15
Allük usun asor
15.1-31
Iwe, ewe Samol mi Lapalap a ngeni Moses ekei allük fän iten ekewe aramasen Israel pwe repwe apwönüetä me lon ewe fanü i epwe ngeniir pwe repwe fanüeni: “Oupwe eäni asor ngeni ewe Samol mi Lapalap eman ätemwänin kow, ika eman ätemwänin sip, ika kuuch, pwe ämi soren kek ika sokun asoren pwon, ika asor seni püsin letipemi, ika asor lupwen fansoun ekewe chulap mi kefilitä, pwe eu asor ewe Samol mi Lapalap a efich pwoon. Iwe, ewe aramas mi uwato an asor epwe pwal eäni asoren mongö ngeni ewe Samol mi Lapalap ruu paun pilawa mi amas o mürina nofitfengen me eu kuoch apüra. Epwe pwal eäni asoren ün eu kuoch wain o achu ngeni eman me eman lam fän iten asoren kek ika sokun asor. Iwe, are epwe eäni asor eman ätemwänin sip, epwe achu ngeni rüanü paun pilawa mi amas o mürina nofitfengen me eu esop kuoch apüra pwe eu asoren mongö. Nge fän iten asoren ün epwe eäni asor eu esop kuoch wain pwe eu asor ewe Samol mi Lapalap a efich pwoon. Iwe, lupwen ewe aramas epwe eäni asor ngeni ewe Samol mi Lapalap eman ätemwänin kow fän iten asoren kek ika sokun asoren pwon ika asoren kinamwe, epwe achu ngeni ewe ätemwänin kow wonu paun pilawa mi amas o mürina nofitfengen me esop kalon apüra, pwe eu asoren mongö. 10 Epwe pwal eäni asoren ün esop kalon wain pwe eu asor ewe Samol mi Lapalap a efich pwoon.
11 Iei usun oupwe föri fän iten iteiten eman me eman ätemwänin kow ika ätemwänin sip, fän iten iteiten eman me eman ätemwänin lam ika apanen kuuch. 12 Ükükün iteiten ekewe mönün asor oupwe eäni asor, epwe pwal ina ükükün mine oupwe achu ngeniir. 13 Iwe, chon Israel meinisin, ir chon wilipos repwe föri pwüngün ekei lapalap, lupwen repwe asor ngeni ewe Samol mi Lapalap, pwe i epwe efich pwoon. 14 Nge are eman chon ekis mi siamüfetal remi, ika eman chon ekis mi nonom leimi seni eu täppin aramas tori eu täppin, a mochen eäni eu asor ngeni ewe Samol mi Lapalap, i a efich pwoon, epwe föri pwüngün mine oua föri. 15 Iwe, epwe chök wor eu allük fän itemi me fän iten ekewe chon ekis mi nom remi. Ei epwe eu allük tori feilfeilachök seni eu täppin aramas tori eu täppin. Ämi me ekewe chon ekis oua wewe chök me fän mesen ewe Samol mi Lapalap. 16 Iwe, epwe fokun wor eu chök allük me pwüng fän itemi me fän iten ekewe chon ekis mi nom remi.” Lif 24.22
17 Iwe, ewe Samol mi Lapalap a ngeni Moses 18 pwal ekoch allük usun asor fän iten ekewe aramasen Israel, pwe repwe apwönüetä me lon ewe fanü i epwe emwenirelong lon: 19 “Lupwen oupwe eni mongön ewe fanü, oupwe aimwüela eu kinikin seni, pwe eu asor ngeni ewe Samol mi Lapalap. 20 Lupwen oua umuni pilawa, ewe efochun mwen öüwämi pilawa seni föün wiich mi fö oupwe eäni asor ngeni ewe Samol mi Lapalap usun chök ekewe föün wiich oua eäni asor seni ewe lenien wichiwich umwun wiich. 21 Oupwe eäni asor ngeni ewe Samol mi Lapalap eföü pilawa seni mwen öüwämi pilawa. Ei allük epwe fän itemi seni eu täppin aramas tori eu täppin.
