Pohnpeian Bible with Apocrypha ROM 9
9
Koht oh Sapwellime Aramas Pilipil kan
Eri, I kin koasoia ni mehlel: ngehi sapwellimen Krais oh I sohte kin likamw. Ngehn Sarawi kin ketin kakaun kapehdiet, oh pil kin kadehde duwen ei sohte likamw ni ei sakarkihda ia uwen ei pahtou! Ia uwen medek poatopoat me mi nan mohngiongiet pwehki kisehi mehn Suhs kan, kisehn udukei oh ntahi! I kakete nda Koht en ketin kerieiehla oh katohreiehsang Krais, pwe irail en kak mourkihla. Irail me wia sapwellimen Koht aramas pilipil; e ketin wiahkinirailla sapwellime seri oh pil ketin kupwurehda pwe re en iang ahneki sapwellime lingan. E ketin wiahiong irail sapwellime inou lap kan oh ketikihong irail Kosonnedo. Re ahneki kaudok mehlel, oh re aleier sapwellimen Koht inou kan. Eks. 9.4. Irail me kadaudok en samatail me ndand ako; oh Krais, nin duwen eh aramas, pil wia kisehrail. Eri, kaping en kowohng Koht me kin ketin kakaun mehkoaros kohkohlahte! Amen.
I sohte koasoakoasoia me sapwellimen Koht inowo sohte pweida; pwe kaidehn mehn Israel koaros me wia wehi pilipilo. Pil kaidehn kadaudok en Eipraam koaros me wia serien Koht; pwe Koht ketin mahsanihong Eipraam, “Kadaudok en Aisek me pahn wiahla kadaudokomw.” Sen. 21.12. Met wehwehki me kaidehn irail kan me kin ipwidi nin duwen nsenen aramasa IPWIDI NIN DUWEN ARAMAS: Met wehwehki kadaudok en Eipraam kan me ipwisang nah pwutak Ismael, Ismael nohnoki Akar (tehk Kal. 4.22-23.) me sapwellimen Koht seri, pwe irail kante me kin ipwidi nin duwen sapwellimen Koht inou; iei irail me kin wia kadaudok mehlel en Eipraam. Pwe sapwellimen Koht inowo wiawihda ni lepin mahsen pwukat, “Ni ahnsou me konehng I pahn pwurodo, oh Sara ahpw pahn naitikihada pwutak emen.” Sen. 18.10.
10 Oh kaidehn ihte met. Pwe nein Repeka pwutak riemeno pil pahpahki ohltehmen, iei samatail Aisek. 11-12 A pwe kupwur en Koht en pweida mehlel ni pilipil en emen seri ko, Koht ketin mahsanihong Repeka, “Me laudo pahn uhpah me tikitiko.” E ketin mahsanih met mwohn ara saikinte ipwidi, mwohn ara saikinte wiahda mehkot mwahu de mehkot suwed. Eri, sapwellimen Koht pilipil wet wiawiher sang ni pein kupwure ni eh ketin malipe ira, ahpw kaidehn sang ni mehkot me ira wiahda. Sen. 25.23. 13 Nin duwen Pwuhk Sarawi eh mahsanih, “I poakohng Seikop, a Esau I kailongki.” Mal. 1.2-3.
14 Eri, dahme kitail pahn nda? Dene Koht me ketin sapwung? Soh kowahlap! 15 Pwe e ketin mahsanihong Moses, “I kin kadekohng me I kin men kadekohng, oh I pil kin poakehla me I kin men poakehla.” Eks. 33.19. 16 Eri, met kaidehkin doadoahk en anahn de wiewiahn aramas, pwe doadoahk en sapwellimen Koht kalahngan. 17 Pwe nan Pwuhk Sarawi eh mahsanihong Parao, “Iet kahrepen ei kasapwiluhkadahng nanmwarki, pwe I en kasalehda ei manaman rehmw, oh pwe mwarei en lohkseli wasa koaros nin sampah.” Eks. 9.16 (LXX). 18 Eri, Koht kin ketin kalahngan ong irail me e kin ketin kupwurki en kalahnganohng; oh e pil kin ketin kakeptakaila irail kan me e kin ketin kupwurki re en keptakaila.
