3
Än Johannes Soupapatais Afalafal
3.1-20
(Mat 3.1-12; Mark 1.1-8; Joh 1.19-28)
Iwe, lon engol me limuen ierin mwün Sisar Tiperius, lupwen Pontius Pilatus a kepinan Juta, Herotes a samolun Kalilea, pwiin we Filip a samolun Iturea me Trakonitis me Lisanias a samolun Apilene, nge Anas me Kaifas ir ekewe Souasor mi Lap lon ena fansoun, alon Kot a tori Johannes nöün Sakarias we mwän me lon fanüapö. Iei mine Johannes a feila lemenen unusen ewe fanü ünükün ewe chanpupu Jortan o afalafal, “Oupwe kul seni ämi tipis o papatais, iwe, Kot epwe amusala ämi tipis.” Pun iei usun mine a mak lon ewe puk makkeen ewe soufos Aisea,
“Eman a kökkö fän leüömong lon fanüapö:
‘Oupwe amolätä efoch al fän iten ewe Samol,
oupwe awenecharala ewe al
epwe fetal won.
Lemolun chuk meinisin repwe irela,
ekewe chuk meinisin repwe tekisonola.
Ekewe al mi pwor repwe awenewen,
ekewe al mi pukopuk repwe sonosonöchüla.
Iwe, aramas meinisin repwe küna
än Kot angangen amanau.’ ” Ais 40.3-5
Iwe, eu mwichen aramas mi chomong ra feila pwe repwe papatais ren Johannes. Nge a üreniir, “Ämi nöün serepenit. Iö a ürenikemi pwe oupwe sü seni än Kot we song epwe awarato womi? Mat 12.34; 23.33 Oupwe föri sokun föför epwe pwärätä pwe oua aier seni ämi tipis, nge ousap popuetä le apasa lefilemi, ‘Äm mwirimwirin Apraham.’ Pun ngang üpwe ürenikemi, pwe Kot a tongeni angei ekei fau o föri seniir pwe repwe mwirimwirin Apraham. Joh 8.33 Ewe kouk a fen molotä pwe epwe pöküela ekewe irä seni warer. Iteiten irä esap uani ua mi öch epwe pöküpök o koturolong lon ekkei.” Mat 7.19
10 Iwe, ekewe aramas ra aisini Johannes, “Nge äm, met äm aipwe föri?” 11 Johannes a pölüeniir, “Iö a eäni ruu söch epwe angei echö o ngeni ewe eman esap wor an, nge eman mi wor anan mongö epwe pwal föri iei usun.” 12 Iwe, ekoch chon ioni takises ra feito pwe repwe papatais. Ra aisini, “Sense, met äm aipwe föri?” Luk 7.29 13 Johannes a pölüeniir, “Oupwe chök ioni takises lon ükükün met mi afat lon allük.” 14 Ekoch sounfiu ra pwal aisini, “Nge äm, met äm aipwe föri?” Johannes a pölüeniir, “Ousap achomau lon ämi angei moni seni aramas, ousap atipisimwäli eman, nge oupwe menemenöch ren liwinin ämi angang.”
15 Iwe, ekewe aramas ra witiwit fän apilükülüköch o ra popuetä le ekieki lon leluker pwe Johannes eli epwe fen ewe Kraist. 16 Iei mine Johannes a üreniir, “Ngang üa papataisikemi ren koluk, nge eman mi lap seniei epwe feito, ngang üsap fich ngeni ai üpwe mwo nge apichi ririn ipwan sus, ätewe epwe papataisikemi ren Ngünmifel me ekkei. 17 A kamwöch an söföl mi keang pwe epwe aea le aimwüfeseni ekewe föün wiich seni pöön me won an lenien wichiwich umwun wiich. Iwe, epwe ionifengeni ekewe föün wiich o uwalong lon an lenien iseis, nge ekewe pöön epwe keniirela lon ekkei esap kunula.”
