26
Kapasen osuni usun feiengauen Tirus
26.1-21
Lon engol me euin ierin ach oola lon aeuin ränin ewe maram, ewe Samol mi Lapalap a kapas ngeniei, Ais 23.1-18; Sow 3.4-8; Am 1.9-10; Sek 9.1-4; Mat 11.21-22; Luk 10.13-14 “Nöün aramas, chon Tirus ra apasa usun Jerusalem, ‘Ää, a tala Jerusalem. An nemeni angangen sopai ngeni chon ekewe mwü a wes. Iei aipwe wöümongola, pun i a tala.’ Iei mine ngang Kot ewe Samol mi Lapalap üa apasa: Üpwe pälüenuk, Tirus. Üpwe emwenato chomong mwü pwe repwe maun ngonuk, repwe feito usun nonoon lematau mi watte. Repwe atai titum o atomwala imwom kewe imw tekia. Mürin üpwe kümetala pwülün womw, pwe kopwe usun chök eu achau mi lingetä. Iwe, Tirus epwe wiliti eu lenien apwas epilo, pun ngang Kot ewe Samol mi Lapalap üa kapas. Ekewe mwün fanüfan repwe fokun liapenala mettochun lon. Nge chon telinimwan kewe mi nom fän nemenian won ewe fanü watte repwe mäla ren ketilas. Mürin repwe silei pwe ngang ewe Samol mi Lapalap.”
Pun iei usun Kot ewe Samol mi Lapalap a apasa, “Üpwe emwenato Nepukatnesar ewe kingen Papilon, ewe king mi lap seni king meinisin. Epwe feito seni efeng o maun ngeni Tirus fän oris me woken, fän sounfiu mi wawa oris, pwal fän eu mwichemongun sounfiu. Iwe, Nepukatnesar epwe niela chon telinimwom kewe mi nom won ewe fanü watte ren ketilas. Nöün kewe sounfiu repwe aüetä eu tittin maun, repwe senätä eu oror o amolätä ar pisekin epet. Repwe achüngü om kewe tit ren ar kewe mwesinnen kata o aturätiu om kewe imw tekia ren ar kewe pisekin maun. 10 Süsün pwül mi feitä, lupwen ekewe mwicheichen nöür oris ra sä, epwe pwölukela, nge om kewe tit repwe chechech ren akürangen chon wawa oris, pwal ren akürangen chomong sokun woken. Ina usun epwe fis, lupwen Nepukatnesar epwe tolong lon asamalapom usun aramas ra tolong lon eu telinimw mi tala tittin lon maun. 11 Pechen nöün kewe oris repwe puri om kewe al meinisin. Epwe niela noum aramas ren ketilas, nge om kewe ürepin mi pöchökül repwe turula won pwül. 12 Chon Papilon repwe liapenala woum me om pisekin amömö, repwe amökkätiu om kewe tit o ataetiu imwom kewe mi mürina. Nge föün leniom me irän kewe, pwal ekewe mettoch mi ta repwe pöütala leset. 13 Iwe, ngang üpwe aükätiu om köl, nge tikitikin om kitar esap chüen wor. Pwär 18.22 14 Üpwe awili ngonuk eu fanüen achau pwe kopwe eu lenien apwas epilo, nge kosap chüen kaüsefäl, pun ngang ewe Samol mi Lapalap üa kapas.”
15 Iei alon Kot ewe Samol mi Lapalap ngeni Tirus, “Ekewe fanüen aroset repwe chechech ren püngün om turula, lupwen chon kinas ra ngüngü, nge ninni a fis me lukalapom. 16 Mürin, samolun ekewe fanüen aroset meinisin repwe tötiu seni ar lenien motun samol, repwe pwilitawu üfer owokot me üfer mi chü. Iwe, repwe mot won pwül fän chechech, repwe pwal fokun rükö ren mine a fis ngonuk, nge resap fokun ükütiu le chechech. 17 Repwe eäni echö kölün kechü o apasa usum: Ka tala, en telinimw mi fokun iteüöch, aramas mi reepi ra nonom lomw. Me lom en me aramasen leniom oua nemeni matau o eniwokusu chon ekewe fanüen aroset meinisin.
18 Nge iei ekewe fanüen aroset ra chechech lon ewe rän ka turula,
ekewe fanüen lematau ra apilükingau, lupwen ka tala.” Pwär 18.9-10
19 Pun iei usun Kot ewe Samol mi Lapalap a apasa, “Üpwe apöököla usun eu telinimw mi tala esap chüen wor aramas lon, üpwe pwal önütai womw nonoon lematau, pwe sät epwe pwölukela. 20 Üpwe pöütukela lon lenien sotup ren ekewe armasen lom, üpwe pwal anomuk leutun fanüfan lon ekewe leni mi tala seni me lom, pwe kopwe nonom ren chokewe ra fen feitiu lon lenien sotup. Ina usun kosap chüen so, esap pwal chüen wor leniom lon fanüen chon manau. 21 Üpwe fokun afeiengauok, pwe kosap chüen nom. Aramas repwe küttok, nge resap chüen künasefäliik feilfeilachök,” iei alon Kot ewe Samol mi Lapalap. Pwär 18.21

26:1: Ais 23.1-18; Sow 3.4-8; Am 1.9-10; Sek 9.1-4; Mat 11.21-22; Luk 10.13-14

26:13: Pwär 18.22

26:18: Pwär 18.9-10

26:21: Pwär 18.21