Tongan Bible (Revised West Version) Senesi 3
3
1 Ko e kākaaʻi ʻa ʻIvi ʻe he ngata. 6 Ko e hinga fakamanavahē ʻae tangata. 9 ʻOku ʻekea ʻakinaua ʻe he ʻOtua. 14 Ko e fakamalaʻia ʻae ngata. 15 Ko e talaʻofa ʻoe hako. 16 Ko e tautea ʻoe faʻahinga ʻoe tangata. 21 Ko e fuofua kofu. 22 Ko e kapusi mei Palataisi.
Pea naʻe olopoto lahi hake ʻae ngata ʻi he manu kotoa pē ʻoe fonua, ʻaia naʻe ngaohi ʻe Sihova ko e ʻOtua. Pea pehē ʻe ia ki he fefine, “ʻOku moʻoni koā kuo pehē ʻe he ʻOtua, ‘ʻE ʻikai te mo kai ʻi he ʻakau kotoa pē ʻoe ngoue?’ ” Pea naʻe pehē ʻe he fefine ki he ngata, “ʻOku ngofua ʻema kai ʻi he fua ʻoe ngaahi ʻakau ʻoe ngoue: Ka ko e fua ʻoe ʻakau ʻaia ʻoku ʻi he loto ngoue, kuo folofola mai ʻe he ʻOtua, ‘ʻE ʻikai te mo kai ai, pea ʻe ʻikai te mo ala ki ai, telia naʻa mo mate.’ ” Pea pehē ʻe he ngata ki he fefine, “ʻOku ʻikai moʻoni te mo mate. He ʻoku ʻilo ʻe he ʻOtua, ʻi he ʻaho te mo kai ai, ʻe toki ʻā ai homo mata, pea te mo hangē ko e ʻotua, ke ʻilo ai ʻae lelei mo e kovi.” Pea ʻi he mamata ʻe he fefine ʻoku lelei ʻae ʻakau ki he kai, mo matamatalelei ki he mata, pea ko e ʻakau ke velevele ki ai ke fakapotoʻi, naʻa ne toʻo ai hono fua, ʻo kai, pea naʻa ne ʻange foki ki hono ʻunoho, pea naʻa ne kai. Pea naʻe ʻā ai ʻae mata ʻokinaua ʻosi pe, pea na ʻilo kuo na telefua; pea naʻa na tui ʻae lou fiki, ʻona vala ʻaki ia. Pea naʻa na fanongo ki he leʻo ʻo Sihova ko e ʻOtua, ʻi he ʻalu ʻi he ngoue ʻi he mokomoko ʻoe ʻaho: pea naʻe toitoi ʻa ʻAtama mo hono ʻunoho, mei he ʻao ʻo Sihova ko e ʻOtua, ʻi he ngaahi ʻakau ʻoe ngoue.
Pea naʻe ui ʻe Sihova ko e ʻOtua kia ʻAtama, ʻo ne pehē kiate ia, “ʻOku ke ʻi fē?” 10 Pea pehē ʻe ia, “Naʻaku fanongo ki ho leʻo ʻi he ngoue, pea naʻaku manavahē, koeʻuhi kuo u telefua; pea u toitoi ai.” 11 Pea pehē ʻe ia, “Ko hai kuo fakahā kiate koe ʻoku ke telefua? Kuo ke kai ʻi he ʻakau, ʻaia naʻaku fekau kiate koe, ke ʻoua naʻa ke kai ai?” 12 Pea pehē ʻe he tangata, “Ko e fefine ʻaia naʻa ke foaki ke ma nonofo, naʻe ʻomi ʻe ia kiate au mei he ʻakau pea u kai ai.” 13 Pea naʻe folofola ʻa Sihova ko e ʻOtua ki he fefine, “Ko e hā eni kuo ke fai?” Pea pehē ʻe he fefine, “Naʻe kākaaʻi au ʻe he ngata, pea u kai.”
14 Pea naʻe folofola ʻa Sihova ko e ʻOtua ki he ngata,
“Koeʻuhi kuo ke fai eni,
kuo ke malaʻia lahi hake ʻi he fanga manu lalata kotoa pē,
mo e manu kotoa pē ʻoe vao;
te ke ngaolo koe ʻi ho kete,
pea te ke kai ʻae efu ʻi he ngaahi ʻaho kotoa pē ʻo hoʻo moʻui:
15 pea te u tuku ʻae taufehiʻa ʻiate koe mo e fefine,
pea ki ho hako mo hono hako;
ʻe laiki ʻe ia ho ʻulu,
pea te ke fakavolu ʻe koe ʻa hono muivaʻe.”
16 Pea naʻe pehē ʻe ia ki he fefine,
“Te u fakalahi ʻaupito ʻa hoʻo mamahi ʻi hoʻo fanafanau:
te ke fāʻeleʻi ʻae fānau ʻi he mamahi;
pea ʻe ʻi ho ʻunoho ʻa hoʻo holi,
pea te ne puleʻi koe.”
17 Pea naʻe pehē ʻe ia kia ʻAtama,
“Koeʻuhi kuo ke tokanga ki he leʻo ʻo ho ʻunoho,
pea kuo ke kai ʻi he ʻakau
ʻaia ne u fekau kiate koe, ‘Ke ʻoua naʻa ke kai ai:’
kuo malaʻia ʻae kelekele koeʻuhi ko koe;
te ke kai mei ai ʻi he mamahi ʻi he ngaahi ʻaho kotoa pē ʻo hoʻo moʻui;
18 ‌ʻe tupu mei ai kiate koe ʻae ʻakau talatala mo e talatalaʻāmoa;
pea te ke kai ʻae ʻakau iiki ʻoe fonua;
19 te ke kai ʻae meʻakai ʻi he kakava ʻo ho mata, kaeʻoua ke ke foki ki he kelekele;
he naʻe toʻo koe mei ai:
he ko e efu koe,
pea te ke toe foki ki he efu.”
20 Pea naʻe ui ʻe ʻAtama ʻae hingoa ʻo hono ʻunoho ko ʻIvi; koeʻuhi ko e faʻē ia ʻoe kakai moʻui kotoa pē. 21 Naʻe ngaohi foki ʻe Sihova ko e ʻOtua mei he kiliʻi manu, ʻae ngaahi kofu kia ʻAtama mo hono ʻunoho, pea naʻa ne fakakofuʻi ʻakinaua.
22 ¶ Pea naʻe folofola ʻa Sihova ko e ʻOtua, “Vakai, kuo hoko ʻae tangata ke hangē ko ha taha ʻiate kitautolu, ke ne ʻilo ʻae lelei mo e kovi: pea ko eni, telia naʻa mafao atu ʻe ia hono nima, pea ne toli foki mei he ʻakau ʻoe moʻui, ʻo kai, pea moʻui ʻo taʻengata:” 23 Ko ia naʻe fekau atu ia ʻe Sihova ko e ʻOtua mei he ngoue ʻo ʻIteni, ke ne ngāue ki he kelekele ʻaia naʻe toʻo ia mei ai. 24 Pea naʻa ne kapusi ai ʻae tangata pea ne tuku ki he potu hahake ʻoe ngoue ʻo ʻIteni, ʻae selupimi, mo e heletā ulo, ʻaia naʻe foli fakatakamilo, ke leʻohi ʻae hala ʻoe ʻakau ʻoe moʻui.