Tongan Bible (Revised West Version) Tangilāulau 3
3
1 ʻOku tangi ʻae kau fai totonu koeʻuhi ko ʻenau ngaahi mamahi. 22 Ko e meʻa ʻi he ʻaloʻofa ʻae ʻEiki ʻoku tuʻumaʻu ʻenau ʻamanaki. 37 ʻOku nau fakahā ʻae angatonu ʻae ʻOtua. 55 ʻOku nau kole ʻae fakahaofi, 64 Mo e tautea ki honau kau fili.
Ko au ko e tangata kuo mamata ki he mamahi
ʻi he meʻa tā ʻa hono houhau.
Kuo ne tataki au mo ʻomi au ki he poʻuli,
kae ʻikai ki he maama.
Ko e moʻoni kuo ne liliu kiate au,
ʻoku ne liliu hono nima kiate au ʻi he ʻaho kotoa.
Ko hoku kili mo hoku kakano kuo ne ngaohi ke motuʻa;
kuo ne fesiʻi hoku ngaahi hui.
Kuo ne langaʻi meʻa kiate au,
pea kuo ne takatakai au ʻaki ʻae kona mo e mamahi.
Kuo ne fokotuʻu au ʻi he ngaahi potu fakapoʻuli,
ʻo hangē ko kinautolu naʻe pekia ʻi muʻa.
 
Kuo ne ʻāʻi takatakai au pea ʻoku ʻikai te u faʻa hao kituʻa:
kuo ne fakamamafa ʻa ʻeku haʻi ukamea.
‌ʻO kau ka tangi foki mo kalanga,
ʻoku ne taʻetokangaʻi ʻeku kole.
Kuo ne ʻāʻi hoku ngaahi hala ʻaki ʻae ngaahi maka kuo tā,
kuo ne fakapikoʻi hoku ngaahi hala.
10 Naʻa ne hangē ha pea ʻoku toitoi kiate au,
pea hangē ha laione ʻi he ngaahi potu lilo.
11 Kuo ne mimioʻi hoku ngaahi ʻaluʻanga,
pea kuo ne haehae au fakaikiiki:
kuo ne ngaohi au ke lala pe.
12 Kuo ne teke ʻa ʻene kaufana,
pea kuo ne fokotuʻu au ko e fakaʻilonga ki he ngahau.
 
13 Kuo ne pule ki he ngaahi ngahau ʻo ʻene tangai ke ʻasi ki hoku ngaahi kongaloto.
14 Ko e manukiʻanga au ki hoku kakai;
pea ko ʻenau tāʻanga ʻi he ʻaho kotoa pē.
15 Kuo ne fakafonu au ʻaki ʻae kona,
kuo ne fakakonaʻi au ʻaki ʻae konaʻiʻī.
 
16 Kuo ne fesiʻi foki hoku kau nifo ʻaki ʻae kilikili,
kuo ne pani au ʻaki ʻae efu.
17 Pea kuo ke hiki hoku laumālie ke mamaʻo mei he melino:
naʻe ngalo ʻiate au ʻae monūʻia.
18 Pea ne u pehē, “Ko ʻeku mālohi
mo ʻeku ʻamanaki kuo ʻauha meia Sihova;”
 
19 ‌ʻI heʻeku manatu ki hoku mahaki pea mo ʻeku mamahi, ʻae kona pea mo e ʻahu.
20 ‌ʻOku kei manatu ki ai hoku laumālie, pea ʻoku angavaivai ia ʻiate au.
 
21 Ko ia ʻoku ou fakamanatu ki hoku loto,
pea ko ia ʻoku ou kei maʻu ai ʻae ʻamanaki.
22 Ko e meʻa ʻi he ʻaloʻofa ʻa Sihova ʻoku ʻikai te tau ʻauha,
koeʻuhi ʻoku ʻikai ke ngata ʻene manavaʻofa.
23 ‌ʻOku foʻou ia ʻi he pongipongi kotoa pē,
ʻoku lahi hoʻo angatonu.
24 ‌ʻOku pehē ʻe hoku laumālie, “Ko hoku tofiʻa ʻa Sihova:
ko ia te u ʻamanaki lelei ʻiate ia.”
25 ‌ʻOku lelei ʻa Sihova kiate kinautolu ʻoku tatali kiate ia,
ki he laumālie ʻoku kumi kiate ia.
26 ‌ʻOku lelei ki he tangata ke ne ʻamanaki,
pea ne tatali fakatatoka foki ki he fakamoʻui meia Sihova.
27 ‌ʻOku lelei ki he tangata ke ne fua ʻae haʻamo ʻi heʻene kei talavou.
 
28 ‌ʻOku ne nofo tokotaha pe, pea ʻoku longo pe,
koeʻuhi kuo ne fua ia ʻe ia pe.
29 ‌ʻOku ne ʻai hono ngutu ʻi he efu,
ko e meʻa naʻa ʻoku kei ai ha ʻamanaki.
30 ‌ʻOku ne tuku hono kouʻahe kiate ia ʻoku ne taaʻi ia:
ʻoku ne pito ʻaupito ʻi he lauʻi kovi.
 
