21
Mine chon Israel repwe föri, lupwen ra küna eman mi ninnila
21.1-9
“Iwe, are a fis lon ewe fanü ewe Samol mi Lapalap ämi we Kot epwe ngenikemi pwe oupwe fanüeni, pwe eman a küna eman mi ninnila lemäl, nge esap pwä iö a niela, mürin, nöümi kewe souakom me nöümi kewe soukapwüng repwe feito lon ewe leni. Iwe, repwe aükü toauen ewe leni, ia ewe somä a nom ie, ngeni ekewe telinimw mi nom ünükün. Mürin, ekewe souakom mine telinimwer ewe a kon kan ngeni ewe somä, repwe angei eman nienifön kow esamwo angang o mwärei efoch waas. Iwe, ekewe souakomwen ewe telinimw repwe emwenala ewe nienifön kow lon eu lemol ia a pupu koluk ie, esamwo tu pwülün, esap pwal mwo fot irä won. Iwe, ikenan repwe kupi üen ewe nienifön kow. Mürin, ekewe souasor ir chon ewe ainangen Lefi repwe pwal feito, pun ewe Samol mi Lapalap ämi we Kot a filiretä pwe repwe angang ngeni, repwe pwal afeiöchü aramas fän itan. Iwe, mine ra apasatä lon iteiten kapwüngün fitikoko ika kapwüngün feiengau epwe fis. Mürin, ekewe souakom meinisin seni ewe telinimw mi kon kan ngeni ewe somä repwe talü pöür me won ewe nienifön kow a kupukup üan me lon ewe lemol. Iwe, repwe pwärätä o apasa, ‘Äm aisap nimanauei ei aramas, aisap pwal küna iö a niela. Äm Samol mi Lapalap, kopwe amusala än noum aramasen Israel tipis, chokewe ka angaseer seni Isip. Kosap anomu won noum aramasen Israel tipisin nimanauei eman esap wor an tipis.’ Ren ei ewe tipisin nimanau epwe musala. Iei usun oupwe limetawu seni me leimi tipisin nimanauei eman esap wor an tipis, pun oua föri mine a pwüng fän mesen ewe Samol mi Lapalap.”
Mine chon Israel repwe föri ngeni fefin mi oola lon maun
21.10-14
10 “Iwe, a tongeni fis pwe ka feila maun ngeni chon oputom, nge ewe Samol mi Lapalap a atolongeer lepoum pwe kopwe liapeniir. 11 Are ka küna me lein ekewe chon oola eman fefin mi liöch pwe ka sani o mochen angei pwe pwülüom, 12 kopwe emwenala neminewe lon imwom. Iwe, ewe fefin epwe reipöpöla möküran o fichiela ükkün, 13 epwe pwal pwilitawu üfan a üföüf lupwen an oola o nonom lon imwom, pwe epwe kechüeiti saman me inan lon ükükün eu maram. Mürin ka tongeni pwülüeni, nge i epwe pwülüom. 14 Nge are a fis pwe kosap chüen sani me mürin, kopwe mwüt ngeni pwe epwe feila ia a mochen feila ie. Nge kosap amömöla neminewe ren moni, kosap pwal föri ngeni usun mine ka föri ngeni eman amanau, pun ka fen kon ren.”
Allük usun ekewe mwänichi
21.15-17
15 “Iwe, are eman mwän a pwülüeni ruoman fefin, eman a tongei, nge eman esap sani, mürin ir me ruoman ra nöünöü me won. Nge are neminewe ewe mwän esap sani a nöüni ewe mwänichi, 16 mürin, lupwen epwe ineti wöün ngeni nöün kewe mwän, esap tongeni ngeni ätewe nöün neminewe a tongei ewe wisen mwänichi, nge epwe ngeni ätewe nöün neminewe esap sani, pun i wesewesen mwänichi. 17 Iwe, epwe föri pwüngün inetin mwänichi ngeni ewe mwänichi nöün neminewe esap sani ren an epwe ngeni ruu inetin seni meinisin mine a eäni. Pokiten i aemanün nöün lon an pöchökül, iei mine ewe wisen mwänichi an.”
Mine epwe fis ngeni ät mi lükümach
21.18-21
18 “Iwe, are eman mwän a nöüni eman ät mi tipeförea o lükümach, esap mochen aleasochisi alon saman ika inan, are ra fen emiriti, nge esap fokun aleasochsiir, 19 mürin saman me inan repwe angei o emwenala ren ekewe souakomwen an we telinimw pwe epwe kapwüng. 20 Iwe, repwe üreni ekewe souakom, ‘Iei i nöüm mi tipeförea o lükümach, esap mochen aleasochisi alom, a mongömong o ünüpuch.’ 21 Mürin, mwänin ewe telinimw meinisin repwe monei ngeni fau tori a mäla. Iei usun oupwe atowu ewe mi ngau seni leimi. Iwe, chon Israel meinisin repwe rong usun o niuokus.”
Ekoch sokun allük
21.22-22.12
22 “Iwe, are eman mwän a föri eu föför mi fokun ngau pwe a tipisin mäla ren, nge mürin ra niela o eitiuätä won efoch irä, 23 inisin esap tongeni nom won ewe irä lon unusen ewe pwin. Nge kopwe peiaseni ewe mwän lon ewe chök ränin, pun eman aramas mi itiuätä won irä a anümamau me ren Kot. Kosap alimengaua ewe fanü ewe Samol mi Lapalap epwe ngonuk pwe kopwe fanüeni. Kal 3.13

21:23: Kal 3.13