18 Iwe, lon chomong sokopaten kapas Johannes a aea le afalafala ewe Pworaus Allim ngeni ekewe aramas o fönöör, pwe repwe siwili manauer. 19 Nge Johannes a apwüngü ewe samol Herotes pokiten an pwülüeni Herotias pwülüen pwiin we, pwal pokiten an kewe föför mi ngau meinisin a föri. 20 Mürin Herotes a föri och föför mi fokun ngau ren an aturalong Johannes lon imwen fötek. Mat 14.3-4; Mark 6.17-18
Jesus a papatais
3.21-22
(Mat 3.13-17; Mark 1.9-11)
21 Iwe, lupwen ekewe aramas meinisin ra papatais, Jesus a pwal papatais. Nge lupwen Jesus a iotek, läng a sukula 22 o ewe Ngünmifel a feitiu won usun lapalapen eman lisom. Iwe, eu möngüngü a feitiu seni läng a apasa, “En nei mi fokun achengicheng, üa unusen pwapwa reöm.” Ken 22.2; Kölf 2.7; Ais 42.1; Mat 3.17; Mark 1.11; Luk 9.35
Än Jesus kewe lewo
3.23-38
(Mat 1.1-17)
23 Iwe, lupwen Jesus a popuetä an angang a ierini ina epwe ilik ier. Iei usun än aramas ekiek pwe Jesus nöün Josef, nge Josef nöün Eli, 24 Eli nöün Matat, Matat nöün Lefi, Lefi nöün Melki, Melki nöün Jannai, nge Jannai nöün Josef, 25 Josef nöün Matitia, Matitia nöün Amos, Amos nöün Nahum, Nahum nöün Esli, nge Esli nöün Nakkai, 26 Nakkai nöün Mahat, Mahat nöün Matatias, Matatias nöün Simei, Simei nöün Josek, nge Josek nöün Jota, 27 Jota nöün Johanan, Johanan nöün Resa, Resa nöün Serupapel, Serupapel nöün Sealtiel, nge Sealtiel nöün Neri, 28 Neri nöün Melki, Melki nöün Atti, Atti nöün Kosam, Kosam nöün Elmatam, nge Elmatam nöün Er, 29 Er nöün Josua, Josua nöün Elieser, Elieser nöün Jorim, Jorim nöün Matat, nge Matat nöün Lefi, 30 Lefi nöün Simeon, Simeon nöün Juta, Juta nöün Josef, Josef nöün Jonam, nge Jonam nöün Eliakim, 31 Eliakim nöün Melea, Melea nöün Menna, Menna nöün Matata, Matata nöün Natan, nge Natan nöün Tafit, 32 Tafit nöün Jesi, Jesi nöün Opet, Opet nöün Poas, Poas nöün Salmon, nge Salmon nöün Nason, 33 Nason nöün Aminatap, Aminatap nöün Atmin, Atmin nöün Arni, Arni nöün Hesron, Hesron nöün Peres, nge Peres nöün Juta, 34 Juta nöün Isaak, Isaak nöün Apraham, Apraham nöün Tara, nge Tara nöün Nahor, 35 Nahor nöün Seruk, Seruk nöün Reu, Reu nöün Pelek, Pelek nöün Eper, nge Eper nöün Shela, 36 Shela nöün Kainan, Kainan nöün Arpaksat, Arpaksat nöün Säm, Säm nöün Noa, nge Noa nöün Lamek, 37 Lamek nöün Metusala, Metusala nöün Enok, Enok nöün Jaret, Jaret nöün Mahalalel, nge Mahalalel nöün Kenan, 38 Kenan nöün Enos, Enos nöün Set, Set nöün Atam, nge Atam nöün Kot.

3:6: Ais 40.3-5

3:7: Mat 12.34; 23.33

3:8: Joh 8.33

3:9: Mat 7.19

3:12: Luk 7.29

3:20: Mat 14.3-4; Mark 6.17-18

3:22: Ken 22.2; Kölf 2.7; Ais 42.1; Mat 3.17; Mark 1.11; Luk 9.35