39
Üfen ekewe souasor ra för
39.1-31
(Eks 28.1-43)
Iwe, ra tei üf mi mürina seni ekewe mangaku mi arauarau me parachol me parapar fän iten ewe angang lon ewe leni mi pin. Ra tei üf mi pin fän iten Aaron usun ewe Samol mi Lapalap a fen allük ngeni Moses.
Iwe, ra tei ewe üf itan efot seni mangaku mi arauarau me parachol me parapar, pwal seni mangaku mi pwechepwech, ra pwal aea terech kolt. Ra wüsi kolt pwe a chöpöpüla, mürin ra ämetätiu o türünifengeni me ekewe mangaku mi arauarau me parachol me parapar, pwal mangaku mi pwechepwech lon sokopaten fout. Ra föri ruachö chechen won afaren ewe efot o teiretä lekochun me won afaran, pwe ekewe ruu pekin ra pachefengen. Iwe, kiren ewe riri mi nom won ewe efot a usun chök kiren ewe üf, pun a för seni terech kolt me mangaku mi arauarau me parachol me parapar, pwal mangaku mi pwechepwech, usun ewe Samol mi Lapalap a fen allük ngeni Moses. Ra nechei ekewe fau aüchea iter oniks o amaserelong lon lenien ömwöchür seni kolt, ra pwal ruputi iten nöün Israel kewe mwän wor, usun chök rupun won ringen pwau. Iwe, ra amaseretä won chechen won afaren ewe efot, pwe föün ächema iten nöün Israel kewe mwän, usun ewe Samol mi Lapalap a fen allük ngeni Moses.
Mürin ra föri ewe chechen leupw mi mürina seni terech kolt me mangaku mi arauarau me parachol me parapar, pwal mangaku mi pwechepwech, usun chök förün ewe efot. Iwe, ewe chechen leupw a wor ruu säsärin, nge langataman me chölapan ra nönnöfengen ükükür tiu inis. 10 Won ewe cheech ra amasalong rüanü telin fau aüchea. Iwe, won aeuin telin a wor ülüföü fau iter sartius, topas me karpunkel. 11 Nge won aruuen telin a wor ülüföü fau iter emeralt, safaia me taiamont. 12 Iwe, won aülüngatin telin a wor ülüföü fau iter iasint, akit me ametist, 13 nge won aruanün telin a wor ülüföü fau iter peril, oniks me iasper. Ir meinisin ra kamasolong lon lenien ömwöchür kewe seni kolt. 14 Iei usun a wor engol me ruoföü fau aüchea ükükün iteiten nöün Israel kewe mwän. Iwe, iteiten eföü me eföü kewe fau a rup wor iten ekewe engol me ruu ainangen Israel, nge ewe mak a usun chök rupun won ringen pwau. 15 Mürin ra föri selin ewe chechen leupw seni kolt mi mürina usun chök lül mi kon. 16 Ra pwal föri ruu lenien ömwöch pwal ruofoch ring seni kolt o apacheretä lepwokukun won ewe chechen leupw me ruu. 17 Mürin ra riri ekewe ruofoch säl seni kolt ngeni ekewe ruofoch ring mi nom lepwokukun ewe chechen leupw. 18 Nge lesopun ekewe ruofoch säl ra riri ngeni ekewe ruu lenien ömwöch mi nom won ekewe chechen won afaren ewe efot me fän mesan. 19 Iwe, ra pwal föri ruofoch ring seni kolt o apacheretä lepwokukun ewe cheech me fan, pwe repwe nom lefilen ewe cheech me ewe efot. 20 Mürin ra pwal föri ruofoch ring seni kolt o apacheretä lesopun me fän ekewe rüachö chechen won afaren ewe efot me fän mesan, pwe a nom lekochun ewe efot asen ewe riri. 21 Iwe, ra rifengeni ringen ewe chechen leupw ngeni ringen ewe efot ren efoch säl mi arauarau, pwe a nom asen ririn ewe efot, nge esap nükütomotom me won. Iei usun ewe Samol mi Lapalap a fen allük ngeni Moses.
