1 Iwe, ikkei ekewe kapas meinisin Kot a apasa, 2 “Ngang ewe Samol mi Lapalap om Kot, üa emwenukowu seni ewe fanü Isip, ewe leni ia ra nöünuk amanau ie.

4 Kosap föri uluulun anümwäl fän itom, kosap pwal alapalapa och mettochun pekitä lon läng are och mettochun pekitiu won fanüfan are och mettochun lon lölön failol. 5 Kosap chapetiu ngeniir are fel ngeniir, pun ngang ewe Samol mi Lapalap om Kot eman Kot mi lukomong. Üa liwini än samasam föföringau won nöür kana tori aülüngatin are arüanün tettelin chokana mi oputaei. ✡ Eks 34.17; Lif 19.4; 26.1; Tut 4.15-18; 27.15 6 Nge üa kirikiröch ngeni ngeröün mwirimwirin chokana mi echeniei o aleasochisi ai allük kana. ✡ Eks 34.6-7; Num 14.18; Tut 7.9-10

7 Kosap föüniwäli itei ngang ewe Samol mi Lapalap om Kot. Pun ngang ewe Samol mi Lapalap üpwe ngeni iteiten eman me eman chappen tipisin an föünimwäli itei. ✡ Lif 19.12

8 Kopwe tümwünü ewe ränin sapat pwe kopwe pinini. 9 Wonu rän kopwe akangang o föri om angang meinisin. ✡ Eks 16.23-30; 31.12-14 10 Nge ewe afisuen rän ewe ränin sapat fän itei ngang ewe Samol mi Lapalap om Kot. Kosap föri och angang lon, sap en are noum mwän are noum fefin, sap noum chon angang mwän are chon angang fefin, sap pwal noum man are ewe chon ekis mi nom leäpärum. ✡ Eks 23.12; 31.15; 34.21; 35.2; Lif 23.3 11 Pun lon wonu rän ngang ewe Samol mi Lapalap üa föri läng me fanüfan, pwal matau me meinisin mine a wor lor. Nge lon afisuen rän üa asösö. Iei mine üa afeiöchü ewe ränin sapat o apini. ✡ Ken 2.1-3; Eks 31.17

12 Kopwe asamolu semom me inom, pwe ränin manauom repwe chomongola lon ewe fanü ngang ewe Samol mi Lapalap om Kot üpwe ngonuk. ✡ Tut 27.16; Mat 15.4; 19.19; Mark 7.10; 10.19; Luk 18.20; Ef 6.2; Ef 6.3

17 Kosap mocheniaiti imwen chon arum, kosap pwal mochenia ngeni pwülüen chon arum are ngeni nöün chon angang mwän me chon angang fefin, kosap pwal mocheniaiti nöün kow me nöün aas are meinisin mine chon arum a eäni. ✡ Rom 7.7; 13.9

18 Iwe, lupwen ekewe aramas meinisin ra rong ewe chopulap me tikin ewe rappwa o küna ewe fifi me ewe ötüöt mi ötütä seni ewe chuk, ra niuokus o chechech. Ra ütato me toau 19 o üreni Moses, “En kopwe kapas ngenikem, nge äm aipwe rongorong. Nge Kot esap kapas ngenikem pwe aisap mäla.” 20 Mürin, Moses a üreni ekewe aramas, “Ousap niuokus. Pun Kot a feito pwe epwe sotunikemi, pwe oupwe sopwela le niueiti Kot, nge ousap föri tipis.” ✡ Ipr 12.18-19 21 Iwe, ekewe aramas ra chök ütato me toau, nge Moses a kan ngeni ewe kuchuchol Kot a nom lon.

22 Mürin, ewe Samol mi Lapalap a üreni Moses, “Iei usun mine kopwe eäni kapas ngeni ekewe aramasen Israel: Oua fen püsin küna pwe üa fos ngenikemi seni läng. 23 Ousap föri kot seni silifer lüki, ousap pwal föri kot seni kolt fän itemi. 24 Iwe, oupwe föri eu rongen asor seni pwül fän itei, pwe oupwe eäni ämi asoren kek me asoren kinamwe won seni nöümi sip me kow. Ekewe leni meinisin üa filätä pwe oupwe fel ngeniei ie üpwe feito remi o afeiöchükemi me ie. 25 Nge ika oupwe föri eu rongen asor seni fau, ousap föri seni fau mi fal. Pun ika oua faleer, oua angauala ewe rongen asor. ✡ Tut 27.5-7; Jos 8.31 26 Ousap feitä won ai rongen asor ren latö, pwe ämi selela esap pwätiu won.”