21
Nöün Kot ketilas mi seisei
21.1-27
Iwe, ewe Samol mi Lapalap a kapas ngeniei, “Nöün aramas, kopwe newenewen ngeni Jerusalem o eäni kapasen apwüng ngeni ekewe leni mi pin, kopwe pwal osuni usun feiengauen ewe fanü Israel. Kopwe üreni ewe fanü Israel, ‘Iei alon ewe Samol mi Lapalap: Nengeni, üpwe pälüenuk, üpwe üttawu nei ketilas seni lon tükütükün o niela me lomw ekewe chon pwüng me chon pwüngingau meinisin. Iwe, nei ketilas epwe üttüwu seni lon tükütükün, pwe epwe niela aramas meinisin seni ör tori efeng, pun üpwe arosala me lomw ekewe chon pwüng me chon pwüngingau meinisin. Iwe, aramas meinisin repwe silei pwe ngang ewe Samol mi Lapalap, üa üttawu nei ketilas seni lon tükütükün, nge üsap chüen aliwinsefälielong lon.’ Iei mine kopwe ngüngü, nöün aramas. Kopwe ngüngü fän om letipeta ren weiresin letipom me fän meser meinisin. Iwe, lupwen repwe aisinuk, ‘Pwota ka ngüngü?’ kopwe pälüeniir, ‘Pokiten a wor pworaus amairü. Iwe, are epwe fis, leluken aramas meinisin epwe uren niuokus, pöür repwe chök ititiu, pworan letiper epwe kisikisitiu, nge lepwäsukur meinisin repwe chechech.’ Nengeni, a war, epwe fokun pwönüetä,” iei alon Kot ewe Samol mi Lapalap.
Iwe, ewe Samol mi Lapalap a pwal kapas ngeniei, “Nöün aramas, kopwe osuni o apasa, pwe iei aloi ngang ewe Samol mi Lapalap:
Efoch ketilas, efoch ketilas a seisei o misimis,
10 a seisei pwe epwe niela aramas,
a pwal misimis o molupolup usun chök fifi.
Ifa usun, sipwe pwapwa ren?
Ämi nei aramsen Juta, oua turunufasei ai apwüngükemi me ai öüröür ngenikemi.
11 Iei mine ewe ketilas a ken o molotä.
Iei a seim o ken,
pwe epwe nom lepöün ewe chon ninni.
12 Kopwe kechü o ngüngüres, nöün aramas,
pun ewe ketilas epwe fiu ngeni nei aramas,
epwe pwal fiu ngeni ekewe samolun Israel meinisin.
Iwe, irfengen me nei aramas repwe mäla ren.
Iei mine kopwe üwepworotiu fän om letipeta.
13 Üa sotuni nei aramas.
Nge are resap mochen ekieksefäl,
ekei mettoch meinisin repwe fis ngeniir,”
iei alon Kot ewe Samol mi Lapalap.
14 “Iei mine, nöün aramas, kopwe osuni. Kopwe alopolop. Ewe ketilas epwe äkätteri ekewe aramas. Iei ewe ketilas mi amol ngeni ninni watte, ewe ketilas mi nom pwelin ünüküür. 15 Iwe, leluken aramas epwe tur, nge chomong repwe mäla ren ewe ketilas. Üpwe eniwokusuur ren lon asamalapen telinimwer meinisin. Ewer, a molupolup usun chök fifi, a pwal ken pwe epwe ninni. 16 En ketilas, kopwe ätter pelifich me pelimöng, pwal ekis meinisin ia ka kunula ie. 17 Pwal ngang üpwe alopolop o awesi ai lingeringer. Ngang ewe Samol mi Lapalap üa kapas.”
18 Iwe, ewe Samol mi Lapalap a pwal kapas ngeniei, 19 “Nöün aramas, kopwe liosu ruofoch al fän iten ewe ketilas nöün ewe kingen Papilon. Ir me ruofoch repwe pop seni eu chök fanü. Kopwe aüetä efoch asisil lepopun ewe al a ale ngeni eu telinimw. 20 Iwe, kopwe liosu efoch ekewe al pwe ewe ketilas epwe tongeni tori Rapa ewe telinimwen chon Amon. Kopwe pwal liosu efoch, pwe epwe tongeni tori Jerusalem lon ewe fanü Juta, ewe telinimw mi pöchökül tittin. 21 Pun ewe kingen Papilon a üla lekeangen ekewe ruofoch al pwe epwe pwee. Iwe, a wichiki ewe lenien föün likapich, a aisini an kewe uluulun anümwäl o nengeni ammünün an mönün asor. 22 Nge pwüngün ewe pwee mi nom pöüifichin a fän iten Jerusalem. Ikenan epwe eäni kökkön maun fän leüömong, epwe anomu an mwesinnen kata mi weneiti ekewe asamalap, epwe pwal senätä oror o aüetä imwen maun. 23 Iwe, ekewe aramas mi pwon fän akapel ngeni ewe king pwe repwe allükülük, repwe chök ekieki pwe ei pwee a mwäl. Nge i epwe achema ngeniir ar tipis o uweerela pwe repwe oola.
24 Iei mine ngang Kot ewe Samol mi Lapalap üa apasa: Oua föri pwe ämi tipis epwe cheme ngeniei, pun ämi pupungau a pwäpwäla, ämi tipis a pwal pwäla lon ämi föför meinisin. Pokiten oua föri ei, oupwe oola ren ewe king. 25 Nge en samolun Israel mi fokun föföringau, epwe war ränum, ewe ränin om kopwe küna apwüngün lesopolan. 26 Iei aloi ngang Kot ewe Samol mi Lapalap: Repwe angei senuk filifilin mökürom, pwal ewe mwärin king. Mettoch meinisin repwe siwil. Chokewe mi tekison repwe tekia, nge chokewe mi tekia repwe tekison. 27 Üpwe atai, üpwe atai, üpwe atai ewe telinimw. Esap chüen kaüsefäl tori epwe war ätewe mine wesewesen an. Iwe, ngang üpwe awisa ngeni meinisin.”
Ekewe chon Amon ra küna apwüng
21.28-32
28 “Iwe, en nöün aramas, kopwe osuni o apasa pwe iei aloi ngang Kot ewe Samol mi Lapalap usun ekewe chon Amon me ar kapasen turunufasei chon Israel: Efoch ketilas, efoch ketilas a molotä pwe epwe ninni, a mis pwe epwe molupolup usun fifi o niela aramas. 29 Nöümi soufos ra küna mine a mwakel, nge nöümi soupwe ra chofana ngenikemi. Ewe ketilas epwe pökü üen ekewe chon föföringau, a tori ränir, ewe ränin apwüngün lesopolan. 30 Oupwe aliwinalong nöümi ketilas lon tükütükün. Üpwe apwüngükemi lon poputän fanüemi, lon ewe leni ia oua uputiu ie. 31 Üpwe awarato ai song womi, üpwe wusi ngenikemi choun ai lingeringer o asechikemiilong lepöün aramas mi mwänewüs o silelap le kata. 32 Iwe, oupwe karala ren ekkei. Chami epwe suputiu won fanüemi, nge esap wor eman epwe chüen chechemenikemi, pun ngang ewe Samol mi Lapalap üa kapas.” Jer 49.1-6; Is 25.1-7; Am 1.3-15; Sef 2.8-11

21:32: Jer 49.1-6; Is 25.1-7; Am 1.3-15; Sef 2.8-11