10
1 ʻOku ʻikai tatau ʻa Sihova mo e ngaahi tamapua. 17 Ko e akonaki ʻae palōfita ke puna mei he mamahi ʻe haʻu. 19 ʻOku ne mamahi koeʻuhi ko e fale fehikitaki mo e kau tauhi vale. 23 ʻOku ne fai ʻae lotu.
‌ʻE fale ʻo ʻIsileli, mou fanongo ki he lea ʻoku folofolaʻaki ʻe Sihova kiate kimoutolu! ‌ʻOku pehē ʻe Sihova,
“ʻOua te mou ako ki he hala ʻoe hiteni,
pea ʻoua te mou ilifia ki he ngaahi fakaʻilonga ʻi he langi,
he ʻoku ilifia ki ai ʻae hiteni.
He ko e vaʻinga ʻae ngaahi tuʻutuʻuni ʻae kakai:
he ʻoku tā ʻaki ha toki ʻe ha taha ʻae ʻakau ʻi he vao,
ko e ngāue ʻae tufunga.
‌ʻOku nau teuteu ia ʻaki ʻae siliva mo e koula;
pea ʻoku nau fakamaʻu ia ʻaki ʻae ngaahi faʻo pea mo e ngaahi hamala,
ke ʻoua naʻa ngaueue ia.
‌ʻOku nau tuʻu tonu ʻo hangē ko e ʻakau ko e ponga,
ka ʻoku ʻikai lea:
ʻoku fua ʻakinautolu,
he ʻoku ʻikai te nau faʻa ʻeveʻeva.
Pea ʻoua naʻa manavahē kiate kinautolu;
he ʻoku ʻikai te nau faʻa fai ha kovi,
pea ʻoku ʻikai ʻiate kinautolu ha fai lelei.”
He ʻoku ʻikai ha taha ʻoku hangē ko koe, ʻE Sihova;
ʻoku ke lahi koe,
pea ʻoku lahi ho huafa ʻi he māfimafi.
Ko hai ʻe taʻemanavahē kiate koe,
ʻA koe, ko e Tuʻi ʻoe ngaahi puleʻanga?
He ʻoku ʻaʻau ia.
He ʻoku ʻikai ha taha ʻoku tatau mo koe,
ʻi he kau tangata poto kotoa pē ʻoe ngaahi kakai,
pe ʻi honau ngaahi puleʻanga kotoa pē.
Ka ʻoku nau anga fakamanu pea vale ʻaupito:
ko e meʻa akonaki ki he vale ʻae tamapua.
‌ʻOku ʻomi ʻae siliva lafalafa mei Tasisi,
pea mo e koula mei ʻUfase,
ko e ngāue ʻae tufunga, mo e nima ʻoe tangata ngaohi ukamea;
ko honau kofu ʻoku ʻuliʻuli mo kulokula:
ko e ngāue kotoa pē ʻae kau tangata poto.
10 Ka ko Sihova ko e ʻOtua moʻoni,
ko e ʻOtua moʻui ia,
pea ko e Tuʻi taʻengata:
pea ʻe ngaueue ʻa māmani ʻi hono houhau,
pea ʻe ʻikai faʻa kātaki ʻe he ngaahi puleʻanga ʻa ʻene tuputāmaki.
11 “Pea te ke lea pehē kiate kinautolu, ‘Ko e ngaahi ʻotua naʻe ʻikai ngaohi ʻae ngaahi langi, mo māmani, ʻe fakaʻauha ʻakinautolu ʻi māmani, pea mei he lalo langi.’ ”
12 Kuo ne ngaohi ʻae kelekele ʻaki hono mālohi,
kuo ne fokotuʻumaʻu ʻa māmani ʻaki ʻene ʻilo,
pea kuo ne folahi ʻae ngaahi langi ʻi heʻene poto.
13 ‌ʻOku folofola ia ʻaki hono leʻo,
ʻoku lahi ʻae ngaahi vai ʻi he langi,
pea ʻoku ne fakatupu hake ʻae ngaahi ʻao mei he ngaahi ngataʻanga ʻo māmani;
ʻoku ne fakatupu ʻae ngaahi ʻuhila mo e ʻuha,
pea ne ʻomi ʻae matangi mei hono ngaahi tukuʻanga koloa.
14 ‌ʻOku vale ʻi he ʻilo ʻae tangata kotoa pē:
ʻoku puputuʻu ʻae tufunga kotoa pē ʻi he tamapua kuo tā:
he ko e loi ʻene tamapua,
pea ʻoku ʻikai ha mānava ʻi ai.
15 Ko e vaʻinga ʻakinautolu, ko e ngāue ʻae vale:
pea ʻe ʻauha ʻakinautolu ʻi he ʻaho ʻe tautea ai ʻakinautolu.
16 ‌ʻOku ʻikai tatau mo kinautolu ʻae ʻinasi ʻo Sēkope:
he ko e tupuʻanga ia ʻoe ngaahi meʻa kotoa pē;
pea ko e fuofua ʻo hono tofiʻa ko ʻIsileli:
Ko hono huafa ko Sihova.
17 ‌ʻA koe ko e nofo kolo,
ke ke tānaki ho ngaʻotoʻota ʻo ke hola ʻi he fonua.
18 He ʻoku pehē mai ʻa Sihova,
“Vakai, te u lī ʻae kakai ni ʻi he fonua, ʻo hangē ko e maka tā,
pea te u fakamamahiʻi ʻakinautolu, koeʻuhi ke nau ongoʻi ia.”
19 Kuo u malaʻia ʻi hoku lavea!
ʻOku lahi hoku kafu:
ka naʻaku pehē,
“Ko e mamahi moʻoni eni, ka te u kātaki pe ia.”
20 Kuo hae hoku fale fehikitaki,
pea kuo motuhi ʻeku maea kotoa pē:
kuo ʻalu ʻiate au ʻeku fānau, pea kuo ʻikai ʻakinautolu:
ʻoku ʻikai toe ha niʻihi ke toe folahi ʻa hoku fale fehikitaki,
pea ke tautau hoku puipui.
21 He kuo liliu ʻo anga fakakakano ʻae kau tauhi,
pea ʻoku ʻikai te nau kumi kia Sihova:
ko ia ʻe ʻikai te nau monūʻia,
pea ʻe fakamovetevete honau kakai.
22 Vakai, ʻoku ongo mai ʻae ongoongo ʻoe longoaʻa,
pea mo e maveuveu lahi mei he fonua tokelau,
ke fakalala ʻae ngaahi kolo ʻo Siuta,
pea ke ngaohi ia ko e ʻana ʻoe fanga talākoni.”
23 ‌ʻE Sihova, ʻoku ou ʻilo ʻoku ʻikai ʻi he tangata pe hono hala:
ʻoku ʻikai ʻi he tangata ʻoku ʻeveʻeva ke fakahinohino hono ʻaluʻanga.
24 ‌ʻE Sihova, ke ke taaʻi au, pea ke fai ʻi he ʻofa;
ʻoua naʻa ʻi ho houhau,
telia naʻa ke fakaʻauha au.
25 Lilingi ho houhau ki he hiteni ʻaia ʻoku ʻikai te nau ʻilo koe,
pea ki he ngaahi kaunga fale ʻoku ʻikai ui ki ho huafa:
he kuo nau kai ʻo ʻosi ʻa Sēkope,
pea kuo folo hifo ia, pea kuo nau fakaʻauha ia,
pea fakalala hono nofoʻanga.