24
1 Ko e fakatātā ʻoe kulo kuo fakalili. 6 Ko e fakahā ai ia ʻae fakaʻauha ʻaupito ʻo Selūsalema 15 Ko e fakatātā ʻoe ʻikai fai ʻe ʻIsikieli ha tangilāulau koeʻuhi ko e pekia ʻa hono uaifi. 19 Ko e fakahā ai ia ko e mamahi ʻe hoko ki he kakai Siu ʻoku taʻefaʻafakamatala.
1 Naʻe toe hoko foki ʻae folofola ʻa Sihova kiate au, ʻi hono hiva ʻoe taʻu, ʻi hono hongofulu ʻoe māhina, mo hono hongofulu ʻoe ʻaho ʻi he māhina, ʻo pehē, 2 Foha ʻoe tangata, tohi ʻe koe ʻae hingoa ʻoe ʻaho ko eni: he naʻe teuteu ʻae tuʻi ʻo Papilone ki Selūsalema ʻi he ʻaho ko eni. 3 Pea ke lea ʻaki ha fakatātā ki he fale angatuʻu, mo ke pehē kiate kinautolu, ʻOku pehē ʻe Sihova ko e ʻOtua;
Fokotuʻu ʻae kulo,
fokotuʻu ia pea lilingi ha vai ki ai:
4 Tānaki ʻae ngaahi konga ki ai,
ʻae konga lelei kotoa pē,
ʻae alanga mui mo e alanga muʻa;
fakafonu ʻaki ia ʻae ngaahi hui lelei.
5 Fili mai ʻaia ʻoku lelei hake ʻi he fanga manu,
pea ʻai ʻae ngaahi hui ki lalo ʻi ai,
pea ʻai ke lelei ʻaupito,
pea fakamoho ʻae hui ʻi ai.”
6 Ko ia ʻoku pehē ʻe Sihova ko e ʻOtua;
“Malaʻia ki he kolo kuo pani toto,
ʻae kulo ko ia, ʻoku kei ʻi ai ʻae ʻuli,
kuo teʻeki ke mavahe hono ʻuli mei ai!
Toʻo taki taha mai ʻae konga mei ai,
pea ʻoua naʻa filifilimānako.
7 He ʻoku ʻi loto ʻiate ia ʻa hono toto
kuo ne ʻai ia ki he funga maka;
naʻe ʻikai te ne lilingi ia ki he kelekele
ke ʻufiʻufi ia ʻaki ʻae efu:
8 Ka koeʻuhi ke tupu ʻae houhau mo fakahoko hono tautea;
kuo u tuku ai hono toto ki he funga maka,
koeʻuhi ke ʻoua naʻa ʻufiʻufi ia.”
9 Ko ia ʻoku pehē ai ʻe Sihova ko e ʻOtua;
“Malaʻia ki he kolo pani toto!
ʻIo, te u fokotuʻu ke lahi ʻae fefie ki he afi.
10 ʻAi pe ʻae fefie,
pea tafu ʻae afi,
pea tutu ʻae kakano,
pea ʻai ke fifisi lahi,
pea tuku ke vela ʻae ngaahi hui.
11 Pea toki ʻai maha pe ia ki he afi,
koeʻuhi ke vela ai
hono palasa, ʻio, ke vela,
pea koeʻuhi ke molū hono fakalielia ʻi ai,
pea ke ʻosi mei ai ʻae ʻuli ʻoku tētē.
12 Kuo ne fakaongosia ia ʻi he ngaahi loi,
pea naʻe ʻikai mahuʻi meiate ia ʻa hono ʻuli:
ko e meʻa ʻuli ʻi ai ʻe tō ki he afi.
13 ʻOku fakalielia hoʻo meʻa ʻuli: pea koeʻuhi kuo u fakamaʻa koe kae ʻikai te ke maʻa, ʻe ʻikai toe fakamaʻa koe, kaeʻoua ke u ʻai ke hoko ʻa hoku houhau kiate koe. 14 Ko au ko Sihova kuo u lea ki ai: ʻe hoko pe ia, pea te u fai ia ʻeau; ʻe ʻikai te u fakaholomui, pea ʻe ʻikai te u mamae, pe te u fakatomala; ʻoku pehē ʻe Sihova ko e ʻOtua, te nau fakamaauʻi koe ʻo fakatatau ki ho hala, pea tatau mo hoʻo ngāue kuo ke fai.”
