Pwuhk kesiluh
73
(Melkahka 73—89)
Sapwellimen Koht Pwung b TITLE NI MAHSEN EN IPRU: En Asap.
Mehlel Koht me ketin kalahngan ong Israel,
ong irail kan me nan kapehd mwakelekel.
Kereniongehr ei koapworopwor pahn sohla;
oh ei pwoson tikitiklahr
pwehki ei peiriniong me aklapalap akan
ni ei kilang duwen me suwed akan ar kepwehpwe.
 
Soangen lokolok laud kan sohte kin lelohng irail;
re kin kehlail oh sohte kin soumwahu.
Re sohte kin diar apwal duwehte aramas teikan;
re sohte kin kedirepwki apwal en meteikan.
Re kin kapwatki aklapalap duwehte elin kapwat nin tepin wararail
oh lemei me wia arail likou puhp;
mohngiongirail kan kin kapwilewei suwed tohr,
oh loalarail kin diren lamalam suwed.
Re kin kouruhrki meteikan oh koasokoasoiapene duwen mehkan me suwed;
re me aklapalap oh kin koasoakoasoia duwen ar pahn kauwe meteikan.
Re kin lahlahwe Koht nanleng
oh kin wia kosonned kehlail ong tohn sampah.
10 Eri, sapwellimen Koht aramas akan pil kin iangirailla
oh kamehlele mehkan koaros me re kin nda.
11 Re nda, “Koht sohte pahn mwahngih;
Wasa Lapalahpieo sohte pahn ketin diarada.”
12 Iei duwen met iren me suwed akan.
Re kin paiamwahu oh kekeirda ahnsou koaros nan ar pai.
 
13 Eri dah, sohte pahn katepen ei mour mwakelekel
oh sohte wiahda dihp?
14 Maing Koht, komw kin ketin kaloke ie rahn ehu pwon;
nimenseng koaros I kin ale lokolok sang rehmwi.
 
15 Ma I ndaier soahng pwukat,
eri, I sohte pahn mwomwehda me ngehi emen sapwellimomwi aramas.
16 I song en dehdehkihla irair apwal wet,
ahpw e inenen apwal ong ie
17 I lao patohlong nan Tehnpasomwio,
I ahpw dehdehkihla dahme pahn wiawihong aramas suwed akan.
 
18 Komwi pahn ketikiniraildiong wasa likekiris kei
oh ketin sikeniraildi pwe re en mwomwla!
19 Re ahpw mwadangete mwomwla;
imwilahrail meid kamasepwehk.
20 Maing ei Kaun, re rasehng ouraman ehu me kin sohrala nimenseng;
ni omwi ketin pirida, re solahr mie.
 
21 Ni ei lamalam eh suwedla
oh I pil nsensuwedla,
22 I pweipweila duwehla mahn emen;
I sohla patohwan wehwehkin komwi.
23 Eri soh, pwe I pahn patopatohte rehmwi,
oh komwi kin ketin kolokolete pehiet.
24 Komw kin ketin kahluwahkin ie sapwellimomwi kaweid,
oh ni imwihla komw pahn ketin kasamwo ie nan sapwellimomwi lingan.
25 Sohte mehkot me ahi nanleng, pwe komwihte!
Dahme I pahn inangih nin sampah ma kaidehk komwi?
26 Ngeniet oh paliwereiet kak luwetala,
a Koht me kehlpei;
ihete me I kin anahne kohkohlahte.
 
27 Mehlel, irail kan me kin mweisang komwi pahn sohrala;
komwi pahn ketin kesepwekehla irail kan me soaloalopwoat ong komwi.
28 A duwen ngehi, ia uwen kesempwal en ei karanih Koht,
pwe I en diar silepei rehn KAUN-O Koht, Wasa Lapalahpie
oh I en kalohki wiepen nin lime kan koaros!

b^ TITLE NI MAHSEN EN IPRU: En Asap.