Tongan Bible (Revised West Version) ʻIsikieli 32
32
1 Ko e tangilāulau koeʻuhi ko e hinga fakamanavahē ʻa ʻIsipite. 11 ʻE fakaʻauha ia ʻe he heletā ʻa Papilone. 17 ʻE ʻohifo ia ki heli fakataha mo e ngaahi puleʻanga taʻekamu kotoa pē.
Pea ʻi heʻene hoko ki hono hongofulu ma ua ʻoe taʻu, ʻi hono hongofulu ma ua ʻoe māhina, pea ʻi he ʻuluaki ʻaho ʻoe māhina, naʻe hoko mai ʻae folofola ʻa Sihova kiate au, ʻo pehē, Foha ʻoe tangata, te ke fai ha tangilāulau koeʻuhi ko Felo ko e tuʻi ʻo ʻIsipite, pea ke pehē kiate ia,
ʻOku ke hangē koe ko e laione mui ʻi he ngaahi puleʻanga,
pea ʻoku ke hangē ko e tofuaʻa ʻi he tahi,
pea naʻa ke haʻu koe mei ho ngaahi vaitafe,
pea kuo ke fakangaueʻi ʻae vai ʻaki ho vaʻe,
mo ke fakaʻuliʻi honau ngaahi vaitafe.
‌ʻOku pehē ʻe Sihova ko e ʻOtua;
ko ia ia te u folahi atu ai hoku kupenga kiate koe mo e niʻihi mei he kakai tokolahi;
pea te nau fusi hake koe ʻi hoku kupenga.
Pea te u toki liʻaki koe ʻi he fonua,
pea te u lī atu koe ki he ʻataʻatā ʻoe vao,
pea ʻe heka kiate koe ʻae manupuna kotoa pē ʻoe langi,
pea te u fakamākona ʻaki koe ʻae fanga manu kotoa pē ʻo māmani.
Pea te u ʻai ho kakano ki he ngaahi moʻunga,
mo fakapito ʻaki ho ʻangaʻanga ʻae ngaahi teleʻa.
Te u lōmakiʻi foki ʻae fonua ʻoku ke tētē ai ʻaki ʻae toto,
ʻo aʻu ki he ngaahi moʻunga;
pea ʻe pito ai ʻae ngaahi vaitafe.
Pea kau ka ifi koe ke mate te u ʻuʻufi ʻae langi,
mo ngaohi ke fakapoʻuli hono ngaahi fetuʻu;
te u ʻufiʻufi ʻae laʻā ʻaki ʻae ʻao,
pea ʻe ʻikai tuku mai ʻe he māhina ʻa hono maama.
Te u ngaohi ke poʻuli kiate koe ʻae ngaahi maama ngingila kotoa pē ʻoe langi,
pea ʻe ai mo e fakapoʻuli ki ho fonua, ʻoku pehē ʻe Sihova ko e ʻOtua.
Te u fakamamahi foki ʻae loto ʻoe kakai tokolahi,
ʻo kau ka ʻave ho kau pōpula ki he ngaahi puleʻanga,
ki he ngaahi fonua ʻaia naʻe ʻikai te ke ʻiloʻi.
10 ‌ʻIo, te u fakatupu ʻae ofo kiate koe ʻi he kakai lahi,
pea ʻe lilika fakamanavahē honau ngaahi tuʻi, koeʻuhi ko koe,
ʻo kau ka vilo ʻeku heletā ʻi honau ʻao;
pea te nau tetetete maʻuaipē taki taha ʻae tangata,
telia ʻa ʻene moʻui ʻaʻana,
ʻi he ʻaho ko ia te ke hinga ai.”
 
11 He ʻoku pehē ʻe Sihova ko e ʻOtua;
“ʻE hoko mai kiate koe ʻae heletā ʻae tuʻi ʻo Papilone.