15 ¶ Naʻe hoko foki ʻae folofola ʻa Sihova kiate au, ʻo pehē, 16 “Foha ʻoe tangata, vakai, ʻoku ou toʻo atu ʻaia ʻoku holi ki ai ho mata, ʻi he tā pe taha: ka ʻe ʻikai te ke mamahi pe tangi, pea ʻe ʻikai tafe hifo ho loʻimata. 17 ʻOua naʻa tangi, pea ʻoua naʻa fai ha mamahi, koeʻuhi ko e pekia; ʻai pe ʻae tatā ki ho ʻulu, pea ʻai mo e topuvaʻe ki ho vaʻe, pea ʻoua naʻa puke ngutu, pea ʻoua naʻa kai ʻae mā ʻae kau tangilāulau.” 18 Ko ia naʻaku lea ki he kakai ʻi he pongipongi: pea ʻi heʻene hoko ki he efiafi naʻe pekia ʻa hoku uaifi; pea naʻaku fai ʻi he pongipongi ʻe taha ʻo hangē ko ia naʻe fekau mai.
19 ¶ Pea naʻe pehē mai ʻe he kakai kiate au, “ʻE ʻikai te ke fakahā mai hono ʻuhinga ʻoe ngaahi meʻa ni kiate kimautolu, pe ko e hā kuo ke fai pehē ai?” 20 Pea naʻaku tali ʻaki ʻeni kiate kinautolu, naʻe hoko mai ʻae folofola ʻa Sihova kiate au, ʻo pehē, 21 “Lea ki he fale ʻo ʻIsileli, ʻOku pehē ʻe Sihova ko e ʻOtua; Vakai te u fakalieliaʻi ʻa hoku fale tapu, ʻaia ko homou mālohiʻanga, ʻaia ʻoku holi ki ai ho mata, pea mamae ki ai ho laumālie; pea ko ho ngaahi foha mo ho ngaahi ʻofefine kuo mou tuku ʻe hinga ʻi he heletā. 22 Pea te mou fai ʻo hangē ko ia kuo u fai: ʻe ʻikai te mou pupuni ngutu, pe te mou kai ʻi he mā ʻae kakai tangilāulau. 23 Pea ʻe tatā pe homou ʻulu, pea ʻai mo e topuvaʻe ki homou vaʻe ʻe ʻikai te mou mamahi pe fai ʻae tangi ka te mou fakaʻauʻausino pe, koeʻuhi ko hoʻomou hia, pea femamahiʻaki pe ʻiate kimoutolu 24 Ko ia ko ʻIsikieli ko e fakaʻilonga ia kiate kimoutolu: te mou fai ʻekimoutolu ʻo hangē ko ia kotoa pē kuo ne fai ʻe ia: pea ka hoko mai eni, te mou ʻilo ko au ko Sihova ko e ʻOtua.
25 ¶ “Ko eni foki, ʻa koe foha ʻoe tangata, ʻi he ʻaho ko ia te u toʻo atu ai meiate kinautolu honau mālohi, mo e fiefia ʻo ʻenau nāunau, ʻae holi ʻa honau mata, mo ia kuo tukupau honau loto ki ai, ʻa honau ngaahi foha mo honau ngaahi ʻofefine, ʻikai ʻe pehē, 26 Ko ia ʻe hao ʻi he ʻaho ko ia ʻe haʻu kiate koe ke fakaongo ia ki ho telinga? 27 ʻI he ʻaho ko ia ʻe matoʻo ho ngutu kiate ia kuo hao, pea te ke lea, pea ʻe ʻikai te ke kei noa: pea ko e fakaʻilonga koe kiate kinautolu; pea te nau ʻilo ko Sihova au.”