Tongan Bible (Revised West Version) Maika 6
6
1 Ko e fakamaau ʻe he ʻEiki, ko e meʻa ʻi he taʻeʻofa, 6 Mo e taʻeʻilo, 10 Mo e fai taʻetotonu, 16 Pea mo e tauhi tamapua.
Mou fanongo mai ki he meʻa ʻoku folofola ki ai ʻa Sihova;
“Tuʻu hake, pea ke fai ʻi he ʻao ʻoe ngaahi moʻunga,
pea ke fanongo ʻae ngaahi tafungofunga ki ho leʻo.
Fanongo ʻakimoutolu ʻae ngaahi moʻunga ki he fakamaau ʻae ʻEiki,
mo kimoutolu ʻae ngaahi tuʻunga mālohi ʻo māmani;
he ʻoku ai ʻae fakamaau ʻae ʻEiki mo hono kakai,
pea te ne fakamatala mo ʻIsileli.
‌ʻE hoku kakai, Ko e hā kuo u fai kiate koe?
Pea kuo u fakafiuʻi ko e ʻi he hā?
Fakamatala mai!
He ne u ʻomi koe mei he fonua ko ʻIsipite,
pea ne u huhuʻi koe mei he fale ʻoe kau tamaioʻeiki,
pea ne u fekau ʻa Mōsese, mo ʻElone, mo Miliami ke ʻalu ʻi ho ʻao.
‌ʻE hoku kakai, manatu eni ki he meʻa naʻe fakakaukau ki ai ʻe Pelaki, ko e tuʻi ʻo Moape,
pea mo ia naʻe tali ʻaki ʻe Pelami ko e foha ʻo Peoli, mei Sitimi, ʻo aʻu ki Kilikali;
koeʻuhi ke mou ʻilo ʻae māʻoniʻoni ʻa Sihova.”
 
Te u ʻunuʻunu atu mo e ha kia Sihova,
mo fakatōmapeʻe au ʻi he ʻao ʻoe ʻOtua Māʻolunga?
Te u ʻalu ki hono ʻao mo e ngaahi feilaulau tutu,
mo e fanga ʻuhiki pulu ʻoku taha taʻu?
‌ʻE fiemālie ʻa Sihova ʻi he ngaahi toko afe ʻoe sipitangata,
pe ʻi he ngaahi vaitafe lolo ʻe taha mano?
ʻE ʻatu ʻeku ʻuluaki, koeʻuhi ko ʻeku ngaahi hia;
ʻae fua ʻo hoku sino, koeʻuhi ko e angahala ʻa hoku laumālie?
Kuo ne fakahā kiate koe, ʻe tangata ʻaia ʻoku lelei;
pea ko e hā ʻoku ʻamanaki ʻe Sihova ʻiate koe, ka koeʻuhi ke ke fai totonu
mo ke loto ki he ʻofa, mo ke ʻaʻeva mo ho ʻOtua ʻi he angavaivai?
 
Ko e leʻo ʻo Sihova ʻoku ui ki he kolo,
pea ʻe mamata ki ho huafa ʻe he tangata poto:
“Fanongo ʻakimoutolu ki he meʻa tā,
pea mo ia kuo ne tuʻutuʻuni ia.
10 ‌ʻOku kei ʻi he fale ʻoe angahala ʻae koloa ʻoe angahala,
mo e meʻa fua nounou ʻaia ʻoku fakalielia?
11 Te u lau ʻakinautolu ko e maʻa ka ʻoku ʻi ai ʻae ngaahi meʻa fakamamafa kākā,
pea mo e kato meʻa fakamamafa kākā?
12 He ʻoku pito ʻi he fakamālohi ʻae kau tangata koloaʻia ʻi ai,
pea kuo lea loi ʻae kakai ʻo ia;
pea ʻoku kākā ʻa honau ʻelelo ʻi honau ngutu.
13 Ko ia foki te u fakamamahiʻi koe ʻi ho faʻa taaʻi,
ʻi he ngaohi koe ke lala, koeʻuhi ko hoʻo ngaahi angahala.
14 Te ke kai, ka ʻe ʻikai te ke mākona,
pea ʻe ʻi ho lotolotonga ʻa hoʻo fakahifo ki lalo;
pea te ke puke ka ʻe ʻikai te ke fakahaofi;
pea ko ia ʻoku ke fakahaofi, te u tukuange ki he heletā.
15 Te ke tūtuuʻi ka ʻe ʻikai te ke tuʻusi;
te ke malaki ʻae ʻolive, ka ʻe ʻikai te ke takai koe ʻaki ʻae lolo;
pea mo e uaine melie, ka ʻe ʻikai te ke inu uaine.
16 He kuo maʻu pe ʻae ngaahi fono ʻa ʻOmili,
pea mo e ngaahi ngāue ʻae fale ʻo ʻEhapi,
pea ʻoku mou ʻeveʻeva ʻi heʻenau ngaahi fakakaukau;
koeʻuhi ke u ngaohi kimoutolu ke lala,
pea mo e kakai ʻo ia ko e fakaʻiseʻisa:
ko ia te mou fua ai ʻae manuki ʻa hoku kakai.”