48
“Iei iten ekewe ainang: Tan epwe fanüeni ewe kinikin mi nom lekiännin ewe fanü me efeng, a popuetä seni ewe matau watte wenewenen Hetlon tori Hamat, pwal tori Hasarenon, pwe ewe fanü Tamaskus me ewe fanü Hamat repwe nom efeng. Iei ewe fanü Tan me lon ewe fanü Israel seni lepelian me ötiu tori lepelian me lotou. Ünükün ewe fanü Tan, seni lepelian me ötiu tori lepelian me lotou, Aser epwe fanüeni eu kinikin. Iwe, ünükün ewe fanü Aser, seni lepelian me ötiu tori lepelian me lotou, Naftali epwe fanüeni eu kinikin. Ünükün ewe fanü Naftali, seni lepelian me ötiu tori lepelian me lotou, Manasa epwe fanüeni eu kinikin. Iwe, ünükün ewe fanü Manasa, seni lepelian me ötiu tori lepelian me lotou, Efraim epwe fanüeni eu kinikin. Ünükün ewe fanü Efraim, seni lepelian me ötiu tori lepelian me lotou, Rupen epwe fanüeni eu kinikin. Nge ünükün ewe fanü Rupen, seni lepelian me ötiu tori lepelian me lotou, Juta epwe fanüeni eu kinikin.
Iwe, ünükün ewe fanü Juta, seni lepelian me ötiu tori lepelian me lotou, epwe nom ewe kinikin oupwe aimwüela. Iwe, chölapan epwe ükükün engol mail seni lepelian me efeng tori lepelian me ör, nge langataman epwe usun chök langatamen kinikinin fanüen ekewe ainang seni lepelian me ötiu tori lepelian me lotou. Iwe, ewe Imwenfel epwe nom lukalapan. Nge langatamen ewe kinikin oupwe aimwüela fän iten ewe Samol mi Lapalap epwe ükükün engol mail, nge chölapan walu mail. 10 Iwe, ewe kinkinin fanü mi pin fän iten ekewe souasor epwe iei usun: Langatamen lepelian me efeng, pwal lepelian me ör epwe ükükün engol mail, nge chölapen lepelian me lotou pwal lepelian me ötiu epwe ükükün rüanü mail. Iwe, ewe Imwenfel fän iten ewe Samol mi Lapalap epwe nom lukalapan.
11 Iwe, ei kinikin epwe lenien ekewe souasor ir mwirimwirin Satok, chokewe mi likitü le angang ngeniei, nge resap eti chon Israel le tok seniei, usun chon ewe ainangen Lefi ra föri. 12 Iei usun ekewe souasor repwe angei ei kinikin mi imwüla seni ewe fanü mi pin, a nom ünükün fanüen chon ewe ainangen Lefi. Ei fanü epwe eu fanü mi unusen pin. 13 Ünükün ei kinikinin fanüen ekewe souasor epwe nom ewe kinikin fän iten chon ewe ainangen Lefi, langataman epwe ükükün engol mail, nge chölapan rüanü mail. Iei langatamen unusen ewe leni mi pin ükükün engol mail, nge chölapan walu mail. 14 Ei fanü a mürina seni meinisin. Esap wor eman a tongeni amömöla och seni ika akasiwili ngeni eu fanü, esap pwal wor eman a tongeni fang ngeni eman eu kinikinin, pun a pin fän iten ewe Samol mi Lapalap.
15 Iwe, ewe lusun fanü chölapan ükükün ruu mail, langataman engol mail, epwe lenien ewe telinimw fän iten aramas, pwe repwe imweimw lon o foleni nöür man won. Iwe, ewe telinimw epwe nom lukalapan. 16 Iei usun ükükün ewe telinimw: Langatamen lepelian me efeng, lepelian me ör, lepelian me ötiu pwal me lotou repwe wewefengen ükükün ruungeröü limepükü rüe iach. 17 Ünükün ewe telinimw epwe wor eu leni mi amassawa, chölapen lepelian me efeng, lepelian me ör, lepelian me ötiu pwal me lotou repwe wewefengen ükükün ipükü faik iach. 18 Iwe, ekewe lusun fanü ünükün ewe leni mi pin, eu a nom lepekin ewe telinimw me ötiu, langataman ükükün rüanü mail, nge pwal eu a nom lepekin me lotou, langataman ükükün rüanü mail. Iwe, chon angangen ewe telinimw repwe manau seni mongön ei leni. 19 Chon ekewe ainangen Israel meinisin mi angang lon ewe telinimw repwe tanipini ewe fanü. 20 Iwe, unusen ewe kinikinin fanü oupwe aimwüela langataman me chölapan repwe wewefengen ükükün engol mail. Iei ewe kinikin, ewe leni mi pin me ewe telinimw repwe nom ie.
