10
Ra asüela ekewe fin ekis me nöür
10.1-44
Iwe, lupwen Esra a iotek o pwärätä ekewe tipis, lupwen a kechü o chapala won pwül me mwen ewe imwen Kot, eu mwichemongun mwän, fefin me semirit seni Israel ra mwicheto ren. Ir meinisin ra seningüngü le kechü. Mürin, Sekania nöün Jehiel we mwän eman mwirimwirin Elam a kapas ngeni Esra, “Äm aia tipis ngeni äm Kot ren äm pwüpwülü ngeni ekewe fin ekis seni aramasen ekewe fanü ünüküm. Nge inamwo are a fis ei, mi chüen wor apilükülük fän iten Israel. Iei mine aipwe föri eu pwon ngeni äm we Kot pwe aipwe pöütala pwülüem kei fin ekis me nöür kewe, usun en äm samol ka öüröüra ngenikem me chokewe mi niuokusiti än äm we Kot kewe allük. Äm aipwe föri usun mine a mak lon än Kot kewe allük. Kopwe ütä, pun iei wisom pwe kopwe apöchöküla pwüngün ei allük, nge äm aipwe etuk. Kopwe apöchökülok o föri iei usun.” Iei mine Esra a ütä o pesei ngeni ekewe souemwenin ekewe souasor me ekewe mwän seni ewe ainangen Lefi, pwal ngeni chon Israel meinisin, pwe repwe pwon fän akapel pwe repwe föri usun Sekania a fen apasa. Iwe, ra föri eu pwon fän akapel.
Mürin, Esra a feil seni lenian me mwen ewe imwen Kot o tolong lon rumwen Jehoanan nöün Eliasip we mwän. Iwe, a nonom ikenan lon unusen ewe pwin, nge esap mongö ika ün, pun a letipeta ren ekewe tipis chokewe mi liwinto seni ar oola ra föri. Mürin, eu pworausen asilesil a tori unusen Juta me Jerusalem ngeni chokewe meinisin mi liwinto seni ar oola, pwe repwe mwichefengen lon Jerusalem. Nge ika eman esap feito lon ükükün ülüngat rän, repwe angei seni pisekin meinisin, nge i epwe towu seni ewe mwich mi liwinto seni ar oola. Ei allük a feito seni ekewe nöüwis me ekewe souakom.
Iwe, mürin ülüngat rän ekewe re Juta me Peniamin meinisin ra mwichefengen me lon Jerusalem. Ei mwich a fis lon rüen ränin ewe atiuen maram. Iwe, ekewe aramas meinisin ra mot lon ewe leni mi amassawa me mwen ewe imwen Kot, ra chechech pokiten ei pworaus pwal pokiten püngümongun üt. 10 Iwe, ewe souasor Esra a ütä o üreniir, “Oua purätiu ewe allük o pwüpwülü ngeni ekewe fin ekis. Ren ei oua alapala än chon Israel tipis. 11 Iei oupwe pwärätä ämi tipis ngeni ewe Samol mi Lapalap än ämi kewe lewo we Kot o föri letipan. Oupwe imwü seni ekewe aramas lon ei fanü, pwal seni pwülüemi kewe ekewe fin ekis.” 12 Mürin, ewe mwichen aramas meinisin a pälüeni fän leüömong, “Mi pwüng. Äm aipwe föri usun mine ka apasa. 13 Nge ekewe aramas ra kon chomong, a pwal fansoun püngümongun üt. Äm aisap tongeni ütä lon ei leni mi amassawa. Nge ei angang sap angangen eu rän ika ruu rän chök, pun äm aia fokun pupungau lon ei föför. 14 Iwe, nöüm kewe nöüwis repwe nonomotiu lon Jerusalem o sopwela ei angang fän iten unusen ewe mwich. Mürin, meinisin mi pwüpwülü ngeni fin ekis repwe feito seni lon äm kewe telinimw lon en me an fansoun mi pwonola, nge ekewe souakom me ekewe soukapwüng seni lon en me an telinimw repwe fitireto. Ren ei än Kot lingeringer mi watte won ei föför epwe kul senikem.” 15 Iwe, Jonatan nöün Asahel we mwän me Jaseia nöün Tikwa we mwän echök ra pälüeni ei lapalap, nge Mesulam me Sapetai seni ewe ainangen Lefi ra alisiir.
16 Mürin, ekewe chon oola mi liwinto ra föri mine ra pwon. Ewe souasor Esra a filätä ekoch mwän, ir mwänirelan än semer kewe cho fän iten ar kewe famili o makeetiu iten eman me eman. Iwe, lon aeuin ränin ewe aengolun maram ra popuetä le kütta pworausen än eman me eman föför. 17 Nge lon aeuin ränin ewe aeuin maram a wesila ar angang ngeni ekewe mwän meinisin mi pwüpwülü ngeni fin ekis.
18 Ikkei iten ekewe mwän seni ekewe souasor mi pwüpwülü ngeni fin ekis: Maseia, Elieser, Jarip me Ketalia seni ewe familien Jesua nöün Jehosatak me pwin kewe. 19 Iwe, ra pwon pwe repwe pöütala pwülüer kewe. Iwe, ra eäni asor eman ätemwänin sip fän iten ar tipis. 20 Seni ewe familien Imer: Hanani me Sepatia, 21 seni ewe familien Harim: Maseia, Elia, Semaia, Jehiel me Usia, 22 seni ewe familien Pashur: Elio-enai, Maseia, Israel, Netanel, Josapat me Elasa.
23 Ikkei iten ekewe mwän seni ewe ainangen Lefi: Josapat, Simei, Kelaia, iei i Kelita, Petahia, Juta me Elieser.
24 Iwe, seni lein ekewe chon köl: Eliasip, nge seni lein ekewe chon mamasa ekewe asamalapen imwenfel: Salum, Telem me Uri.
25 Ikkei iten ekewe re Israel: Seni ewe familien Paros: Ramia, Isia, Malkia, Miamin, Eleasar, Hasapia me Penaia. 26 Seni ewe familien Elam: Matania, Sekaria, Jehiel, Apti, Jeremot me Elia. 27 Seni ewe familien Satu: Elio-enai, Eliasip, Matania, Jeremot, Sapat me Asisa. 28 Seni ewe familien Pepai: Jehohanan, Hanania, Sapai me Atlai. 29 Seni ewe familien Pani: Mesulam, Maluk, Ataia, Jasup, Seal me Jeremot. 30 Seni ewe familien Pahat-moap: Atna, Chelal, Penaia, Maseia, Matania, Pesalel, Pinui me Manasa. 31 Seni ewe familien Harim: Elieser, Isia, Malkia, Semaia, Simeon, 32 Peniamin, Maluk me Semaria. 33 Seni ewe familien Hasum: Matenai, Matata, Sapat, Elifelet, Jeremai, Manasa me Simei. 34 Seni ewe familien Pani: Matai, Amram, Uel, 35 Penaia, Peteia, Chelui, 36 Wania, Meremot, Eliasip, 37 Matania, Matenai me Jasu. 38 Seni ewe familien Pinui: Simei, 39 Selemia, Natan, Ataia, 40 Maknatepai, Sasai, Sarai, 41 Asarel, Selemia, Semaria, 42 Salum, Amaria me Josef. 43 Nge seni ewe familien Nepo: Jeiel, Matitia, Sapat, Sepina, Jatai, Joel me Penaia. 44 Ekei mwän meinisin ra pwüpwülü ngeni fin ekis. Iwe, ra pöütirela fiti nöür kewe.