kopwe fokun aüselinga ai tipachem, kopwe aü selingom ngeni ai kapasen öüröür, pwe kopwe eäni mirit, nge om kapas repwe pwärätä pwe a wor om silelap. Pun än eman fin lisowu fos a arar usun chönün chunen, kapasen awan a pwal motoutou usun noppuk, nge sopolan a kipwin usun chök kipwinin ewe irä maras, a pwal wor ekinasean usun chök ekinasaen efoch ketilas mi seisei me ruepek. Ewe al neminewe a fetal won a ale ngeni mäla, epwe emwenukela ngeni ewe lenien sotup. Esap fetal won ewe al mi ale ngeni manau, pwe a rik seni, nge esap mefi.
Nge iei nei, kopwe aüselingaei, kosap fokun manlükala mine üa ürenuk. Kopwe sü seni ena sokun fefin, kosap pwal kan ngeni asamen imwan. Are kosap aüselingaei, om iteüöch epwe pöüt senuk, nge epwe tori pwal ekoch aramas, pwal manauom epwe tolong lepöün chokewe resap eäni tong, 10 ekewe chon ekis repwe angei woum, nge uän om angang epwe pwal tori ekoch. 11 Iwe, lesopolan manauom kopwe ngüngü, lupwen fitukom me inisum ra telila. 12 Mürin kopwe apasa, “Pwota üa oput ekewe kapasen fön? Pwota üa tipeweires ngeni ekewe kapasen emirit? 13 Üsap aüselinga alon nei kewe sense, üsap pwal aü selingei ngeni chokewe mi öüröüraei. 14 Üa arapakan ngeni ai üpwe unusen feiengau me fän mesen ewe mwichen aramas.”
15 Kopwe allükülük won püsin pwülüom, kopwe chök echeni i. 16 Kosap angei om feiöch seni noum me won pwal ekoch fefin. 17 Püsin noum kewe repwe mämäritä o alisuk, nge sap chon ekis. 18 Kopwe pwapwaiti pwülüom o meseikeiti ewe föpwül ka pwülüeni lupwen om alüal, 19 neminewe mi liöch usun chök liöchün urupap, a mürina usun ewe machang itan witiwit. Kopwe mwüt ngeni pwe an tong ngonuk epwe fokun apwapwok fansoun meinisin, kopwe chengel ren an tong iteiten fansoun. 20 Nei, pwota kopwe aumwesukela won pwülüen pwal eman mwän? Pwota kopwe romi eman fin ekis? 21 Ewe Samol mi Lapalap a küna om föför meinisin, a nenengeni ia ka feila ie. 22 Än ewe aramasangau föföringau ra püsin likatupu i, a oo lon püsin an tipis. 23 Epwe mäla pokiten esap mochen aleasochisi kapasen emirit, epwe pöütmälila pokiten watten an umwes.