Say
NIPADAR
na ni Jesu-Cristo kona ni Juan
Say Maipa'ka' konan Sitin Libro
Say nipadar na ni Jesu-Cristo kona ni Juan maipa'ka' sa no ani a mangyadi' li' sa adapen a awro (1:2), ket naisurat sin panaon a mangkapai-paidap saray mammemper kona ni Cristo bana' sa pangngibarita' ra a syay Uunuren. Sin panaon a nisurat nayti ni Juan, sin angan-anganen a pibutlayan nin 81-96 A.D., ket mangkapriso yadtaw sa Patmos, sayay islan adani sa baybay nin Grecia bana' sa pammemper na (1:9). Si sangkaimpurtantiwan nin gagara na ni Juan sa nipanurat na konan siti ket si pagsenen nay kukanakman ra ta pigaw nin dumaer sara sa pammemper ra mataman no mangkapaidap sara o patyen sara et man bana' kona ni Cristo.
Maadal et a maipa'ka' sa linaman nan sitin libro sa nibarita' na ni Jesus sa Mateo kapitulo 24, Marcos kapitulo 13, tan Lucas kapitulo 21. Mabasa et anamaet sa U'nan Tistaminto sa libron Ezekiel tan sa libron Daniel.
Say u'nan parti nan sitin libro ket say pito ran surat konran piton dupong ran mammemper itaw sa prubinsyan Asia. Ipa'kit nin sayti a kimey nin saka-sakalakon grupo ran tumutumbok kona ni Cristo maipa'ka' sa pammadya'dya' konra tan say bibilin na ni Cristo konra (2:1–3:22).
Say ka'bawan nin linaman nan sitin libro ket say nipa'kit na ni Jesu-Cristo kona ni Juan nin bilang nin taynep, a sarban sayti ket main nin rabay nin ibarita'. Saray Cristiano sin panaon na ni Juan, main nin pakataros ra sa rabay nin ibarita' nin sayti, bale' konran raruma ket maidap nin tarusan. Mataman sawanin, say pananaros nin tutawo sa rabay nin ibarita' ket ambo' nin pari-pariho. Mainum'ay ya bale' nin matarusan a sangkaimpurtantiwan nin bagay a mampag'irgwan iti,
Say kasan sapo nin pananalo nan Dios konran kukalaban na bana' kona ni Cristo a syay Uunuren.
Ila'pos nayna anaod nin Dios a sarba nin nitarana' na (1:8).
Ibi nayna anamaet nin Dios a gun-guna konran kapagpyawan nin tutawo na (22:12).
Kiikap sara li' kona a tutawo nan Dios sa ba'yon langit tan luta' tan sa syudad nin Jerusalem a ginwa' na (21:1-3).
Say Linaman nan Sitin Libro
Sumubli' yaynaod li' si Jesu-Cristo (1:1-8)
Say nipangu'na nan namarita' ni Juan nin say linaman nan sitin libro (1:1-3)
Pakumustawen nasara ni Juan a Piton Dupong (1:4-8)
Say nipadar na ni Jesu-Cristo kona ni Juan (1:9–22:7)
Say pammagsen nin dudupong ran iti kona ni Jesu-Cristo (1:9–3:22)
Mag'uray ya li' sa adapen a namarsa (4:1–6:17)
Saray namarkawan nin uaripen nan Dios (7:1-8)
Pipuruken saray tutawo sa rway pag'adian (7:9–15:4)
Say panunusa nin mangibwat konan Dios (15:5–17:18)
Say pakaibangon nan Ba'yon Pag'adian (18:1–22:7)
Say pammatutuo na ni Juan sa saytin naisurat (22:8-21)
1
Say Nipangu'na nan Namarita' ni Juan nin say Linaman nan Sitin Libro
Say iti konan sitin libro ket say nipadar na ni Jesu-Cristo nin matkap nin mangyadi' ana sa ambo' anan ma'teng. Nipya nayti nin Dios kona ni Jesu-Cristo nin ipatanda' na konran saray tutawo nan Dios nin mampagsirbi kona. Kanya' nin si Jesu-Cristo, nibaki' naya a sayay anghil na nin ipatandaan nayti kongko nin si Juan a sayay aripen na. Nisurat ko a sarban nipa'kit kongko, ket patutu'wan ko nin sayti ket peteg a minsahi nin niparate' nan Dios nin nipatandaan na ni Jesu-Cristo.
Makarma' yay mamasa konran raruma sa naipadles nin naisurat iti tan makarma' saraynamaet a makarnge' tan tumulok sa nibarita' bana' ta sa ambo' ana nin ma'teng ket matukid ana.
Pakumustawen nasara ni Juan a Piton Dupong
Si'ko si Juan.
 