Engieng en Koht oh pil Sapwellime Kalahngan
19 Eri, emen kumwail kakete ndaiong ie, “Ma iei duwe met, eri, dahme Koht kak ketin kapwukoanehki aramas mehkot? Pwe ihs me kak pelianda kupwur en Koht?” 20 Pwe ihs kowe, kompoakepahi, pwe ke en kak uhwong Koht? Einpwoat ehu me wiawihkihda pwehl sohte kin ndahng me wiahdao, “Dahme ke wiahkiniehda ni soangen mwohmwet?” Ais. 29.16; 45.9; Kupw. 12.12. 21 Eri, sounwia einpwoato soh ahneki pwungen pilada soangen pwehl da me e men doadoahngki; oh pil wiahda eipwoat riau sang ni nsen pwehl ehu, ehu me kaselel ong ni doadoahk kesempwal akante, a ehu ong mehn doadoahk mwahl akan? Kupw. 15.7; Sir. 33.13.
22 Eri, e pil duwehte rehn wiepen nin limen Koht. E ketin kupwurki kasalehda sapwellime engieng oh kalohkiseli sapwellime manaman. Ihme e ketin kanengamahiong irail kan me milahr pahn sapwellime engieng, me nektehn lekdekla. 23 Oh e pil ketin kupwurki kasalehda reken sapwellime lingan, me e ketin kapwiledohngkitailehr me milahr pahn sapwellime kalahngan, kitail kan me e ketin kaunopadahr en ketikihong sapwellime lingan. 24 Pwe iei kitail me e malipe, kaidehn sangete rehn mehn Suhs akan, ahpw pil sang rehn mehn liki kan. 25 Pwe iet me e ketin mahsanih nan pwuken Oseia:
“Aramas akan me kaidehkin nei,
I pahn kahdanekin irail ‘Nei Aramas.’
Wehio me I sohte poakohng,
I pahn kahdaneki ‘Ei Mwohnlimpoak.’ Os. 2.23.
26 Oh wasaohte me I ndaiong irail,
‘Kaidehn nei aramas kumwail,’
re pahn adanekihla sapwellimen Koht ieias.” Os. 1.10.
27 Oh Aiseia pil mahsanih duwen Israel, “Mehnda ma aramas en Israel pahn tohto, rasehng pihken oaroahr akan, ahpw me malaulaute rehrail pahn mourla; Ais. 10.22-23 (LXX). 28 pwe Kaun-o pahn ketin mwadangete kadeikada sampah.” 29 Nin duwen me Aiseia mahsaniher mahs, “Ma Kaun-o, Wasa Lapalahpie, sohte ketin luhwekihdi ekei kadaudokatail, kitail pahn duwehla Sodom, kitail pil pahn duwehla Komora.” Ais. 1.9 (LXX).
Israel oh Rongamwahu
30 Eri, dahme kitail pahn nda? Met: mehn liki kan me sohte kin songosong en pwungla rehn Koht, re pwunglahr reh sang ni arail pwoson. 31 Ahpw irail me pilipildahr kan, me kin raparapahki kosonned ehu me pahn kak kapwungirailla rehn Koht, re ahpw sohte diar. 32 Eri, ia kahrepen met? Pwehki ar lemeleme me re kak pwungkihla ar wiewia kan a kaidehn pwoson, re ahpw dipekelekel ni “takain kadipekelekelo,” 33 me Pwuhk Sarawi mahsanih duwe:
“Kumwail kilang! I kihdiongehr nan Saion takai ehu me aramas akan pahn dipekelekel ie,
paip ehu me irail pahn pwupwudi ie.
A mehmen me pahn kin pwoson ih, sohte pahn sarohdi.” Ais. 28.16 (LXX).

9:4: Eks. 9.4.

9:7: Sen. 21.12.

a9:8: IPWIDI NIN DUWEN ARAMAS: Met wehwehki kadaudok en Eipraam kan me ipwisang nah pwutak Ismael, Ismael nohnoki Akar (tehk Kal. 4.22-23.)

9:9: Sen. 18.10.

9:11-12: Sen. 25.23.

9:13: Mal. 1.2-3.

9:15: Eks. 33.19.

9:17: Eks. 9.16 (LXX).

9:20: Ais. 29.16; 45.9; Kupw. 12.12.

9:21: Kupw. 15.7; Sir. 33.13.

9:25: Os. 2.23.

9:26: Os. 1.10.

9:27: Ais. 10.22-23 (LXX).

9:29: Ais. 1.9 (LXX).

9:33: Ais. 28.16 (LXX).