18
Wisen me inetin ekewe souasor me ekewe mwän seni ewe ainangen Lefi
18.1-32
Iwe, ewe Samol mi Lapalap a üreni Aaron, “Ämi me noum kewe mwän pwal chon än semom ainang oupwe mwärelong fän ekewe pupungau mi fis ngeni ewe imw mi pin. Nge ämi me noum kewe mwän oupwe pwal mwärelong fän pupungauen wisemi wisen souasor. Iwe, kopwe pwal emwenato pwiüm kewe chon ewe ainangen Lefi, repwe etuk o alisuk, lupwen ämi me noum kewe mwän oua föri ämi angang lon ewe imwenfel seni mangaku. Iwe, ir repwe angang ngonuk o föri sokun angangen ewe imwenfel seni mangaku. Nge resap kan ngeni pisekin ewe imw mi pin ika ngeni ewe rongen asor pwe ämi me ir ousap mäla. Iwe, repwe etuk le föri angangen ewe imwenfel seni mangaku me sokun angangen lon meinisin. Nge esap wor eman lükür epwe etikemi lon ewe angang. Nge ämi me noum kewe oupwe föri angangen lon ewe imwenfel seni mangaku me angangen ewe rongen asor, pwe esap chüen fis ai song won ekewe aramasen Israel. Ngang püsin üa filätä pwimi kewe chon ewe ainangen Lefi seni lein ekewe aramasen Israel pwe eu lifang ngenikemi. Ir ra imwüla fän itei pwe repwe föri angangen ewe imwenfel seni mangaku. Nge ämi chök me noum kewe mwän oupwe föri angangen wisen souasor won ewe rongen asor, pwal angangen lon ewe rumw mi unusen pin. Iei wisemi, pun üa lifang ngenikemi ewe wisen souasor. Nge are eman me lükün epwe kan ngeni ewe imw mi pin, epwe ninnila.”
Mürin, ewe Samol mi Lapalap a üreni Aaron, “Ngang püsin üa ngenikemi mine a imwüla seni ekewe asor ra eäni asor ngeniei. Mettoch meinisin mine ekewe aramasen Israel ra apini, üa ngenikemi me noum kewe mwän pwe inetimi tori feilfeilachök. Ämi oupwe eni ewe kinikin esap kekila seni ekewe asor mi unusen pin. Seni ekewe lifang meinisin aramas ra uwato rei pwe eu asor mi unusen pin, ese lifilifil ika asoren mongö, ika asoren tipis, ika asoren pupungau, ekei kinikin repwe fän itemi me noum kewe mwän. 10 Oupwe mongö ekei asor lon eu leni mi unusen pin. Iteiten mwän a tongeni mongö seniir. Oupwe chechemeni pwe ra pin fän itemi. 11 Pwal iei inetimi: Än ekewe aramasen Israel lifang ra eäni asor, pwal ar kewe asoren assaw meinisin. Ekei asor üa ngenikemi me noum kewe mwän me fefin, pwe inetimi tori feilfeilachök. Iteiten ir mi limöch me lein chon leimwom repwe tongeni mongö seni. 12 Üa pwal ngenikemi öchün apüra me öchün wain meinisin, pwal öchün föün wiich meinisin aramas ra fang ngeniei pwe ar mwen ua. 13 Iwe, mwen uän irä meinisin mi mär won fanüer ra uwato rei repwe enemi. Iteiten ir mi limöch me lein chon leimwom repwe tongeni mongö seni. 14 Iteiten mettoch meinisin aramas ra apini fän itei me lon Israel repwe om. Lif 27.28 15 Meinisin mine a akomwen uputiu me lein aramas ika man chon Israel ra eäni asor ngeniei repwe noum. Nge mwänichien aramas repwe liwini ngonuk won moni pwal usun chök mweinöün man mi limengau. 