4
Ket si'kamo anamaet nin uamo, maibagay nin ibi moyo a manepeg konran uaripen moyo. Panemtemen moyon ikon nakamo anamaet nin amo moyodtaw sa langit.
Say Kadadasal tan Pagkakabyay
Bubsat, pakaseseg kamon dumasal nin siaaram kamo tan sisasalamat kamo. Iranod rakami anamaet sa dasal moyo; idasal moyo a ibi na kumon nin Dios a pagkanawanawa komi ket maipatandaan mi a maipa'ka' kona ni Cristo nin gindat ket kai nin nipadar. Mangkapriso ako sawanin bana' ta nipata-patandaan koyna ket maituluy-tuloy ko et kumon. Ket, idasal moyon maipapalaway ko konran tutawo ta siin nin talaga a matkap nin gaw'en ko.
Sa pakikala-kalamo' moyo konran ambo' nin mammemper kona ni Cristo, magkabyay kamon mapanaros. Ket, usaren moyon maong a sarban pagkanawanawa moyon mangitao nin maipa'ka' kona ni Cristo. No kiirgu-irgo kamo, matkap a say pag'iirgo moyo ket mabista tan makaayat. No wanin a gaw'en moyo ket matandaan moyo a maibagay moyon i'bat sa si'numan.
Masusuyot nin Pangingigalang tan Patanid na ni Pablo
No ani a mampangya-pangyadi' iti kongko, ipatandaan nadsen li' komoyo ni Tiquico a sya mabli ya komi nin busat tamo sa pammemper. Sya, katrabahwan miyan kapagpyawan sa man'ipagwa' nan Uunuren komi. Ibaki' koyadsen komoyo ta pigaw nin mangibwat kona ket matandaan moyoy kapapa'sar mi ket no wanin, mainawnan kamo. Kaaluyon naya li' si Onesimo* Mabasa a maipa'ka' kona ni Onesimo sa Filemon 1:8-21. a saya anamaet lamang nin mabli komi nin busat tamo sa pammemper. Kapagpyawan ya. Taga yadsen sa Colosas. Sarayna li' a mangibarita' komoyodsen sa sarban mampangyadi' iti.
10 Mampakumustawen rakamo ni Aristarco* Mabasa a maipa'ka' kona ni Aristarco sa Ginwa-ginwa' 19:29; 20:4; 27:2. nin kalamo' kon mangkapriso, tan ni Marcos* Mabasa a maipa'ka' kona ni Marcos sa Ginwa-ginwa' 12:12,25; 13:5,13; 15:37-39. nin kapi'sa na ni Bernabe* Mabasa a maipa'ka' kona ni Bernabe sa Ginwa-ginwa' 4:36; 13:1–15:39.. Binibilin katamoyna maipa'ka' kona ni Marcos. San'ilyen moya li' no mako yadsen komoyo. 11 Si Jesus a pinangaranan nin Justo, mampakumustawen nakamo anamaet. Sara tamo' nin tulodti a Judio nin mammemper a kalalamo' ko sa pangingipatanda' nin maipa'ka' sa pag'aadi' nan Dios. Abaw a mangkaitulong ra kongko.
12 Mampakumustawen nakamo anamaet ni Epafras. Aripen nayan si Cristo a si Jesus tan taga yadsen anamaet lamang komoyo sa Colosas. Man'idasalan nakamon pirmi. Masuet nan man'idasal a sapa kumon ta si Dios pa'geten na a pammemper moyo kona ni Cristo tan mataros moyo kumon nin peteg no ani a rabay nan Dios nin gaw'en moyo. 13 Maibarita' ko a seseg na para sa kaabigan moyo tan wanin et anamaet sa kaabigan ran taga Laodicea tan Hierapolis.
14 Mampakumustawen nakamo ni Lucas a syay kawa'nan min duktor, tan wanin anamaet kona ni Demas.
15 Iparate' moyoy pammakumusta mi konran saray kalalamo' tamon mammemper itaw sa Laodicea, tan kona ni Ninfa tan konran saray mammemper nin mampidudupong itaw sa bali na ta pigaw nin raywen rayay Dios. 16 No nabasa moyaynayti li' nin surat nin si'kamon mammemper isen sa Colosas, ipa'wit moya konran saray mammemper itaw sa Laodicea ta pigaw nin mabasa raya anamaet. Mi'sa kalapen moyay surat ko konradtaw ta pigaw nin mabasa moya anamaet. 17 Ibarita' moyo kona ni Arquipo* Mabasa a maipa'ka' kona ni Arquipo sa Filemon 1:2. a ituloy nan page' nin gaw'en a naibin trabaho na a nangibwat konan Uunuren.
18 Si'kon mismo nin si Pablo a nanurat konan siti:
Kumusta kamoynadsen nga'min?
Andi' moyo nin lingwanan a mangkapriso ako.
Sapa kumon ta si Dios bindisyunan nakamo.

*4:9 Mabasa a maipa'ka' kona ni Onesimo sa Filemon 1:8-21.

*4:10 Mabasa a maipa'ka' kona ni Aristarco sa Ginwa-ginwa' 19:29; 20:4; 27:2.

*4:10 Mabasa a maipa'ka' kona ni Marcos sa Ginwa-ginwa' 12:12,25; 13:5,13; 15:37-39.

*4:10 Mabasa a maipa'ka' kona ni Bernabe sa Ginwa-ginwa' 4:36; 13:1–15:39.

*4:17 Mabasa a maipa'ka' kona ni Arquipo sa Filemon 1:2.