28
Jesus a manausefäl
28.1-10
(Mark 16.1-10; Luk 24.1-12; Joh 20.1-10)
Iwe, mürin ewe ränin sapat lesosorusichin ewe aeuin ränin wiik, Maria Maktalene me pwal ewe eman Maria ra feila pwe repwe nenengeni ewe peias. Nge lon eu chök otun a fis och chechechin fanü mi watte, pun eman nöün ewe Samol chon läng a feitiu seni läng, a pünüela ewe fau seni mesen ewe peias o mottiu won. Lapalapan a usun chök fifi, nge üfan a pwechepwech usun sno. Iwe, ekewe chon mas ra fokun niuokus, pwe ra chechech o ra wewe ngeni aramas mi mäla. Nge ewe chon läng a üreni ekewe fefin, “Ousap niuokus. Üa silei pwe oua kütta Jesus ewe mi iräpenges. Esap nom ikei, a manausefälitä usun a fen apasa. Oupwe feito ikei o nenengeni ewe leni ia a kon ie. Mürin oupwe müttir feila o asile ngeni nöün kewe chon kaiö, pwe Jesus a manausefäl seni mäla. Iwe, epwe akomwola mwemi Kalilea, ikenan oupwe küna i. Oupwe chechemeni mine üa ürenikemi.” Iei mine ra feila seni ewe peias fän pacheu, ra niuokus, nge ra pwal fokun pwapwa. Ra säla pwe repwe asile ngeni nöün kewe chon kaiö ewe pworaus. Lon ewe chök otun Jesus a churiir o üreniir, “Kinamwe epwe torikemi.” Iwe, ra feila ren, ra amwöchü pechen o fel ngeni. 10 Jesus a üreniir, “Ousap niuokus! Oupwe feila o üreni pwii kewe pwe repwe feila Kalilea, ikenan repwe künaei.”
Än ekewe chon mas pworaus
28.11-15
11 Lupwen ekewe fefin ra feila, ekoch me lein ekewe sounfiu mi mamasa ewe peias ra liwinsefäliti ewe telinimw o apworausa ngeni ekewe souasor mi lap meinisin mine a fis. 12 Iwe, ekewe souasor mi lap ra chufengen me ekewe souakom o pwüngüpwüngfengen usun ar repwe föri eu ekiek. Mürin ra ngeni ekewe sounfiu chomong moni 13 o üreniir, “Oupwe üreni ekewe aramas, pwe nöün kewe chon kaiö ra feito lepwin o soläni somän Jesus lupwen oua möür. 14 Nge are ei pworaus epwe tori ewe kepina, äm aipwe afata ngeni pwe esap tipisimi, o ämi ousap tolong lon osukosuk.” 15 Iei mine ekewe sounfiu ra angei ewe moni o föri mine ra öüröüra ngeniir. Iwe, ei pworaus a chöfetal lein ekewe chon Juta tori ikenai.
Jesus a pwä ngeni nöün kewe chon kaiö
28.16-20
(Mark 16.14-18; Luk 24.36-49; Joh 20.19-23; Föf 1.6-8)
16 Mürin ekewe engol me eman chon kaiö ra feila Kalilea won ewe chuk, ewe ia Jesus a üreniir pwe repwe feila ie. Mat 26.32; Mark 14.28 17 Iwe, lupwen ar küna Jesus, ra fel ngeni, nge ekoch me leir ra tipemwaramwar. 18 Nge Jesus a kan ngeniir o üreniir, “Nemenem meinisin won läng me fanüfan a toriei. 19 Oupwe feila o asoulängala chon ekewe mwü meinisin, oupwe papataisiir ngeni iten ewe Sam, ewe Nau me ewe Ngünmifel. Föf 1.8 20 Oupwe afalafaleer pwe repwe aleasochisi meinisin mine üa allük ngenikemi. Nge ngang üpwe etikemi fansoun meinisin tori lesopolan fanüfan.”

28:16: Mat 26.32; Mark 14.28

28:19: Föf 1.8