Mika
Kapas akom
I. Iten ei puk: Mika, pun mine a mak lon, an afalafal me an kapasen osuni. Wewen ei it Mika: Iö a wewe ngeni ewe Samol mi Lapalap?
II. Chon makei ei puk: Mika
III. Itelapemongen ei puk: Kot a oput än nöün aramas pwomweni pwomwen souläng me ar föri tipis, nge a pwäri ngeniir alen ar repwe küna amusamusen ar tipis.
IV. Kapas aüchean ei puk: Än chon Israel tipis epwe awarato än Kot apwüng wor, nge feilfeil Kot epwe aworato ar ngasala.
V. Masouen ei puk Mika: Ewe soufos Mika eman chienen ewe soufos Aisea, i seni eu kükün telinimw lon Juta, ewe mwün Ör. Mika a fokun lükü pwe ewe mwün Juta epwe feiengau, usun chök met ewe soufos Amos a osuni fän iten feiengauen Israel, ewe mwün Efeng. A eu chök popun ar feiengau: Kot epwe apwüngü än ekewe aramas föför mi pwüngingau. Nge mine Mika a eäni afalafal, kapasen apilükülük fän iten ekewe fansoun repwe feito. Ekoch wokisin mi fokun aüchea, ewe pworaus usun ewe kinamwe epwe fis, lupwen Kot epwe nemeni läng me fanüfan (4.1-4), ekewe kapasen osuni pwe epwe war eman king mi lap, epwe pop seni mwirimwirin Tafit o uwato kinamwe ngeni ekewe mwü. Nge meinisin mine ewe soufos seni Israel a mochen apasa, a achufengeni lon eu chök wokisin (6.8), “Ewe Samol mi Lapalap a mochen pwe kopwe föri mine a pwüng o eäni kirikiröch, kopwe pwal tipetekison fän mesen om we Kot.”
VI. Tettelin masouen ei puk:
Kapasen osuni usun än Kot epwe apwüngü Israel me Juta 1.1–3.12
Usun än Kot aüsefälietä ewe mwün Israel o awora eu fansoun kinamwe 4.1–5.15
Ekewe kapasen fön me kapasen apilükülüköch 6.1–7.20
1
Echö kölün kechü fän iten Samaria me Jerusalem
1.1-16
Iwe, lon mwün Jotam, Ahas me Hiskia ekewe kingen Juta, ewe Samol mi Lapalap a kapas ngeni Mik ewe re Moreset. Iei usun mine a pwäri ngeni Mik fänäsengesin Samaria me Jerusalem: 2.King 15.32-38; 2.Kron 27.1-7; 2.King 16.1-20; 2.Kron 28.1-27; 2.Kron 18.1–20.21; 2.Kron 29.1–32.33
Oupwe aüseling, ämi chon ekewe mwü meinisin.
Oupwe aüseling, ämi meinisin mi nom won fanüfan.
Kot ewe Samol mi Lapalap epwe eman chon pwärätä mi ü ngenikemi,
epwe kapas seni imwan we mi pin.
Nengeni, ewe Samol mi Lapalap a towu seni lenian we,
epwe feitiu o fetal won ekewe leni mi tekia won fanüfan.
Iwe, ekewe chuk repwe telila me fän pechen
usun kiris a telila ren ekkei.
Ekewe lemol repwe sangfesen
usun ekewe pal ra sangfesen ren puun koluk. Ekei mettoch meinisin repwe fis pokiten än mwirimwirin Jakop kewe pupungau me än chon Israel kewe tipis. Iö popun än mwirimwirin Jakop pupungau? Sap ekewe chon Samaria? Iö a fel ngeni ekewe uluulun anümwäl me lon Juta? Sap ekewe chon Jerusalem? Iei mine ewe Samol mi Lapalap a apasa, “Üpwe föri pwe Samaria epwe wiliti eu ioien pipi me lon eu maasies, pwal eu lenien fot irän wain. Üpwe asonätiu föün ewe telinimw lon ewe lemol o pwärawu longolongun. An kewe uluulun anümwäl meinisin repwe tatakis, an kewe lifang ngeni ewe imwenfel meinisin repwe karala. Nge Ngang üpwe fokun ataela an kewe uluulun anümwäl meinisin. Pokiten Samaria a achufengeni ekewe lifang seni liwinin chon amömö inisir fän iten angangen lisowu, iei mine chon oputer repwe pwal aeasefäl ngeni liwinin chon amömö inisir fän iten angangen lisowu.”
Mürin, Mika a üra, “Ren ei üpwe kechü o ngüngüres, üpwe pwilitawu ipwei sus me üfei pwe asisilen ai letipeta. Üpwe wörüwör usun ekewe kolak mi mwacho o ngüngüres usun ekewe machang iter niwanök. Pun kinasen Samaria we esap tongeni mola. Ewe feiengau a fen tori Juta, a pwal tori ekewe asamalapen Jerusalem, ia nei aramas ra imweimw ie.”
10 Ousap apworausa ngeni chon oputach lon Kat usun ach kuf, ousap pwal kechü. Ämi chon Petleafra, oupwe asokopelakemi lon pwül, pwe asisilen ämi riaföü. 11 Ämi chon Sefaia, oupwe oola fän selela me säw, ekewe chon Sanan resap towu seni ar we telinimw. Lupwen oupwe rong än ekewe chon Pet-esel ngüngüres, oupwe silei pwe esap wor eu lenien op ikenan. 12 Ekewe chon Marot ra niuokus o witiwiti än eman epwe alisiir, pun ewe Samol mi Lapalap a awarato feiengau, a tori ekewe asamalapen Jerusalem. 13 Ämi chon Lakis, oupwe ri ekewe oris ngeni ekewe woken. Ämi popun pwe ekewe chon Jerusalem ra tipis, pun än chon Israel kewe pupungau ra pwä me leimi. 14 Iei mine oupwe ngeni Moreset-kat ekewe lifangen aimwüfesen. Ewe telinimw Aksip epwe wiliti eu lenien atuputup ngeni ekewe kingen Israel. 15 Ämi chon Maresa, ewe Samol mi Lapalap epwe atolongakemi lepöün chon liapenikemi. Ekewe souemwen mi iteföüla repwe opolong lon ewe föimw Atulam. 16 Oupwe fichi möküremi fän ämi letipeta pokiten ekewe semirit oua echeniir. Oupwe reipöpöla möküremi, pwe oupwe wewe ngeni ekewe ikel mi paan, pun nöümi kewe repwe oola senikemi.

1:1: 2.King 15.32-38; 2.Kron 27.1-7; 2.King 16.1-20; 2.Kron 28.1-27; 2.Kron 18.120.21; 2.Kron 29.132.33