Surat koyayti komoyon piton* Iti konan sitin libro, si bilang a pito ket mabasa yan milimampulo' tan a'pat. Sa pangingisip ran Judio, say pipa'kaan na ket kustun-kusto ya, kasan pagkurangan. Angangko, siin a rason no ambale' a pito ra sa sarban dupong a nginaranan iti. dupong ran mammemper isen sa prubinsyan Asia* Mabasa a maipa'ka' konan sitin lugar a Asia sa Glusaryo..
Sapa kumon ta bindisyunan nakamo tan byan nakamo nin mabistan kapapa'sar nin Dios. Sya, main ya sawanin, main yayna sin saytaw et sin tarana', tan main ya anggan-angga.
Sapa kumon ta bindisyunan nakamo tan byan nakamo nin mabistan kapapa'sar nin Ispirito nan Dios a iti ya sa adapan nin tekrean na nin main nin pitoy paka'kitan nin pakayadi' na.* nin main…pakayadi' na.- Sa Griego:nin main saray pitoy uispirito.
Sapa kumon ta bindisyunan nakamo tan byan nakamo nin mabistan kapapa'sar ni Jesu-Cristo.
 
Syay mapagmatalkan nin mamatutuo sa maipa'ka' konan Dios.
Sya a sangkau'nawan nin sinmubli' nin mabyay;
tan sya a mag'uray konra nin sarba ran mag'uray iti sa mundo.
Sya, kawa'nan natamo,
ket binalukasan natamo mangibwat sa pag'uuray nin kasalanan tamo
yupa' sa daya' na nin tinmuro' sin pinati ya.
Nibiang natamo sa pag'aadi' na ket
ginwa' natamo nin pupadi' nin
magsirbi konan Dios a sya a Dios na tan Ama na.
Itandudo' ya anaod a ngaran na tan mag'adi' ya anggan-angga!
Peteg a wanin.
Ket tandaen moyoyti: Rumate' ya si Jesu-Cristo nin iti ya sa gunem.* Daniel 7:13-14; Mateo 24:30; Marcos 13:26; Lucas 21:27.
Ket sarba ran tutawo ma'kit raya.
Pati saraytaw saray namapasak kona, ma'kit raya li'.
Ket sarba ran tutawo sa mundo, bana' kona, mangabet-abet sara li' sa bereng ra.* Zacarias 12:10.
Peteg a wanin ana li' a mangyadi'.
 