12 Te u fakahinga ʻae tokolahi ʻiate koe ʻi he heletā ʻae kau mālohi,
ko e kau toʻa ʻakinautolu kotoa pē ʻoe ngaahi puleʻanga:
pea te nau maumauʻi ʻae fieʻeiki ʻa ʻIsipite,
pea ʻe fakaʻauha ʻa hono kakai kotoa pē.
13 Te u fakaʻosiʻosi foki ʻae ngaahi manu kotoa pē ʻi ai,
ʻi hono ngaahi veʻe vai; pea ʻe ʻikai toe fakangaueʻi ia ʻe he vaʻe ʻoe tangata,
pe fakangaueʻi ia ʻe he vaʻe ʻo ha fanga manu.
14 Pea te u toki ʻai ke loloto, ʻenau ngaahi vai,
pea te u ngaohi ʻenau ngaahi vaitafe ke tafe hangē ko e lolo,
ʻoku pehē ʻe Sihova ko e ʻOtua.
15 ‌ʻO kau ka fakaʻauha ʻae fonua ko ʻIsipite,
pea ka masiva ʻae fonua ʻi he ngaahi meʻa ko ia naʻe mahu ai,
ʻo kau ka teʻia kotoa pē ʻakinautolu ʻoku nofo ai,
te nau toki ʻilo, ko Sihova au.
16 Ko eni ʻae tangilāulau, ʻaia te nau tangi mamahi ai koeʻuhi ko ia: ʻe mamahi koeʻuhi ko ia ʻae ʻofefine ʻoe ngaahi puleʻanga: te nau mamahi koeʻuhi ko ia, ʻio, ʻa ʻIsipite, pea mo hono kakai kotoa pē, ʻoku pehē ʻe Sihova ko e ʻOtua.”
17 ¶ Naʻe pehē foki ʻi hono hongofulu ma ua ʻoe taʻu, mo hono hongofulu ma nima ʻoe ʻaho ʻi he māhina, naʻe hoko mai ʻae folofola ʻa Sihova kiate au, ʻo pehē, 18 “Foha ʻoe tangata, tangi mamahi koeʻuhi ko e kakai ʻo ʻIsipite, pea lī hifo ʻakinautolu ki lalo, ʻaia mo e ngaahi ʻofefine ʻoe puleʻanga ongoongo, ʻo aʻu ki he potu māʻulalo ʻo māmani, fakataha mo kinautolu ʻoku ʻalu hifo ki he luo. 19 ‌ʻOku ke toulekeleka, lahi hake koe ʻia hai? ʻAlu hifo, pea ke tokoto fakataha hifo mo e kau taʻekamu. 20 Te nau tō hifo ʻi he lotolotonga ʻonautolu ʻoku tāmateʻi ʻaki ʻae heletā: kuo tukuange ia ki he heletā; tohoaki ia, pea mo hono kakai kotoa pē. 21 ‌ʻE lea mai kiate ia ʻae mālohi ʻiate kinautolu ʻoku mālohi mei loto heli, mo kinautolu kuo tokoni kiate ia: kuo nau mole hifo, kuo nau tokoto ko e taʻekamu, ko e kau tāmateʻi ʻe he heletā. 22 ‌ʻOku ʻi ai ʻa ʻAsilia mo hono kakai kotoa pē: ʻoku tuʻu takatakai ʻiate ia hono faʻitoka: kuo nau mate kotoa pē, ko e tō ʻi he heletā: 23 ‌ʻAia ʻoku tuʻu hono faʻitoka ʻi he tafaʻaki luo, pea ʻoku tuʻu takatakai hono kakai ʻi hono faʻitoka: kuo mate kotoa pē ʻakinautolu ko e tō ʻi he heletā, ʻaia naʻe fakamanavahē ʻaki ʻakinautolu ʻi heʻenau kei ʻi he fonua ʻoe moʻui. 