42
Än Hiop amusamus
42.1-6
1 Mürin, Hiop a üreni ewe Samol mi Lapalap,
2 “Üa silei pwe en ka tongeni föri mettoch meinisin,
nge meinisin mine ka ekiekietä esap wor epetin.
3 En ka ais, ‘En iö pwe ka amonomona ai kapasen öüröür ren kapas esap wor mirit lon?’
Ellet, üa apasa mine üsap weweiti,
üa kapas usun mettoch mi fokun amwarar ngeniei, üsap silei. ✡ Hiop 38.2
4 En ka apasa, ‘Kopwe aüseling, nge ngang üpwe kapas,
ngang üpwe aisinuk, nge en kopwe pälüeniei.’ ✡ Hiop 38.3
5 Me mwan üa rong usum ren selingei,
nge iei üa nenengenuk ren mesei.
6 Iei mine üa püsin atipisiei
o ekieksefäl lon pwül me falang.”
Kot a etiwa Hiop o aliwinisefäli wöün meinisin
42.7-17
7 Mürin än ewe Samol mi Lapalap kapas ngeni Hiop, a pwal kapas ngeni Elifas ewe re Teman, “Üa song ngenikemi me chiechiom kewe ruoman, pun ousap eäni kapas mi pwüng usi, usun nei we chon angang Hiop a eäni. 8 Iei mine oupwe angei füman ätemwänin kow me füman ätemwänin sip, oupwe feila ren nei chon angang Hiop o eäni eu asoren kek fän itemi. Nge nei we chon angang Hiop epwe iotek fän itemi, pun üpwe etiwa an iotek, pwe üsap liwini ngenikemi liwinin ämi kapas esepwüng. Pun ousap eäni kapas mi pwüng usi, usun nei chon angang Hiop a eäni.” 9 Iwe, Elifas ewe re Teman, Piltat ewe re Shu me Sofar ewe re Nama ra feila o föri usun mine ewe Samol mi Lapalap a üreniir. Nge ewe Samol mi Lapalap a etiwa än Hiop iotek.
10 Nge mürin än Hiop iotek fän iten chiechian kewe, ewe Samol mi Lapalap a aliwinisefäli wöün. Iwe, a ngeni Hiop fän ruu mine a eäni me mwan. ✡ Hiop 1.1-3 11 Mürin, pwin Hiop kewe me fefinan, pwal aramas meinisin mi silei i me mwan ra feito ren pwe repwe mongö ren lon imwan. Ra aururu o achipa i ren ekewe feiengau meinisin ewe Samol mi Lapalap a atoto won me mwan. Iwe, eman me eman leir a fang ngeni eföü föün moni seni silifer me efoch ring seni kolt. 12 Iwe, ewe Samol mi Lapalap a afeiöchü lusun ränin manauen Hiop lap seni me mwan. A wor ükükün engol me rüanüngeröü nöün sip, wonongeröü kamel, ruungeröü ätemwänin kow me engeröü liafefinin aas. 13 A pwal nöüni füman ät me ülüman nengin. 14 Iwe, a aita ngeni ewe finichi Jemima, ewe aruomanün Kesia, nge ewe aülümanün Keren-hapuk. 15 Lon unusen ewe fanü esap wor eman föpwül mi liöch usun nöün Hiop kewe föpwül. Iwe, semer we a afanüeer lein fanüen mongeer kewe. 16 Mürin ei, Hiop a pwal manau lon ükükün ipükü faik ier o küna nöün me nöün nöün kewe tori arüanün tettel. 17 Iwe, Hiop a mäla lon an chinlap o ieritam.