Pohnpeian Bible with Apocrypha MELKAHKA KAN 46
46
Koht kin Ketiket Rehtail x TITLE NI MAHSEN EN IPRU: En peneinei en Kora ar koul.
Koht me perehpatail oh atail kehl,
me kin ketin sewese kitail ni ahnsou apwal akan.
Kitail eri sohte pahn masepwehk, mehnda ma sampah pahn rerada
oh nahna kan pahn kihrla nan kepin madau;
mehnda ma iloak en nan madau kan pahn mwekidida oh ngiringirisek,
oh nahna kan pil pahn itihtikengki mwekid en nan madau.
 
Mie pillap pwoat me kin kaparanda kahnimw en Koht,
ong ni tehnpas sarawien Wasa Lapalahpie.
Koht kin ketiket nan kahnimwo, eri, e sohte pahn mwomwla kohkohlahte;
e pahn ketido sewese nin sorahn.
Wehi kan kin masapwehkada, wehin nanmwarki kan kin rerada;
Koht ketin poahngok, a sampah sohredi.
 
KAUN-O, Wasa Lapalap, kin ketiket rehtail;
Koht en Seikop, iei atail wasahn ruk.
 
Kumwail kohdo, oh kilang dahme KAUN-O ketin wiahda.
Kumwail kilang soahng kapwuriamwei kan me e ketin wiahda nin sampah.
E kin ketin katokihedi mahwen wasa koaros nin sampah;
e kin ketin katimpeseng arep kan, oh kauwehla kesik ketieu kan,
e kin ketin isikala nein sounpei kan mehn sansar kan.
10 E kin mahsanih, “Kumwail katokihedi amwail mahwen kan oh esehla me ngehi, iei Koht,
me lapalahpie rehn tohn wehi kan,
me lapalahpie nin sampah pwon.”
 
11 KAUN-O, Wasa Lapalap, kin ketiket rehtail;
Koht en Seikop, iei atail wasahn ruk.

x^ TITLE NI MAHSEN EN IPRU: En peneinei en Kora ar koul.