31 He koeʻuhi ʻe ʻikai liʻaki ke lauikuonga ʻe Sihova:
32 He kapau te ne fakamamahi,
ka te ne manavaʻofa foki ʻo fakatatau ki hono lahi ʻo ʻene ngaahi ʻaloʻofa.
33 He ʻoku ʻikai te ne fie tautea,
pe fakamamahi ʻae fānau ʻae tangata.
 
34 Ke laiki ʻi hono lalo vaʻe ʻae ngaahi pōpula kotoa pē ʻo māmani,
35 Ke fakatafe ʻae totonu ʻoe tangata ʻi he ʻao ʻoe fofonga ʻoe Fungani Māʻoniʻoni,
36 Ke kākaaʻi ʻae tangata ʻi hono fakamaauʻi ʻoku ʻikai lelei ai ʻa Sihova.
 
37 Ko hai ia ʻoku fakahā, pea ʻoku hoko ia,
ʻo kapau ʻoku ʻikai ke fekau ʻe Sihova?
38 ‌ʻOku ʻikai ke ʻalu mei he fofonga ʻoe Fungani Māʻolunga ʻae lelei mo e kovi.
39 Ko e hā ʻoku lāunga ai ʻae tangata moʻui,
ʻae tangata koeʻuhi ko e tautea ʻo ʻene ngaahi angahala?
 
40 Ke tau kumi mo ʻahiʻahiʻi hotau ngaahi ʻaluʻanga,
pea toe tafoki kia Sihova.
41 Ke tau hiki hake hotau loto mo hotau nima ki he ʻOtua ʻi he ngaahi langi.
42 “Kuo mau fai talangataʻa, pea kuo mau angatuʻu:
ʻoku teʻeki ai te ke fakamolemole.
 
43 “Kuo ke ʻuʻufi ʻaki ʻae houhau,
pea fakatangaʻi ʻakimautolu:
kuo ke tāmateʻi pea naʻe ʻikai te ke manavaʻofa.
44 Kuo ke ʻufiʻufi koe ʻaki ʻae ʻao,
ke ʻoua naʻa ʻasi atu ʻa ʻemau kole.
45 Kuo ke ngaohi ʻakimautolu ko e efe mo e ʻotoʻota ʻi he lotolotonga ʻoe kakai.
 
46 “Kuo mafaʻa ʻae ngutu ʻa homau kau fili kotoa pē kiate kimautolu.
47 Kuo hoko mai ʻae manavahē mo e tauhele kiate kimautolu,
ʻae lala mo e ʻauha.”
 
48 ‌ʻOku tafe hifo hoku mata, hangē ko e ngaahi vaitafe,
koeʻuhi ko e ʻauha ʻae ʻofefine ʻo hoku kakai.
49 “ʻOku tafe hifo ʻa hoku mata,
pea ʻikai ʻosi,
ʻoku ʻikai siʻi ke tuku.
50 Ke ʻoua ke ʻafio mai ʻa Sihova,
pea vakai mei he langi.
51 Ko hoku mata ʻoku ne ueʻi hoku loto,
koeʻuhi ko e ngaahi ʻofefine kotoa pē ʻo ʻeku kolo.
 
52 “Naʻe tuli fakamamahi au ʻe hoku kau fili hangē ha manupuna,
taʻehanoʻuhinga.
53 Kuo nau motuhi ʻeku moʻui ʻi he fale fakapōpula,
pea kuo lī ha maka kiate au.
54 naʻe melemo hoku ʻulu ʻi he ngaahi vai;
pea ne u toki pehē, ‘Kuo motuhi au.’
 
55 “ʻE Sihova ne u ui ki ho huafa
mei he fale fakapōpula taumamaʻo.
56 Kuo ke fanongo ki hoku leʻo;
ʻoua naʻa ke fufū ho fofonga ki heʻeku mānava,
ki heʻeku tangi.
 
57 Naʻa ke ʻunuʻunu mai ʻo ofi ʻi he ʻaho ko ia ne u ui kiate koe:
naʻa ke pehē, “ʻOua naʻa manavahē.”
 
58 “ʻE Sihova kuo ke langomakiʻi hoku laumālie;
kuo ke huhuʻi ʻeku moʻui.
59 ‌ʻE Sihova kuo ke ʻafioʻi ki he kovi kuo fai kiate au,
fakamaau ʻe koe ʻeku meʻa.
60 Kuo ke ʻafio ki heʻenau lili kotoa pē,
mo ʻenau ngaahi filioʻi kiate au.
61 “ʻE ʻEiki kuo ke fanongo ki heʻenau taukae,
pea mo ʻenau ngaahi filioʻi kiate au;
62 ‌ʻae loungutu ʻonautolu naʻe tuʻu hake kiate au,
pea mo ʻenau fakatupu meʻa kiate au ʻi he ʻaho kotoa pē.
63 Vakai ki heʻenau nofo hifo mo ʻenau tuʻu hake;
ko au ko ʻenau taʻanga.
 
64 “ʻE ʻEiki ke ke tuku kiate kinautolu ha totongi,
ʻo fakatatau ki he ngāue ʻa honau nima.
65 Tuku kiate kinautolu ʻae mamahi ʻoe loto,
ʻa hoʻo malaʻia kiate kinautolu.
66 Fakatanga mo fakaʻauha ʻakinautolu ʻi he houhau
mei he lalo langi ʻa Sihova.