13
Eman soufos seni Juta a apwüngü Jeropoam
13.1-34
Iwe, lupwen Jeropoam a ütä ren ewe rongen asor, pwe epwe föri an asor, eman nöün Kot soufos seni Juta a tori Petel fän alon ewe Samol mi Lapalap. Ewe soufos a kökkö ngeni ewe rongen asor fän alon ewe Samol mi Lapalap o apasa, “Rongen asor, rongen asor, iei alon ewe Samol mi Lapalap: Eman ät epwe uputiu me lon ewe familien Tafit itan Josia. Ätewe epwe eäni asor womw ekewe souasor seni ekewe lenien fel won ekewe leni mi tekia, ir ätekewe ra föri ar asor womw. Nge chün aramas repwe kek womw.” 2.King 23.15-16 Mürin, ewe soufos a föri eu asisil o apasa, “Iei ewe asisil ewe Samol mi Lapalap a kapas usun: Ewe rongen asor epwe möküfesen, nge falangen won epwe niiniitiu.” Nge lupwen ewe king a rongorong än ewe soufos kapas ngeni ewe rongen asor lon Petel, a aitiewu pöün me ünükün ewe rongen asor o üra, “Oupwe turufi ätenan.” Lon ewe chök otun pöün Jeropoam we mi itini ngeni ewe soufos a mä, pwe esap chüen tongeni pworesefälielong. Iwe, ewe rongen asor a möküfesen, nge ewe falang a niiniitiu me won, usun ewe soufos a fen kapas won fän alon ewe Samol mi Lapalap. Mürin, ewe king a üreni ewe soufos, “Kose mochen kopwe tüngorei ewe Samol mi Lapalap om we Kot, pwe epwe ümöümöch ngeniei o iotek fän itei pwe pei epwe manausefäl.” Iwe, ewe soufos a tüngor ngeni ewe Samol mi Lapalap, nge pöün ewe king a manausefäl pwe a usun chök me mwan. Iwe, ewe king a üreni ewe soufos, “Kopwe etiei lon imwei pwe kopwe chünuk, nge ngang üpwe ngonuk eu lifang.” Nge ewe soufos a üreni ewe king, “Are kopwe fen fang ngeniei esopun woum, üsap etuk. Üsap fokun mongö ika ün och me lon ei leni. Pun ewe Samol mi Lapalap a allük ngeniei pwe üsap mongö ika ün och, üsap pwal liwinsefäliti ewe al üa feila won.” 10 Iei mine a feila won efoch al, nge esap liwinsefäliti ewe al a feila won tori Petel.
11 Lon ei fansoun a wor eman soufos chinlap lon Petel. Iwe, nöün kewe mwän ra feito ren o apworausa ngeni meinisin mine ewe soufos seni Juta a föri me lon Petel lon ewe rän, pwal mine a apasa ngeni ewe king. 12 Mürin, semer we a aisiniir, “Meni al ewe mwän a pwerela won?” Nöün kewe mwän ra aiti ngeni ewe al ewe soufos seni Juta a pwerela won. 13 Iwe, a üreni nöün kewe mwän, “Oupwe rietä ewe lenien mot won nei we aas.” Mürin ar rietä ewe lenien mot won nöün we aas, a mottiu won 14 o tapwela mürin ewe soufos seni Juta. A tori, lupwen a momot fän efoch irä ook. Iwe, a aisini, “Ifa usun, en ewe soufos mi feito seni Juta?” Ätewe a pälüeni, “Ewer, ngang.” 15 Mürin a üreni, “Kopwe etiei lon imwei pwe kopwe mongö.” 16 Nge ewe soufos seni Juta a üreni, “Üsap tongeni etuk le liwinla lon imwom, üsap pwal tongeni etuk le mongö ika ün och me lon ei leni. 17 Pun ewe Samol mi Lapalap a allük ngeniei pwe üsap mongö ika ün och me ikenan, üsap pwal liwinsefäliti ewe al üa feila won.” 18 Iwe, ewe soufos chinlap a üreni ewe soufos seni Juta, “Ngang pwal eman soufos usun en. Eman chon läng a kapas ngeniei fän alon ewe Samol mi Lapalap o üra pwe üpwe aliwinisefäliikela lon imwei, pwe kopwe mongö o ün rei.” Nge ewe soufos chinlap a chofana ngeni. 19 Iei mine ewe soufos seni Juta a eti le liwinsefäl, a pwal mongö o ün lon imwan.