21 Iwe, ekewe lusun fanü, ekewe mi nom lesopun me ruu pekin ewe leni mi pin, pwal lepekin lenien ewe telinimw, repwe fanüen ewe samol. Iwe, eu kinikin langataman ükükün engol mail, seni kiännin ewe leni mi pin tori kiännin fanüen ekewe ainangen Israel me ötiu. Nge pwal eu kinikin langataman ükükün engol mail, seni kiännin ewe leni mi pin tori kiännin fanüen ekewe ainangen Israel me lotou. Iei ükükün fanüen ewe samol, nge ewe leni mi pin me ewe Imwenfel repwe nom lukalaper. 22 Iwe, fanüen chon ewe ainangen Lefi pwal ewe telinimw repwe nom lukalapen ekewe kinikinin fanüen ewe samol. Nge fanüen ewe samol epwe pwal nom lefilen fanüen chon ewe ainangen Juta me fanüen chon ewe ainangen Peniamin.
23 Iei fanüen ekewe lusun ainangen Israel: Peniamin epwe fanüeni eu kinikin me lon ewe fanü Israel seni lepelian me ötiu tori lepelian me lotou. 24 Iwe, ünükün ewe fanü Peniamin seni lepelian me ötiu tori lepelian me lotou, Simeon epwe fanüeni eu kinikin. 25 Ünükün ewe fanü Simeon seni lepelian me ötiu tori lepelian me lotou, Isakar epwe fanüeni eu kinikin. 26 Iwe, ünükün ewe fanü Isakar seni lepelian me ötiu tori lepelian me lotou, Sepulon epwe fanüeni eu kinikin. 27 Nge ünükün ewe fanü Sepulon seni lepelian me ötiu tori lepelian me lotou, Kat epwe fanüeni eu kinikin. 28 Iwe lepeliörün ewe fanü Kat kiännin ewe fanü Israel epwe fetal seni Tamar tori ewe kolukun Meripa-Kates, tori ewe öüwön Isip, pwal tori ewe matau watte. 29 Iei usun oupwe aineti ewe fanü ngeni ekewe ainangen Israel pwe repwe fanüeni, pwal iei usun kinikinir,” iei alon Kot ewe Samol mi Lapalap.
Iten ewe telinimw me asamalapan kewe
48.30-35
30 “Iwe, ikei ekewe lenien towu me lon ewe telinimw: Ewe tit mi nom peliefeng langataman ükükün rüengeröü limepükü rüe iach, 31 epwe wor ülüngat asamalap iter Rupen, Juta me Lefi. Pun ekewe asamalap ra iteni iten ekewe ainangen Israel. 32 Ewe tit mi nom peliötiu langataman ükükün rüengeröü limepükü rüe iach, epwe wor ülüngat asamalap iter Josef, Peniamin me Tan. 33 Ewe tit mi nom peliör langataman ükükün rüengeröü limepükü rüe iach epwe wor ülüngat asamalap iter Simeon, Isakar me Sepulon. 34 Ewe tit mi nom pelilotou langataman ükükün rüengeröü limepükü rüe iach epwe pwal wor ülüngat asamalap iter Kat, Aser me Naftali. Pwär 21.12-13 35 Iwe, langatamen unusen tittin ewe telinimw ükükün engol ngeröü walik iach. Nge seni ei otun ewe telinimw epwe iteni: Ewe Samol mi Lapalap a nom ikenan.”

48:34: Pwär 21.12-13