4
Iwe, Kot a ngenikich ewe pwon, pwe sipwe tolong lon ewe asösö a kapas usun me mwan. Iei mine sipwe fokun tümwünüfichi pwe esap wor eman leimi esap tolong lon ewe asösö Kot a fen pwon. Pun sia pwal rongorong ewe Pworausen Manau usun chök ir. Ir ra rongorong ewe pworaus, nge resap feiöch ren, pun lupwen ar rongorong, resap etiwa fän ar lükü. Iei mine oukich mi lükü sia tolong lon ewe asösö Kot a fen pwonei. Iei usun a fen apasa,
“Lon ai song üa pwon fän akapel ngeniir,
‘Resap fokun tolong lon ewe fanü ia üpwe asösöör ie.’ ”
Iei usun met Kot a apasa, inamwo ika an kewe angang ra wesila seni ewe fansoun a föri fanüfan. Kölf 95.11 Pun a mak lon eu kewe Toropwe mi Pin usun ewe afisuen rän, “Kot a asösö seni an kewe angang meinisin lon ewe afisuen rän.” Ken 2.2 A pwal mak lon eu kewe wokisin usun ewe kapas asösö, “Resap fokun tolong lon ewe fanü ia üpwe asösöör ie.” Kölf 95.11 Iwe, chokewe mi akomwen rongorong ewe Pworaus Allim resap tolong lon ewe asösö, pun ra aleasolap. Nge mi wor pwal ekoch a mwümwütä ngeniir pwe repwe tolong lon ewe asösö. Ei a fat ren än Kot filätä pwal eu rän mi iteni “Ikenai”. Chomong ier mürin a kapas me ren Tafit usun met a fen mak lon ekewe Toropwe mi Pin,
“Ikenai are oua rong mwelien Kot,
ousap apöchöküla lelukemi.” Kölf 95.7-8
Pun are Josua a atolonga ekewe aramas lon ewe asösö Kot a fen pwon, Kot esap pwal kapassefäl me mürin usun pwal eu rän. Tut 31.7; Jos 22.4 Iwe, mi chüen wor eu asösö a witiwit fän iten nöün Kot kewe aramas, a usun chök ewe asösö än Kot lon ewe afisuen rän. 10 Pun iö a tolong lon ewe asösö Kot a pwonei, epwe pwal asösö seni an angang usun chök Kot a asösö seni an angang. Ken 2.2 11 Iei mine sipwe fokun achocho ach sipwe tolong lon ewe asösö, pwe esap wor eman leich epwe tur usun ir pokiten ar aleasolap.
12 Pun än Kot kapas a manau o manaman, a ken seni efoch ketilas mi seisei me rüepek. A tililong lon manauach o aimwüfeseni letipach me ngünüch, pwal lekupukupun lon chü me fituken lon chü. A pwal apwüngü mochen me ekiekin letipen aramas. 13 Esap fokun wor och epwe tongeni monola seni Kot. Förian kana meinisin ra säretä o pwäpwäla mwen mesan. Iwe, kich meinisin sipwe fokun pwärätä ngeni i ach föför meinisin.
Jesus ewe Souasor mi Lap
4.14-5.10
14 Iei mine ousipwe kamwöchünük won ewe lükü sia pwärätä usun. Pun a nom rech eman Souasor mi Lap, Jesus ewe Nöün Kot, a feitä läng o a nonom mwen mesen Kot. 15 Pun ach we Souasor mi Lap esap eman mi tongomang ngeni ach apwangapwang. Nge a nom rech eman Souasor mi Lap mi tolong lon sokopaten sosot usun chök kich, nge esap tipis. 16 Iei mine sipwe arap ngeni än Kot we lenien mot fän apilüköch, ia sia küna ümöümöch me ie. Ikenan sipwe angei tong o küna ümöümöch, pwe epwe alisikich lon fansoun ach osupwang.

4:3: Kölf 95.11

4:4: Ken 2.2

4:5: Kölf 95.11

4:7: Kölf 95.7-8

4:8: Tut 31.7; Jos 22.4

4:10: Ken 2.2