22 Mürin ra tei ewe owokot mi nom fän ewe efot seni chök mangaku mi arauarau. 23 Iwe, leawen ewe owokot a usun chök leawen echö üf, nge ünükün leawan a wor leisin, pwe esap tongeni kam. 24 Nge lepwülün ra teätä uluulun apel seni mangaku mi arauarau me parachol me parapar, pwal mangaku mi pwechepwech. 25 Ra pwal föri pel seni kolt mi mürina o teiretä lefilen ekewe uluulun apel won pwelin lepwülün ewe owokot. 26 A iei usun: eu pel, eföü apel, eu pel, eföü apel won pwelin lepwülün ewe owokot ra üföüf le angang. Iei usun ewe Samol mi Lapalap a fen allük ngeni Moses. 27 Iwe, ra tei ekewe sööch seni mangaku mi mürina o pwechepwech fän iten Aaron me nöün kewe mwän. 28 Ra pwal tei ewe akkaw mi watte me ekewe mi kükün, pwal ekewe rauesesin lon seni mangaku mi mürina o pwechepwech. 29 Nge ewe pelit a för seni mangaku mi mürina o pwechepwech, pwal seni mangaku mi arauarau me parachol me parapar, a pwal chü. Iei usun ewe Samol mi Lapalap a fen allük ngeni Moses.
30 Iwe, ra föri epa mwärämwär mi pin seni kolt mi mürina o ruputi ewe kapas won, “A pin me ren ewe Samol mi Lapalap”. Nge makan a usun rupun won ringen pwau. 31 Mürin ra föti ngeni efoch säl mi arauarau pwe epwe riritiu won ewe akkaw, usun ewe Samol mi Lapalap a fen allük ngeni Moses.
A wesöchüla pisekin ewe imwenfel seni mangaku
39.32-43
(Eks 35.10-19)
32 Iei usun a wesöchüla meinisin angangen ewe imwenfel seni mangaku ia aramas ra churi Kot ie. Iwe, ekewe aramasen Israel ra föri meinisin usun mine ewe Samol mi Lapalap a fen allük ngeni Moses. 33 Ra uwato ewe imwenfel seni mangaku ren Moses, ewe imw mangaku me pisekin meinisin, ökkükün, papan, ömwöchün, üran me alongun. 34 Ra uwato ekewe pwölüpwöl mi kapar seni silin ätemwänin sip, pwal silin man mi mürina me ewe chechen lefil, 35 ewe pworofel ekewe allük ra nom lon fiti ämwärin me öppüngün, 36 ewe chepel me pisekin won meinisin, pwal ewe pilawa mi pin. 37 Ra pwal uwato ewe lenien atittin mi för seni kolt mi mürina fiti laman kewe lon lenien ömwöchür me sokopaten pisekin meinisin, pwal ewe noppuk seni föün olif fän iten alölön, 38 ewe rongen asoren ötüöt seni kolt, ewe löön epit me ewe apach mi pwokus, pwal chechen ewe asamalapen ewe imw mangaku. 39 Mürin ra uwato ewe rongen asoren kek seni piras, äpäwunan seni piras, ämwärin me sokopaten pisekin meinisin, ewe sepien töttöl me motongan, 40 ewe tit mangaku fän iten ewe leni lükün, üran me alongur, chechen asamalapen ewe leni lükün, selin me chüfölün pwal sokopaten pisekin angangen ewe imwenfel seni mangaku ia aramas ra churi Kot ie. 41 Ra pwal uwato ekewe üf mi ling fän iten ekewe souasor mi angang lon ewe leni mi pin, ikkei ekewe üf mi pin fän iten ewe souasor Aaron me nöün kewe mwän, pwe repwe üföüf le föri ar angangen souasor. 42 Iei usun ekewe aramasen Israel ra föri meinisin mine ewe Samol mi Lapalap a fen allük ngeni Moses. 43 Iwe, Moses a ouwasacha ewe angang meinisin o küna pwe ra föri usun mine ewe Samol mi Lapalap a fen allük. Iwe, Moses a afeiöchüür.