Lifitikos
Kapas akom
I. Iten ei puk: Lifitikos. Ei kapas a pop seni iten chon ewe ainangen Lefi.
II. Chon makei ei puk: Chomong sousilelap lon Paipel ra tipeeu ngeni pwe Moses a makei.
III. Itelapemongen ei puk: Ämi oupwe pin, pun ngang ewe Samol mi Lapalap ämi Kot üa pin.
IV. Kapas aüchean ei puk: Usun än chon tipis tufichin feito fän mesen ewe Kot mi pin, pwal usun ar repwe manaueni eu manau esap atai lefiler me Kot. Ewe kapas “pin” a mak fän chomong lon ei puk.
V. Masouen ei puk Lifitikos: Lon ei puk a mak allük fän iten chon Israel me lom, usun ar fel ngeni Kot me pwüngün ar lamalam, pwal allük fän iten souasor mi wisen anganga ekei allük.
Ewe wokisin aramas ra kon silei me lon ei puk a mak lon sopun 19.18. Ikkei ekewe kapas Jesus a aita ngeni aruuen allük mi lap: “Kopwe echeni chon arum usun püsin om echenuk.”
VI. Tettelin masouen ei puk:
Ekewe allük fän iten sokopaten asor 1.1–7.38
Apinipinin Aaron me nöün kewe mwän ngeni ewe wisen souasor 8.1–10.20
Ekewe allük mi afata mine a limöch me mine a limengau 11.1–15.33
Ewe ränin amusamusen tipis 16.1-34
Ekewe allük usun manau mi pin me fel ngeni Kot 17.1–27.34
1
Usun ekewe asoren kek
1.1-17
Iwe, ewe Samol mi Lapalap a kökköri Moses seni lon ewe imw mangaku ia aramas ra churi Kot ie o ngeni ekei allük fän iten ekewe aramasen Israel, pwe repwe apwönüetä, lupwen ra asor: Are eman aramas leimi epwe uwato an asor ngeni ewe Samol mi Lapalap, epwe uwato eman mönün asor seni lein nöün kow are sip are kuuch.
Are an asor epwe eu asoren kek seni nöün pwiin kow, epwe uwato eman ätemwänin kow esap wor terin ren asamalapen ewe imwenfel seni mangaku, pwe ewe Samol mi Lapalap epwe etiwa. Iwe, epwe anomu pöün won möküren ewe mönün asoren kek, nge Kot epwe etiwa an asoren amusamusen an tipis. Mürin, epwe niela ewe ätemwänin kow fän mesen ewe Samol mi Lapalap, nge ekewe sousor nöün Aaron kewe mwän repwe uwato ewe cha o uti ngeni pwelin ünükün ewe rongen asor mi nom leasamalapen ewe imwenfel seni mangaku. Epwe etika silin ewe mönün asor o pökükisietiu fitukan. Nge nöün ewe souasor Aaron kewe mwän repwe aküüw ekkei won ewe rongen asor o sonätä mwüch won. Iwe, ekewe souasor repwe isenöchüätä kinikinin ewe mönün asor pwal möküran me kirisin won mwüchün ewe ekkei mi nom won ewe rongen asor. Nge ewe aramas epwe talü ngeni koluk pisekin lon inisin ewe mönün asor me pechen. Mürin, ewe souasor epwe kenala meinisin me won ewe rongen asor pwe eu asoren kek ewe Samol mi Lapalap a efich pwoon.
10 Iwe, are an asor epwe eu asoren kek seni nöün sip are kuuch, epwe uwato eman ätemwän esap wor terin. 11 Epwe niela ewe mönün asor peliefengin ewe rongen asor fän mesen ewe Samol mi Lapalap, nge ekewe souasor nöün Aaron kewe mwän repwe uti chan ngeni pwelin ünükün ewe rongen asor. 12 Iwe, epwe pökükisietiu fitukan, nge ewe souasor epwe isenöchü won mwüchün ewe ekkei mi nom won ewe rongen asor fiti möküran me kirisin. 13 Nge ewe aramas epwe talü ngeni koluk pisekin lon inisin me pechen. Iwe, ewe souasor epwe uwato unusan meinisin o kenala me won ewe rongen asor. Pun iei eu asoren kek ewe Samol mi Lapalap a efich pwoon.
14 Nge are an asor ngeni ewe Samol mi Lapalap epwe eu asoren kek seni machang, epwe uwato eman lisom ika eman apansüsün lisom. 15 Iwe, ewe souasor epwe uwato ewe machang ren ewe rongen asor, epwe ämäräkulu möküran pwe epwe tü o keni me won ewe rongen asor. Nge chan ewe machang epwe asürätiu lepekin ewe rongen asor. 16 Mürin, epwe angei chükünükanan me masouan o moneretiu lon ewe lenien falang peliötiuen ewe rongen asor. 17 Epwe pwal amwöchü pöükässin o ekis pwiliela, nge esap wesewesen pwilifeseni. Iwe, ewe souasor epwe kenala me won mwüchün ekkein ewe rongen asor. Pun ei eu asoren kek ewe Samol mi Lapalap a efich pwoon.