22 Ewe Samol mi Lapalap a ngenikemi ekei allük meinisin Moses a aiti ngenikemi. Are oua atai eu lein ekei allük, nge sap ren mochenin letipemi, 23 ika mwirimwirimi kana ra pwal atai, 24 nge ewe mwichen aramas esap mefi pwe a mwäl, ikei mine oupwe föri: Unusen ewe mwichen aramas epwe eäni asor eman nienifön ätemwänin kow fän iten asoren kek ewe Samol mi Lapalap a efich pwoon. Repwe achu ngeni ewe asoren mongö me asoren ün usun mine a pwüng. Repwe pwal eäni asor eman ätemwänin kuuch fän iten asoren tipis. 25 Iwe, ewe souasor epwe föri asoren amusamusen tipis fän iten unusen ewe mwichen chon Israel. Ar föför mi mwäl epwe musala, pun esap fis seni mochenin letiper, ra pwal uwato ar asoren kek ewe Samol mi Lapalap a efich pwoon, me ar asoren tipis. 26 Iwe, unusen ewe mwichen chon Israel me ekewe chon ekis mi nom leir epwe musala ar mwäl, pun iteiter meinisin ra pachelong lon ewe föför mi mwäl esap fis ren mochenin letiper.
27 Iwe, are eman aramas a tipisin chechengau, epwe eäni asor eman liefefinin kuuch eu ierin fän iten asoren tipis. 28 Iwe, ewe souasor epwe föri asoren amusamusen tipis fän mesen ewe Samol mi Lapalap fän iten ewe aramas mi föri och mwäl, lupwen a tipisin chechengau. Iwe, epwe musala an tipis. Lif 4.27-31 29 Iwe, epwe wor eu chök allük fän iten ätewe mi tipisin chechengau, ese lifilifil ika i eman lein ekewe aramasen Israel ika eman chon ekis mi nom leir. 30 Nge are eman a tipis seni mochenin letipan, ese lifilifil ika i eman chon wilipos ika eman chon ekis, ätewe a turunufasei ewe Samol mi Lapalap. Ewe aramas epwe käriwu seni me lein aramasan. 31 Pokiten ewe aramas a oput än ewe Samol mi Lapalap kapas o purätiu an allük, epwe wesewesen käriwu. An tipis epwe chök nonom won.”
Ra monei ngeni fau eman mi apiningaua pinin ränin sapat
15.32-36
32 Iwe, lupwen ekewe aramasen Israel ra nom lon ewe fanüapö, ra küna eman mwän a os mwüüch lon ewe ränin sapat. 33 Nge chokewe mi küna ätewe mi os mwüüch, ra emwenato ren Moses me Aaron pwal ren ekewe aramas meinisin. 34 Iwe, ra kalapusei ewe mwän, pun esap fat mine epwe fis ngeni. 35 Mürin, ewe Samol mi Lapalap a üreni Moses, “Ewe mwän epwe ninnila. Ekewe aramas meinisin repwe monei ngeni fau me lükün ewe ia oua nonom ie.” 36 Iei mine ekewe aramas meinisin ra emwenala ewe mwän lükün ewe ia ra nonom ie o monei ngeni fau tori a mäla, usun ewe Samol mi Lapalap a allük ngeni Moses.
Sokun fout won üf
15.37-41
37 Iwe, ewe Samol mi Lapalap a kapas ngeni Moses, 38 “Kopwe üreni ekewe aramasen Israel: Oupwe föri sokun fout lepwülün üfemi, ämi me mwirimwirimi kana. Oupwe pwal pacheetä won iteiten fout efoch säl mi arauarau. Tut 22.12 39 Iwe, lupwen oupwe küna ewe fout, oupwe chechemeni ai kewe allük meinisin pwe oupwe aleasochisiir. Nge ousap tapwela ekiekin lelukemi me künan mesemi, usun a mecheres ngenikemi. 40 Iei usun oupwe chechemeni ai kewe allük meinisin o aleasochisiir pwe oupwe pin fän itei ngang ämi we Kot. 41 Ngang ewe Samol mi Lapalap ämi we Kot, üa emwenikemiiwu seni ewe fanü Isip pwe üpwe ämi Kot: Ngang ewe Samol mi Lapalap ämi we Kot.”

15:16: Lif 24.22

15:28: Lif 4.27-31

15:38: Tut 22.12