Apakuk
Kapas akom
I. Iten ei puk: Apakuk, pun mine a mak lon, an kapasen osuni. Wewen ei it Apakuk: Ewe chon romi.
II. Chon makei ei puk: Apakuk
III. Itelapemongen ei puk: Ekewe chon pwüng repwe manau ren ar lükü Kot.
IV. Kapas aüchean ei puk: Pokiten Kot a pin o pwüng, iei mine epwe apwüngü tipis.
V. Masouen ei puk Apakuk: Ei puk ewe soufos Apakuk a makei arapakan ngeni ewe ier 610 mwen Kraist (B.C.), lon ewe fansoun chon Papilon ra nemenem. Apakuk a fokun osukosuk ren än chon Papilon föförün mwänewüs ngeni aramas, iei mine a aisini ewe Samol mi Lapalap, “Pwota ka fanafanala, lupwen ekewe aramasangau ra arosala chokewe mi pwüng seniir?” Nge ewe Samol mi Lapalap a pälüeni, pwe i epwe apwüngüür lon fansoun inet a filätä, nge mine a aüchea lon ei fansoun, pwe “ekewe chon pwüng repwe manau ren ar lükü Kot.” Lesopolan ei puk a mak kapasen osuni usun feiengauen ekewe chon pwüngingau, mürin a mwüchütiu won echö köl mi alinga än Kot tekia, a pwal pwärätä än Apakuk lükülük esap mwüchüla.
VI. Tettelin masouen ei puk:
Än Apakuk üpälü ngeni Kot me än Kot palüen 1.1–2.5
Kapasen osuni usun feiengauen ekewe chon pwüngingau 2.6-20
Än Apakuk iotek 3.1-19
1
Apakuk a weires pokiten a fis pwüngingau
1.1-4
1 Iei ewe pworaus Kot a pwäri ngeni ewe soufos Apakuk. 2 Ai Samol mi Lapalap, ifa ükükün fansoun ai üpwe siö ngonuk pwe kopwe awora om alilis, nge kopwap aüselinga? Ifa ükükün fansoun ai üpwe siö ngonuk fän iten ewe angangen mwänewüs, nge kopwap amanauakem? 3 Pwota ka föri pwe üa küna ei sokun weires? Pwota ka tongeni nenengeni ei sokun föför mi ngau? Feiengau me angangen mwänewüs ra nonom mwei, fiu me änini ra fis ekis meinisin. 4 Iei mine allük a apwangapwangala, nge pwüngüöch esap pwönüetä. Pun ekewe chon pwüng ra oo ren ekewe aramasangau, iei mine pwüngüöch a sosor.
Ekewe chon Papilon repwe apwüngü chon Juta
1.5-11
5 Iwe, ewe Samol mi Lapalap a üreni nöün aramas, “Oupwe nenengeni chon ekewe mwü mi nom ünükümi, oupwe mairü o weitifengenikemi ren mine oua küna. Pun üpwe föri och föför lon ränin manauemi, ousap mochen lükü ika eman epwe ürenikemi. ✡ Föf 13.41 6 Ngang üpwe äpwächa ekewe chon Papilon, ewe mwü mi rochongau o mwökütükai. Ra feila lemenen unusen fanüfan o liapeni lenien aramas sap lenier. ✡ 2.King 24.2 7 Ra eniweniw o fokun aniuokus. Ra püsin förätä ar allük o püsin atekiaretä. 8 Nöür oris ra müttir seni ewe man itan lepart, ra rochongau seni ekewe wolif mi echik. Nöür kewe chon wawa oris ra feito me toau o säpuropur, ra müttir le sä usun müttirin eman ikel a tur won liapan. 9 Ir meinisin ra feito pwe repwe föri angangen mwänewüs, eniweniw a akom mwer. Ra achufengeni chon oola usun föün pi. 10 Ra ämängaua ekewe king o urumwotei ekewe samol. Ra takiri ekewe telinimw mi pöchökül tittir, pun ra achukuchukätä pwül ünükür o liapeniir. 11 Mürin ra sä seniir usun asepwäl o feila. Ir aramas mi tipis, pun ra eäni kot ar pöchökül.”
Apakuk a iotekin üpälü ngeni Kot
1.12-17
12 Ai Samol mi Lapalap, en ai Kot Ewe mi Pin, en ka nom seni fansoun esepop tori fansoun esemüch. Iei mine äm aisap fokun mäla. Nge en, ai Samol mi Lapalap, en ka filätä ekewe chon Papilon pwe repwe ärikeemila, en äm Achau ka awiseer pwe repwe apwüngükem. 13 Mesom ra men limöch pwe kosap tongeni nenengeni föför mi ngau, kosap tongeni tipeeu ngeni föför mi mwäl. Nge pwota ka tipeeu ngeni ekei aramas mi eäni rawangau? Pwota ka fanafanala, lupwen ekewe aramasangau ra arosala chokewe mi pwüng seniir? 14 En ka föri pwe aramas ra usun chök ikenen leset, ika usun chök ekewe mönün leset esap wor ar sounemenem. 15 Ekewe chon Papilon ra efiretä meinisin ren eo, ra liapeniir lon ar kewe cheew o achufengeniir lon ar kewe uuk. Mürin, ra mwänek o mweireir ren liaper. 16 Ra mwo nge fel ngeni ar kewe cheew o asor ngeni ar kewe uuk, pun ra manau rer, nge ener mongö a fokun chomong o anö. 17 Ifa usun, repwe chök nöünöü nöür kewe ketilas tori feilfeilachök o sopwela le niela chon ekewe mwü, nge esap wor ar tong?