16 Iwe, ren ekewe mwänichi repwe möni ngonuk, lupwen repwe eu maram, nge ükükün mör epwe limeföü föün silifer mi för won ewe kilo ra aea le aükük lon ewe imw mi pin. 17 Nge mweinöün eman kow ika sip ika kuuch resap tongeni möni ngonuk, pun ra pin. Kopwe äsupu char ngeni won ewe rongen asor o kenala kirisir pwe eu asor üa efich pwoon. 18 Nge fituker ochom, usun chök ewe leup seni ewe asor mi assaw me ewe pelifichin pechen pwal ochom. 19 Iwe, ekewe asor mi pin meinisin ekewe aramasen Israel ra asor ngeniei ngang üa ngenikemi me noum kewe mwän me fefin pwe inetimi tori feilfeilachök. Iei eu pwon esap tongeni tala * lon kapasen Ipru: eu pwonen salt tori feilfeilachök, üa föri ngenikemi me mwirimwirum kana.” 20 Iwe, ewe Samol mi Lapalap a pwal üreni Aaron, “Kosap fanüeni eu fanü me lon Israel, esap pwal wor inetum me leir. Pun ngang inetum me wisom me lein ekewe aramasen Israel.
21 Iwe, üa ngeni chon ewe ainangen Lefi än chon Israel leengol meinisin ra uwato rei, pwe wiser fän iten ar angang lon ewe imwenfel seni mangaku. Lif 27.30-33; Tut 14.22-29 22 Ekewe aramasen Israel resap chüen kanoto ren ewe imwenfel seni mangaku, pwe resap tipis o mäla. 23 Nge chon ewe ainangen Lefi repwe föri angangen ewe imwenfel seni mangaku o wisen tümwünü seni sokun limengau. Ei epwe eu allük tori feilfeilachök seni eu täppin aramas tori eu täppin. Iwe, esap pwal wor wisen chon ewe ainangen Lefi fanü me lein ekewe aramasen Israel. 24 Pun än ekewe aramasen Israel leengol ra eäni asor ngeniei üa ngeni chon ewe ainangen Lefi pwe wiser. Iei popun üa üreniir pwe esap wor wiser fanü me lein ekewe aramasen Israel.”
25 Iwe, ewe Samol mi Lapalap a kapas ngeni Moses, 26 “Kopwe pwal üreni chon ewe ainangen Lefi: Lupwen oupwe angei seni ekewe aramasen Israel ewe leengol ewe Samol mi Lapalap a ngenikemi pwe wisemi, ämi oupwe pwal eäni asor ngeni ewe Samol mi Lapalap eu leengol seni ewe leengol oua angei. 27 Ren ämi eäni ekewe asoren leengol, oua usun chök chon Israel mi eäni asor eu leengol seni ar föün wiich me ar wain. 28 Iei usun pwal ämi oupwe eäni asor ngeni ewe Samol mi Lapalap seni ämi leengol meinisin oua angei seni ekewe aramasen Israel. Iwe, oupwe ngeni ewe souasor Aaron mine än ewe Samol mi Lapalap. 29 Iwe, seni ekewe lifang meinisin oua angei, oupwe eäni asor ngeni ewe Samol mi Lapalap ewe kinikin mi fokun mürina o pin. 30 Iwe, kopwe pwal üreni chon ewe ainangen Lefi: Lupwen oua wes le eäni asor mine a fokun mürina, ewe lusun epwe usun chök ekewe föün wiich seni püsin ämi lenien wichiwich umwun wiich, pwal usun chök ewe wain seni ämi lenien üchüch föün irän wain ngenikemi. 31 Iwe, ewe lusun oupwe tongeni mongö ekis meinisin, ämi me chon leimwemi. Pun iei liwinimi fän iten ämi angang lon ewe imwenfel seni mangaku. 32 Lupwen oua eäni asor ewe kinikin mi fokun mürina, esap wor tipisin ämi mongö ewe lusun ekis meinisin. Nge oupwe föröchü pwe ousap apiningaua än ekewe aramasen Israel asor mi pin, pwe ousap mäla.”

18:14: Lif 27.28

*18:19: lon kapasen Ipru: eu pwonen salt

18:21: Lif 27.30-33; Tut 14.22-29