Opataia
Kapas akom
I. Iten ei puk: Opataia, pun mine a mak lon, an kapasen osuni. Wewen ei it Opataia: Nöün ewe Samol mi Lapalap chon angang, ika eman mi fel ngeni ewe Samol mi Lapalap.
II. Chon makei ei puk: Opataia
III. Itelapemongen ei puk: Lamalamtekia a akom mwen feiengau, nge tunosikesik a akom mwen än eman tur.
IV. Kapas aüchean ei puk: Kot a pwüng o allükülük, epwe aliwini ewe fanüen pwon ngeni chon Israel o apwüngü ir mi ü ngeni nöün aramas.
V. Masouen ei puk Opataia: Ese kon nien fat lon meni fansoun ei kükün puk a mak. Eli a mak mürin än Jerusalem tala lon ewe ier 586 mwen Kraist (B.C.), lupwen chon Etom ra pwapwaäsini talan Jerusalem. Chon Etom, fanüer a nom ötiuörün ewe fanü Juta, ra oput chon Israel seni chök me lomlom. Nge iei resap chök pwapwaäsini talan Jerusalem, nge ra pwal alisi chon Papilon le soläni pisekin chon Juta. Opataia a osuni pwe Kot epwe apwüngü o akufu chon Etom fiti chon ekewe ekoch mwü mi oput chon Israel.
VI. Tettelin masouen ei puk:
Kapasen osuni usun än Kot epwe apwüngü Etom 1.1-9
Popun än Kot apwüngü Etom 1.10-16
Kapasen osuni usun än Kot epwe afeiöchüsefäli chon Israel 1.17-21
1
Kot a atekisonätiu chon Etom
1-16
1 Iei osunien Opataia ren met Kot ewe Samol mi Lapalap a apasa usun Etom.
Sa rong ekewe pworaus seni ewe Samol mi Lapalap.
Eman chon künö a fen titila lemenen ekewe mwü o apasa,
“Oupwe amolakemiitä. Ousipwe maun ngeni Etom.”
2 Ewe Samol mi Lapalap a üreni Etom,
“Üpwe akisuketiu me lein ekewe mwü.
Kopwe fokun küna koput.
3 Lamalamtekian lelukom a atupuketä,
en ewe mi nom lon ekewe föimw,
ka nom won ekewe leni mi tekia
o ekieki lon lelukom,
‘Iö epwe tongeni aturueitiu lepwül?’
4 Ika mwo ka föri imwom wilitekia
usun eman ikel a fas won leni tekia,
pwe ka usun chök nge ka nom lein ekewe fü,
nge üpwe chök aturuketiu me ikenan.
Ngang ewe Samol mi Lapalap üa kapas.
5 Iwe, are chon solä me chon angei pisek fän pöchökül repwe tori imwom lepwin,
repwe chök angei ükükün mine ra mochen.
Pwal ika chon ionifengeni föün irän wain repwe toruk,
repwe pwal likiti ekoch föün.
Nge chon oputom ra fokun apöpökowu.
6 Ra silini än mwirimwirin Esau lenien iseis o soläni ar pisek mi aüchea.
7 Iwe, peliom meinisin ra atupuketä
o asuukela seni fanüom.
Ekewe chon pwipwi ngonuk ra maun ngonuk,
nge chienom kewe ka lükuur ra anomu eu sär fomw.
Ra apasa usum, ‘Ifa chök an tipachem?’
8 Lon ewe ränin, lupwen üpwe apwüngü chon Etom,
üpwe arosala nöür kewe soutipachem o awesi ar mirit.
9 Iwe, ekewe sounfiu mi pwora seni Teman repwe rükö,
nge aramas meinisin lon Etom repwe kärila.
10 Pokiten ewe angangen mwänewüs ka föri
ngeni pwiüm kewe mwirimwirin Jakop,
kopwe kärila o itengau tori feilfeilachök.
11 Lon ewe ränin, lupwen chon ekis ra tolong lon asamalapen Jerusalem,
en ka chök ütä.
Lupwen ra uwala wöün pwe repwe üttüt won o ineti lefiler,
en ka chök usun eman leir.
12 Nge en, esap öch om tuneämängau
won pwiüm kewe chon Juta lon ränin ar weires,
esap öch om meseik wor lon ränin ar feiengau,
esap pwal öch om tunesikesik lon ränin ar riaföü.
13 Esap öch om tolong lon än nei kewe aramas we telinimw,
pwe kopwe tuneämängau won ar riaföü
o soläni pisekir lon ränin ar feiengau.
14 Esap öch om ütä lepukopuken ekewe al,
pwe kopwe turufi ekewe chon Juta mi süla,
esap pwal öch om afangamäi ekewe mi chüen manau
lon ränin ar riaföü. ✡ Ais 34.5-17; Jer 49.7-22; Is 25.12-14; 35.1-15; Am 1.11-12; Mal 1.2-5
15 Iwe, ewe ränin kapwüng a arapoto, lupwen ngang ewe Samol mi Lapalap
üpwe apwüngü chon ekewe mwü meinisin.
Usun mine en Etom ka föri,
iei usun epwe pwal fis ngonuk.
Kopwe chök angei chappen om föför.
16 Iwe, usun nei aramas ra ün seni ewe kapen feiengau
me won chuki mi pin,
iei usun chon ekewe mwü meinisin mi nom ünüküür repwe ün.
Repwe ükün o tokorikirik,
repwe pwal mochola.”
Kot a atekiatä chon Israel
17-21
17 “Nge chokewe mi chüen manau me lein chon Israel repwe nom won ewe chuk Sion.
Iwe, ewe chuk epwe eu leni mi pin,
nge ekewe mwirimwirin Jakop
repwe fanüeni püsin fanüer.
18 Iwe, ekewe mwirimwirin Jakop repwe wewe ngeni eu ekkei,
ekewe mwirimwirin Josef repwe wewe ngeni pulopulen ekkei,
nge ekewe mwirimwirin Esau repwe wewe ngeni fetilipwas.
Repwe arosala ekewe mwirimwirin Esau,
pwe esap chüen wor eman epwe manau.
Ngang ewe Samol mi Lapalap üa kapas.
19 Iwe, ekewe aramas seni ewe fanü Nekep mi nom ör repwe fanüeni ewe fanü Etom,
nge chokewe seni ewe fanü Sefela mi nom lotou repwe fanüeni fanüen chon Filistia.
Chon Israel repwe fanüeni ewe fanü Efraim me Samaria,
nge aramasen Peniamin repwe fanüeni Kiliat.
20 Ekewe sounfiu seni Israel mi oola
repwe liwinto o fanüeni Kanaan tori Sarefat,
nge ekewe chon oola seni Jerusalem mi nom Sefarat
repwe telinimweni ekewe telinimw lon ewe fanü Nekep.
21 Iwe, ekewe chon pwora seni Jerusalem
repwe maun ngeni Etom o nemeni.
Nge püsin ewe Samol mi Lapalap epwe king.”