Tongan Bible (Revised West Version) Lea Fakatātā 5
5
1 ʻOku enginaki ʻe Solomone ke tokanga ki he poto. 3 ʻOku ne fakahā hono kovi ʻoe feʻauaki mo e fakamaveuveu. 15 ʻOku ne enginaki ki he anganofo, mo e faʻa foaki, pea mo e fai māʻoniʻoni. 22 ʻOku moʻua ʻae angahala ʻi heʻenau kovi ʻanautolu pe.
‌ʻE hoku foha, tokanga ki heʻeku poto,
pea ke fakaongo ho telinga ki heʻeku ʻilo:
Koeʻuhi ke ke tokangaʻi ʻae fakapotopoto,
pea ke maʻu pe ʻi ho loungutu ʻae ʻilo.
He ʻoku toʻi ʻae loungutu ʻoe fefine muli ʻo hangē ko e ngeʻesi ʻoe honi,
pea ʻoku molemole lahi hake ʻi he lolo ʻa hono ngutu:
Ka ʻoku tatau mo e kona ʻīʻī ʻa hono ikuʻanga,
ʻo māsila ʻo hangē ha heletā fakatoumata.
‌ʻOku ʻalu hifo hono vaʻe ki he mate,
ʻoku fakatau atu ʻa ʻene ngaahi laka ki heli.
Pea telia naʻa ke fakakaukau ki he hala ʻoe moʻui,
ʻoku fakafihi ʻe ia hono ngaahi ʻaluʻanga, ke ʻoua naʻa ke ʻiloʻi ia.
Ko ia ʻae fānau, ke mou fanongo kiate au,
pea ʻoua naʻa mou hē mei he ngaahi lea ʻa hoku ngutu.
Ke fakamamaʻo ʻaupito ho hala meiate ia,
pea ʻoua naʻa ke ofi ki he matapā ʻo hono fale:
Telia naʻa ke foaki ho ongolelei ki ha kakai kehe,
pea moho ngaahi taʻu ki he kakai loto fakafasifasi:
10 Telia naʻa pito ʻae kau muli ʻi ho ʻi mālohi;
pea ʻe ʻi he fale ʻoe muli hoʻo ngaahi ngāue;
11 Pea ke tangi mamahi ʻamui,
ʻoka kai ʻo ʻosi ho kakano mo ho sino,
12 ‌ʻo ke pehē ai, “ʻOiauē, naʻe lahi ʻeku fehiʻa ki he akonaki,
pea naʻe manukiʻi ʻe hoku loto ʻae valoki;
13 Pea naʻe ʻikai teu talangofua ki he leʻo ʻo hoku kau akonaki,
pe fakatokangaʻi hoku telinga kiate kinautolu naʻa nau ako kiate au!
14 Naʻaku meimei kau ʻi he kovi kotoa pē,
ʻi he lotolotonga ʻoe haʻohaʻonga mo e fakatahaʻanga.”
15 Inu ʻae vai mei ho lepa pe ʻoʻou,
mo e vaitafe mei he vai keli pe ʻoʻou.
16 Ke tafe atu ho ngaahi mangamangaʻi vai,
mo e vaitafe ʻoe ngaahi vai ki he ngaahi hala.
17 Ke tuku ia ko hoʻo meʻa ʻaʻau pe,
pea ʻoua naʻa kau ai mo koe ha muli.
18 Ke monūʻia ho matavai:
pea ke fiefia koe ʻi ho ʻunoho ʻaia naʻa ke maʻu ʻi hoʻo kei talavou.
19 Ke tatau pe ia mo e hainite ʻofa mo e kāseli fakaʻofoʻofa;
pea ke fiemālie maʻuaipē koe ʻi hono fatafata;
pea ke fakafiefiaʻi koe ʻi he ʻaho kotoa pē ʻi heʻene ʻofa.
20 ‌ʻE hoku foha, ko e hā ka ke ka hē ai ʻi he fefine muli,
pea fāʻufua ki he fatafata ʻoe muli?
21 He ʻoku tokaimaʻananga ʻi he ʻao ʻo Sihova ʻae ngaahi hala ʻoe tangata,
pea ʻoku vakai ʻe ia ʻa hono ngaahi ʻaluʻanga.
22 ‌ʻE moʻua ʻae angahala ʻi heʻene ngaahi hia ʻaʻana,
pea ʻe haʻisia ʻaki ia ʻae afo ʻo ʻene angahala.
23 ‌ʻE mate taʻeakonekina ia;
pea ʻe hē ia ko e meʻa ʻi he lahi ʻo ʻene vale.