24 ‌ʻOku ʻi ai ʻa ʻIlami mo hono kakai, ʻoku tuʻu takatakai ʻi hono faʻitoka, ko e kau mate kotoa pē ʻakinautolu, ko e tō ʻi he heletā, kuo nau ʻalu hifo ki he potu māʻulalo ʻo māmani fakataha mo e taʻekamu, ʻakinautolu naʻa nau manavahē ki ai, ʻi he fonua ʻoe moʻui; ka kuo nau fua pe ʻenau mā fakataha mo kinautolu ʻoku ʻalu hifo ki he luo. 25 Kuo nau tuku hono mohenga ʻi he lotolotonga ʻoe kau mate tāmateʻi mo hono kakai kotoa pē: ʻoku tuʻu takatakai ʻiate ia hono ngaahi faʻitoka: ko e kau taʻekamu kotoa pē ʻakinautolu, kuo tāmateʻi ʻaki ʻae heletā: neongo ʻae manavahē kiate ia ʻi he fonua ʻoe moʻui, ka kuo nau fua pe ʻenau mā fakataha mo kinautolu ʻoku ʻalu hifo ki he luo: kuo ʻai fakataha ia mo kinautolu kuo tāmateʻi. 26 ‌ʻOku ʻi ai ʻa Meseke, mo Tupale, pea mo ʻene kakai: ʻoku tuʻu takatakai ʻiate ia hono ngaahi faʻitoka: ko e kau taʻekamu kotoa pē ʻakinautolu, kuo tāmateʻi ʻaki ʻae heletā, neongo naʻa nau fai fakamanavahē ʻi he fonua ʻoe moʻui. 27 Pea ʻe ʻikai te nau tokoto fakataha mo e kau toʻa kuo hinga ʻi he kau taʻekamu, ʻakinautolu kuo ʻalu hifo ki heli mo ʻenau mahafutau: pea kuo nau ʻai ʻenau heletā ki lalo ʻi honau ʻulu, ka ʻe ʻiate kinautolu pe ʻenau ngaahi hia, neongo ko e kau fakamanavahē ʻakinautolu ʻi he fonua ʻoe moʻui ki he kakai mālohi. 28 Ko e moʻoni, ʻe haʻaki koe ke lailai ʻi he lotolotonga ʻoe kau taʻekamu, pea te ke tokoto fakataha mo kinautolu kuo tāmateʻi ʻaki ʻae heletā. 29 Ko ʻena ʻa ʻItomi, mo hono ngaahi tuʻi, mo hono houʻeiki, ko kinautolu mo ʻenau mālohi kuo fakatokoto fakataha mo kinautolu kuo tāmateʻi ʻaki ʻae heletā: te nau tokoto fakataha mo e kau taʻekamu, mo kinautolu ʻoku ʻalu hifo ki he luo. 30 ‌ʻOku ʻi ai ʻae houʻeiki mei he potu tokelau ʻoku nau kātoa, mo e kakai Saitoni kotoa pē, kuo tō hifo fakataha mo e kau mate tāmateʻi; ko e meʻa ʻi heʻenau lilika, kuo nau mā ki heʻenau mālohi; pea ʻoku nau tokoto ko e kau taʻekamu fakataha mo kinautolu kuo tāmateʻi ʻaki ʻae heletā, pea te nau fua ʻenau mā fakataha mo kinautolu ʻoku ʻalu hifo ki he luo. 31 ‌ʻE mamata ʻa Felo kiate kinautolu, pea ʻe fiefia ia mo hono kakai kotoa pē, ʻio, ʻa Felo mo ʻene kautau kotoa pē naʻe tāmateʻi ʻaki ʻae heletā, ʻoku pehē ʻe Sihova ko e ʻOtua. 32 He kuo tāmateʻi ʻaki ʻae heletā, ʻio, ʻa Felo mo hono kakai,” ʻoku pehē ʻe Sihova ko e ʻOtua.