Pohnpeian Bible with Apocrypha MELKAHKA KAN 76
76
Koht me Soun Powehdi f TITLE NI MAHSEN EN IPRU: En Asap melkahka; koul pwoat.
Mehn Suda kan kin patohwan ese Koht;
mware me wahun mehlel nan wehin Israel.
Mwoale kin mi Serusalem;
e kin ketiket pohn Nahna Saion.
Ih wasao me e ketin karihspeseng nein imwintihti kan neirail arep kan,
nair mehnsansar kan oh kedlahs kan, pil iangahki ar tehtehn mahwen koaros.
 
Maing Koht, ia uwen omwi lingan!
Ia uwen lingaling, ni omwi kin ketin sapahldo sang pohn nahna kan,
wasa komw kalowedier ie sapwellimomwi imwintihti kan.
Nair sounpei kommwad akan pehdsangehr ar tehtehn mahwen koaros
oh re memeirier met nan dewen me melahr akan;
sohte kisin katep kis mie ong ar kehlail oh koahiek kan.
Maing Koht en Seikop, ni omwi ketin kamasak kin irail omwi engieng,
oahs kan oh me dake kan pwupwudiong nanpwel oh mehla.
 
Ahpw, maing KAUN, aramas koaros kin lemmwiki komwi.
Sohte me kak uh mwohn silangmwi
ni ahnsoun omwi engieng.
Komw kin ketin kapwilodohng kiht audepen omwi kopwung sang nanleng;
eri sampah pwon kin masepwehkada oh nennenla,
ni omwi ketida pwehn kasalehda pwunglahn sapwellimomwi kopwung,
ong ni komourlahn me toutoulahr kan koaros en sampah.
 
10 En aramas lingeringer pahn kin wekidekiong ni kapingpomwi;
oh koaros me luhwehdi nan mahwen kan pahn ehupene wia kaudokiong komwi.
 
11 Kumwail patohwanohng KAUN-O, amwail Koht, dahme kumwail inoukihong;
kumwail wehi keren kan, kumwail patohwandohng amwail kisakis kan.
Koht kin ketin kupwurki wiahiong aramas koaros en lemmwiki;
12 e kin ketin katikala soupeidi aklapalap akan
oh kin ketin kamasakada nanmwarki kan.

f^ TITLE NI MAHSEN EN IPRU: En Asap melkahka; koul pwoat.