20 Iwe, lupwen ra mot ngeni chepel, alon ewe Samol mi Lapalap a tori ewe soufos chinlap mi aliwinisefäli ewe soufos seni Juta. 21 A kapas leüömong ngeni ewe soufos seni Juta, “Iei alon ewe Samol mi Lapalap: Pokiten ka aleasolap ngeni alon ewe Samol mi Lapalap om we Kot o tümwününgauei an allük, 22 ka pwal liwinsefäl pwe kopwe mongö o ün lon ei leni a kapas ngonuk usun pwe kosap mongö o ün lon, iei mine kopwe mäla, nge inisum esap peias lon peiasen om kewe lewo.” 23 Iwe, wesin an mongö o ün, ewe soufos chinlap a rietä ewe lenien mot won eman aas fän iten ewe soufos seni Juta o aliwinisefäli. 24 Nge lupwen ätewe a feila, eman laion a churi won al o niela. Iwe, inisin a nom won ewe al, nge ewe aas me ewe laion ra ütä ünükün. 25 Nge ekoch aramas mi pwerela ra küna inisin ewe soufos seni Juta won ewe al, pwal ewe laion a ütä ünükün. Ra tori ewe telinimw ia ewe soufos chinlap a imweimw ie, o apworausa ei pworaus.
26 Iwe, lupwen ewe soufos chinlap mi aliwinisefäli ewe soufos seni Juta a rong usun, a apasa, “Iei i ewe soufos mi aleasolapa alon ewe Samol mi Lapalap. Iei mine ewe Samol mi Lapalap a tinato ewe laion pwe epwe niela, usun a fen kapas ngeni me mwan.” 27 Mürin, ewe soufos chinlap a üreni nöün kewe mwän, “Oupwe rietä ewe lenien mot won nei we aas.” Iwe, ra rietä ewe lenien mot won nöün we aas. 28 Mürin, a feila o küna inisin ewe soufos seni Juta a chüen nom won ewe al, nge ewe aas me ewe laion ra ütä ünükün. Ewe laion esap ochei ewe inis, esap pwal niela ewe aas. 29 Iwe, ewe soufos chinlap a angei inisin ewe soufos seni Juta, a anomu won ewe aas o aliwinisefäliela Petel, pwe epwe kechüeiti o peiaseni. 30 Mürin a peiaseni ewe somä lon püsin peiasan. Nge ewe soufos chinlap me nöün kewe mwän ra kechüeiti o apasa, “Wokoo, pwii, pwii.” 31 Iwe, wesin an peiaseni, a üreni nöün kewe mwän, “Are üpwe mäla, oupwe peiaseniei lon peiasen ei soufos seni Juta. Oupwe anomu chüi lükün chün. 32 Pun mine a apasa fän alon ewe Samol mi Lapalap usun ewe rongen asor lon Petel pwal usun ekewe lenien fel mi nom lon ekewe telinimwen Samaria epwe fokun fis.”
33 Mürin fisitän ekei pworaus, Jeropoam esap kul seni an föför mi ngau, nge a chök seikätä souasor me lein ekewe aramas meinisin fän iten ekewe lenien fel won ekewe leni mi tekia. A apini iteiten eman me eman mi chök mochen pwe epwe souasorun ekewe lenien fel. 34 Iei ewe tipis chon leimwen Jeropoam ra tur lon, a awarato wor feiengau me mäla pwe ra rosola seni won fanüfan.

13:2: 2.King 23.15-16