Tongan Bible (Revised West Version) Lea Fakatātā 18
18
1–24 Pea hokohoko atu ki he ngaahi vahe hoko...
Ko e meʻa ʻi he holi ki ai ʻae tangata,
ʻoku ne vaheʻi ia ke ne kumi mo kau ʻi he poto kotoa pē.
‌ʻOku ʻikai fiefia ʻae vale ʻi he ʻilo,
ka koeʻuhi ke fakahā ʻaki ia hono loto.
‌ʻOka hoko mai ʻae angahala ʻoku haʻu mo ia ʻae manukia,
pea mo e ongoongo kovi mo e valokia.
‌ʻOku hangē ko e ngaahi vai loloto ʻae ngaahi lea mei he ngutu ʻoe tangata,
pea ʻoku tatau ʻae matavai ʻoe poto mo e pā ʻae vaitafe.
‌ʻOku ʻikai lelei ia ke fili ki he tangata ʻoku angahala,
kae fakahinga ai ʻae māʻoniʻoni ʻi he fakamaau.
‌ʻOku kau ʻae loungutu ʻoe vale ʻi he kē,
pea ʻoku ui mai hono ngutu ke taaʻi ia.
Ko e ʻauhaʻanga ʻoe vale ʻa hono ngutu,
pea ko e tauhele ki hono laumālie ʻa hono loungutu.
Ko e ngaahi lea ʻae tangata faʻa fafana ʻoku hangē ia ko e ngaahi makafokafo,
pea ʻoku ʻasi mai ia ki he kakano ʻoe loto.
Ko ia ʻoku fakapikopiko ʻi heʻene ngāue,
ko e tokoua ia ʻoʻona ʻoku faʻa maumau meʻa.
10 Ko e fale māʻolunga mo mālohi ʻae huafa ʻo Sihova:
ʻoku hola ki ai ʻae māʻoniʻoni, ʻo ne moʻui ai.
11 Ko e kolo mālohi ʻae tangata koloaʻia ko ʻene koloa,
pea ʻoku tatau ia ʻi heʻene mahalo ʻaʻana mo e fuʻu ʻā māʻolunga.
12 ‌ʻOku muʻomuʻa ʻi he fakaʻauha ʻae fielahi ʻi he loto ʻae tangata,
pea ʻoku muʻomuʻa ʻae angavaivai ʻi he hakeakiʻi.
13 Ko ia ʻoku kau ke lea ʻi ha meʻa ʻi he teʻeki te ne fanongo ki ai,
ko e vale mo e fakamā ia kiate ia;
14 ‌ʻE faʻa kātakiʻi ʻe he laumālie ʻoe tangata haʻane vaivai;
ka ko hai ʻoku faʻa kātakiʻi ʻae laumālie kuo lavea?
15 ‌ʻOku maʻu ʻe he loto ʻoe fakamākukanga ʻae poto:
pea ʻoku kumi ki he ʻilo ʻe he telinga ʻoe poto.
16 ‌ʻOku fakaʻataʻatā ʻae hala ʻoe tangata ʻoku faʻa foaki,
pea ʻoku ʻomi ai ia ki he ʻao ʻoe houʻeiki.
17 Ko ia ʻoku muʻomuʻa ʻi heʻene meʻa ʻaʻana ʻoku matamata totonu:
ka ʻi he haʻu ʻa hono kaungāʻapi ʻoku ne ʻahiʻahiʻi ia.
18 ‌ʻOku fakangatangata ʻi he fai ʻoe talotalo ʻae fakakikihi,
ʻo ne vahevahe ki he kakai mālohi.
19 ‌ʻOka koviʻia ʻae loto ʻoe tokoua ʻo ha taha,
ʻoku faingataʻa lahi hake ia ʻi ha kolo ʻoku mālohi:
pea ko ʻena fekeʻikeʻi ʻoku hangē ia ko e ngaahi songo ʻoe kolo.
20 ‌ʻE fakamākona ʻae kete ʻoe tangata ʻaki ʻae fua ʻo hono ngutu:
pea ʻe fakafonu ia ʻaki ʻaia ʻoku tupu mei hono loungutu.
21 ‌ʻOku ʻi he ʻelelo ʻae pule ki he mate mo e moʻui:
pea ko kinautolu ʻoku ʻofa ki ai te nau kai ʻa hono fua.
22 Ko e tangata ʻoku ne maʻu hono ʻunoho ʻoku maʻu ʻe ia ʻae lelei,
ʻoku ne maʻu ai ʻae lelei ʻi he ʻao ʻo Sihova.
23 ‌ʻOku fakakolekole ʻe he masiva;
ka ʻoku tali fakamālohi ʻe he koloaʻia.
24 Ko e tangata ʻoku ai hono ngaahi kāinga ʻoku ngali ke ne fai fakakāinga ʻe ia;
pea ʻoku ai ʻae tākanga ʻoku pikitai mālohi hake ʻi ha tokoua.