Si Uunuren a Dios, a sya ket Makapangyayadi' ya sa sarba tan sya anaod ket main ya sawanin, main yayna sin saytaw et sin tarana', tan main ya anggan-angga wana,
“Si'ko a mansabtan nin Alpha tan Omega.”* Mabasa a maipa'ka' sa Alpha tan Omega sa Glusaryo.
Say Nika'kit na ni Juan kona ni Cristo a Sangkata'gayan
Si'ko anaod si Juan nin busat moyon mammemper. Kalamo' rako anamaet nin si'kamon tumutumbok na ni Jesus ket kapada moyo, mampangirangep ako nin idap tan madaer ako tan mangkipag'uray ako kona. Bana' ta nipatandaan koy minsahi nan Dios tan nipatanda' koy maipa'ka' kona ni Jesus, sinintinsyawan akon nitampal iti sa isla nin Patmos.
10 Sayay awron Linggo a sya anaod a awro nan Catawan, si Ispirito nan Dios naidumay nipag'uray na kongko. Ket kapingmatan main anan maksaw nin busis a narnge' ko sa gurot ko nin bara'mon tunoy nin trumpita a 11 wana, “Isurat mo a ma'kit mo ta pigaw nin ipa'wit mo li' sa saytin pitoy dupong ran mammemper sa sayti nin syudad: Efeso, Esmirna, Pergamo, Tiatira, Sardis, Filadelfia tan Laodicea.”
12 Sin narnge' koya anaod a busis, nibring ako nin inmadap ta pigaw nin kikiten ko no si'no a mampag'irgo, ket main nin na'kit ko nin pito ray balitok a pammatukduan nin lampadawan. 13 Sa butlay ran sarayti ket main nin sayay bakas nin tawo* Mabasa et a maipa'ka' sa sayti sa Daniel 7:13; 10:5-6. a nakasulot yan bata nin anggan sakal a kaanrwan na tan main nin sas nan balitok sa kerep* Saray raruman nangadal konan Biblia wanra a si anron bata tan si sas ket sayti a isulot nan Sangkata'gayan nin Padi'. Anaod, si Jesu-Cristo, syay Sangkata'gayan nin Padi' tamon mammemper (Hebreo 4:14–5:10).. 14 Pinasyan puti' nin sabot na nin bilang kapas tan say mata na ket bara'mon umapoy. 15 Pinasyan sileng nin ayi na nin bilang gansa' nin niringgas nin niluto' sa apoy, tan say busis na ket bilang kanurkor nin alalakin daluyon. 16 Sa wanan nin gamet na ket main nin ga'get nan pito ray bituen. Main nin lumiwa' sa bebey na nin pinasyan tadem nin ispada nin dubli a tadem* Efeso 6:17; Hebreo 4:12. na tan say rupa na ket makapurar nin bilang sa salag nan awro no ugtiawro.
17 Sin na'kit koya, bara'mo akon nati nin nilukbob sa adapan na. Bale' niga'get naya a wanan nin gamet na kongko mi'sa wana,
“Andi' ka nin mali'mo bana' ta si'koyti si tarana' tan si kala'pusan nin sarba.* Nipadar 1:8; Isaias 44:6; 48:12.
18 Si'ko yay Si Lawas a Sibibyay.* Si Lawas a Sibibyay ket saya yan pannawag konan Dios. Mataman nin pinati ako, sinmubli' akoynaod nin mabyay anggan-angga. Si'ko a main nin pakayadi' sa patiti tan main nin pakayadi' nin abryan o isada' yay lugar ran nati ana* lugar ran nati ana- Sa Griego:Hades..
19 Anaod, isurat mo a na'kit mo, say mangyadi' ana sawanin tan say mangyadi' et anaod li'. 20 Sawanin, say pipa'kaan nin saray piton bituen a ga'get ko sa wanan nin gamet ko tan saray piton balitok a pammatukduan nin lampadawan, kai nin nipapalaway nin gindat bale' ipatandaan koyna komo sawanin. Saray piton bituen, sara a pito nin ibabaki' nan Dios sa piton dupong ran mammemper. Saray piton balitok a pammatukduan nin lampadawan, sara a piton dupong ran mammemper.”

*1:4 Iti konan sitin libro, si bilang a pito ket mabasa yan milimampulo' tan a'pat. Sa pangingisip ran Judio, say pipa'kaan na ket kustun-kusto ya, kasan pagkurangan. Angangko, siin a rason no ambale' a pito ra sa sarban dupong a nginaranan iti.

*1:4 Mabasa a maipa'ka' konan sitin lugar a Asia sa Glusaryo.

*1:4 nin main…pakayadi' na.- Sa Griego:nin main saray pitoy uispirito.

*1:7 Daniel 7:13-14; Mateo 24:30; Marcos 13:26; Lucas 21:27.

*1:7 Zacarias 12:10.

*1:8 Mabasa a maipa'ka' sa Alpha tan Omega sa Glusaryo.

*1:13 Mabasa et a maipa'ka' sa sayti sa Daniel 7:13; 10:5-6.

*1:13 Saray raruman nangadal konan Biblia wanra a si anron bata tan si sas ket sayti a isulot nan Sangkata'gayan nin Padi'. Anaod, si Jesu-Cristo, syay Sangkata'gayan nin Padi' tamon mammemper (Hebreo 4:14–5:10).

*1:16 Efeso 6:17; Hebreo 4:12.

*1:17 Nipadar 1:8; Isaias 44:6; 48:12.

*1:18 Si Lawas a Sibibyay ket saya yan pannawag konan Dios.

*1:18 lugar ran nati ana- Sa Griego:Hades.