Pohnpeian Bible with Apocrypha MELKAHKA KAN 67
67
Koulen Kaping Kalahngan t TITLE NI MAHSEN EN IPRU: Melkahka pwoat; koul pwoat.
Maing Koht, komw ketin kupwurei kiht, oh kupwuramwahwihkitala;
komw ketin kupwur kalahngan oh mahsendohng kiht,
pwe sampah pwon en marainkihla kupwuromwien;
oh wehi koaros en dehdehkihla sapwellimomwi manaman en komour.
 
Maing Koht, aramas akan en kapinga komwi,
aramas koaros en kapinga komwi!
 
Tohnwehi kan en nsenamwahu oh koulki ar peren,
pwehki omwi kin ketin kapwungkihla pwung mehlel aramas akan
oh kin ketin kaweid wehi koaros nin sampah.
 
Maing Koht, aramas akan en kapinga komwi;
aramas koaros en kapinga komwi!
 
Sapwatail kapwaredahr audepe;
Koht, atail Koht, ketin kupwuramwahwihkitailehr.
Koht ketin kupwuramwahwihkitailehr;
aramas koaros wasa koaros en wauneki ih.

t^ TITLE NI MAHSEN EN IPRU: Melkahka pwoat; koul pwoat.