141
1 Ko e lotu ʻa Tevita ke maʻu ʻene kole ʻe he ʻOtua, 3 Ke māʻoniʻoni hono loto, 7 Pea ke hao ʻa ʻene moʻui mei he ngaahi tauhele.
Ko e Saame ʻa Tevita.
‌ʻE Sihova, ʻoku ou tangi kiate koe:
ke ke haʻu vave kiate au;
fakafanongo ki hoku leʻo, ʻo kau ka tangi kiate koe.
Ke aʻu atu ʻeku lotu ki ho ʻao ʻo hangē ko e meʻa namu kakala;
mo e hiki hake ʻo hoku nima ʻo hangē ko e feilaulau ʻoe efiafi.
‌ʻE Sihova, fakanofo ʻae leʻo ki hoku ngutu;
tauhi ʻae matapā ʻo hoku loungutu.
‌ʻOua naʻa ueʻi hoku loto ki ha meʻa kovi ʻe taha,
ke fai ʻae ngaahi ngāue kovi mo e kau tangata ʻoku fai kovi:
pea ʻoua naʻa tuku ke u kai ʻi heʻenau ngaahi meʻa lelei.
Ke taaʻi au ʻe he angatonu; pea ko e ʻofa ia:
pea tuku ke ne valokiʻi au; ko e lolo lelei ia, ʻaia ʻe ʻikai foa ai hoku ʻulu:
he ko ʻeku lotu foki ʻe fai ia ʻi heʻenau ngaahi mamahi.
‌ʻOka hinga ʻenau kau fakamaau ʻi he ngaahi potu tokatāmaki,
tenau fanongo ki heʻeku ngaahi lea; he ʻoku melie ia.
Kuo movetevete hotau ngaahi hui ʻi he ngutu ʻoe faʻitoka,
ʻo hangē ko e taaʻi ʻo mafahi ʻe he taha ʻae ʻakau ʻi he funga ʻoe fonua.
Ka ʻoku hanga hoku mata kiate koe,
ʻE Sihova ko e ʻEiki: ʻoku ou falala kiate koe;
ʻoua naʻa ke siʻaki hoku laumālie.
Taʻofi au mei he ngaahi tauhele kuo nau ʻai kiate au,
mo e ngaahi meʻa fakauʻu, ʻae kakai fai kovi.
10 Tuku ke tō ʻae angahala ki he ngaahi kupenga ʻanautolu,
ʻi he lolotonga ʻo ʻeku hao mei ai.