36
Allük usun apwüpwülüen ekewe fefin mi tongeni fafanü fanü
36.1-13
Iwe, ekewe mwänirela seni ekewe familien än Kiliat cho, nge Kiliat nöün Makir, nge Makir nöün Manasa, nge Manasa nöün Josef we mwän ra feito o kapas fän mesen Moses me ekewe souemwen, ir mwänirelan än ekewe aramasen Israel famili. Iwe, ra üra, “Ewe Samol mi Lapalap a allük ngonuk, en äm samol, pwe kopwe ineti ewe fanü ren üttüt ngeni ekewe aramasen Israel pwe repwe fanüeni. A pwal allük ngonuk pwe ewe fanü inetin Selofehat pwim we kopwe ngeni nöün kewe fefin. Num 27.7 Nge are ir ra pwüpwülü ngeni mwän seni pwal eu kewe ainangen Israel, inetir fanü epwe imwü seni inetin semelapem kewe o pach ngeni inetin ewe ainang ra pwüpwülülong lon. Iei usun ewe fanü epwe imwü seni kinikinin inetim. Nge lupwen a tori än ekewe aramasen Israel ierin supili, inetir fanü epwe chök pach ngeni inetin ewe ainang ra pwüpwülülong lon. Iwe, inetir fanü epwe wesewesen imwü seni inetin ainangen semelapem kewe.”
Mürin, Moses a ngeni ekewe aramasen Israel ekei allük seni ewe Samol mi Lapalap o üreniir, “A pwüng mine chon ewe ainangen mwirimwirin Josef ra apasa. Iei usun mine ewe Samol mi Lapalap a allük fän iten nöün Selofehat kewe fefin: Repwe tongeni pwülüeni iö ra sani, nge repwe chök pwüpwülülong lon familien än semer ainang. Iwe, inetin ekewe aramasen Israel fanü esap tongeni amwet seni eu ainang ngeni pwal eu ainang. Pun iteiten eman me eman seni ekewe aramasen Israel epwe kamwöchüla won inetin än saman ainang. Nge iteiten fefin mi fafanü me lon eu ainang seni lon ekewe ainangen Israel epwe pwülüeni eman mwän seni ainangen saman. Iei usun eman me eman me lein ekewe aramasen Israel epwe fanüeni inetin me won saman. Iwe, esap tufich pwe inetin eman fanü epwe amwet seni eu ainang ngeni pwal eu ainang. Pun iteiten eu me eu kewe ainangen Israel epwe kamwöchüla won püsin inetin fanü.”
10 Iwe, nöün Selofehat kewe fefin ra föri usun mine ewe Samol mi Lapalap a allük ngeni Moses. 11 Pun Mala, Tirsa, Hokla, Milka me Noa ra pwüpwülü ngeni nöün pwin semer mwän. 12 Ra pwüpwülülong lon än ewe ainangen Manasa cho, nge Manasa nöün Josef we mwän. Iwe, inetir fanü a chök nomotiu lon än semer ainang.
13 Ikkei ekewe allük me pwüng ewe Samol mi Lapalap a allük ngeni Moses fän iten ekewe aramasen Israel, lupwen ra nom lon ekewe maasiesin Moap arun ewe chanpupu Jortan sasape ngeni Jeriko.

36:2: Num 27.7